Alatala nompokio i Musa
3
Tempo etu i Musa nompoewu bimba-bimba bo towau-towau nu matuꞌana Yitro, topanggeni agama ri Tana Midian. Naria sanggani i Musa nangiri binata-binata etu ri sambote karawa baina sampe narata ri Bulu Horeb, bulu nu Alatala. a 2 Ri setumo malaeka i PUE nompopokita korona ka i Musa riara jela apu nggariara santungu gumbu. Musa nanggita gumbu etu najela, tapi daꞌa nikoni nu apu. 3 Nipekiri i Musa, “Nokuya gumbu etu daꞌa nikoni nu apu? Nabelopa ane aku malau manggita mpakamosu.”4 PUE nanggita i Musa nalau nanggita gumbu etu, jadi nongaremo Iꞌa ka i Musa nggariara gumbu etu, “Musa! Musa!”
Nesonomo i Musa, “Ri seꞌimo aku.”
5 Nangulimo Alatala, “Neꞌe iko mompakamosu ri seꞌi! Wonjumo sapatumu, sabana tana nipekanggoremu etu nagasa.” 6 Pade niulina woꞌu, “Aku eꞌimo Alatala ntotuꞌamu, etumo Alatala Abraham, Ishak bo Yakub.” Sangga nangepe suara etu Musa nombasalibumbu lenjena sabana naekamo rarana nanggita Alatala. b
7 Nangulimo i PUE, “Nikitakumo kandasa ntodeaku ri Tana Masir, pade niepekumo wamba ira nongare-ngare nekakai ala rakabasaka nggari jaꞌi ntau to Masir to nompandasa ira. Ninjanikumo kasusa bo kapari to nirasai ira. 8 Sabana etu nanaꞌumo Aku mombakabasaka ira nggari pale ntau to Masir pade manggeni ira nggari tana etu mpaka ri tana to naluo bo nabelo. Tana etu nakalumana bo naboya mpuꞌu, pade weꞌi-weꞌi nipetoꞌo tau to Kanaan, to Het, to Amori, to Feris, to Hewi pade tau to Yebus. 9 Pekakai nto Israel niepekumo, pade nikitaku woꞌu iwenu ira nipandasa ntau to Masir. 10 Jadi weꞌi-weꞌi Aku mompakau iko malau mantingayo Magau Masir ala iko mamala manggeniaka todeaku to Israel mesuwu nggari tana etu.”
11 Tapi nangulimo i Musa ka Alatala, “Isema aku eꞌi sampe mompakule malau mantingayo magau pade manggeniaka to Israel mesuwu nggari Tana Masir?”
12 Nangulimo Alatala, “Aku kana mosanggani-nggani ante iko. Ane mukeni to Israel mesuwu nggari Tana Masir ngina komi kana mepue ka Aku ri bulu eꞌi. Etumo tandaina to nompakanoto Akumo to nompakau iko.”
13 Nesono woꞌumo i Musa, “Tapi ane aku mosirata ka tau to Israel pade manguli ka ira, ‘Alatala to nisomba ntotuꞌa komi nompakau aku mpaka ri jaꞌi komi,’ natantumo ira kana mompekutana aku, ‘Sema sangana?’ Jadi iwenumo aku mombasono ira?”
14 Nangulimo Alatala ka i Musa, “Sangaku, AKU NARIA. c Iweꞌimo to masipato muuli ka tau to Israel: ‘To niuli AKU NARIA to nompakau aku mpaka ri jaꞌi komi.’ ”
15 Nanguli woꞌumo Alatala ka i Musa, “Ulimo ka tau to Israel iweꞌi: ‘I PUE to nisomba ntotuꞌa komi nggaolu Abraham, Ishak bo Yakub nompakau aku mpaka ri jaꞌi komi. Iꞌamo i PUE, etumo sangana sampe ri kasae-saena. Etumo sangana to rauli ntau sampe ri muli-muli ira.’
16 Kalaumo pasiromu puramo totuꞌa-totuꞌa nto Israel pade ulimo ka ira iweꞌi: ‘I PUE, Alatala ntotuꞌa komi, etumo Alatala Abraham, Ishak bo Yakub, nompopokita korona ka aku, pade niulina ka aku Iꞌa nanggita komi to Israel. Nikitana iwenu komi nipandasa ntau to Masir. 17 Pade nipakatantunamo manggeni komi mesuwu nggari kasusa katuwu komi ri Tana Masir malai mpaka ri tana to nakalumana bo naboya, etumo tana to nipetoꞌo tau to Kanaan, to Het, to Amori, to Feris, to Hewi bo to Yebus.’
18 Totuꞌa nto Israel etu kana mangepe tesamu. Naopu etu iko mosanggani-nggani ante totuꞌa-totuꞌa nto Israel kana malau mantingayo Magau Masir pade manguli ka iꞌa iweꞌi: ‘I PUE, Alatala nto Ibrani narata ri jaꞌi kami. Weꞌi-weꞌi palogamo kami malau mpaka ri karawa baina kira-kira tolumbengi kasaena ri jala ala manggeni pesomba ka i PUE Alatala kami.’ ”
19 Pade nanguli woꞌumo Alatala, “Ninjanikumo Magau Masir daꞌa mompaloga komi malai. Etu aga majadi ane iꞌa rapasuꞌu kuasa to nabete. 20 Jadi Aku kana mompopokita kuasaku ala mombasuku tau-tau to Masir ante mowia mpengaya-ngaya tandai to nipogumaa ri tatongo ira. Maopu etu pade Magau Masir kana mompaloga komi malai.
21 Aku kana mompakalulu rara tau to Masir ri jaꞌi komi sampe tempo komi mesuwu nggari Tana Masir, komi daꞌa malai ante pale ntoya. 22 Butu mbaꞌa besi nto Israel kana momperapi ka tau to Masir to nosinggamosu ante ira parewa bulawa bo salaka bo pakea-pakea. Popasuamo pakea etu ka ana-ana komi mboto. Ante pomperapimu iwetu komi kana mombaago anu nto Masir.”