Tesa pesuwu Musa
2
Tempo etu sambaꞌa langgai nggari muli i Lewi nomporongo sambaꞌa besi nggari muli i Lewi etu woꞌu. 2 Naopu etu natianamo besi etu pade nangote sambaꞌa ngana langgai. Sangga nanggita ngana nggedi etu nagaya mpuꞌu lenjena nitabuniakanamo tolumbula kasaena. 3 Tapi ngana nggedi etu daꞌa namala ratabuniaka mpakasae. Jadi indona lau nangala sangaya tonda nipowia nggari ntiko, nilampina ante aspal bo pulu ala daꞌa mamala rapesua nu ue. Naopu etu ngana nggedi etu nidulinamo riara tonda etu pade nikeninamo ri Binangga Nil nituꞌuna ri tatongo ntiko riara binangga etu. 4 Naopu etu tuaka besi nu ngana nggedi nenggore nggawao sakedi nggari ngana etu ala manggita nuapa majadi ante tuaꞌina etu.5 Tempo etu naratamo ana besi magau madota mandiu ri Binangga Nil. Besi-besi to nantuki iꞌa nenjayo-njayo ri wiwi binangga. Nikita nu ana besi magaumo tonda etu ri tatongo ntiko, jadi nipakauna sambaꞌa batuana malau mangala tonda etu. 6 Tempo poladu tonda etu nibukana nikitana naria sambaꞌa ngana nggedi riarana pade ngana etu nageo-geo. Naasimo matana nanggita ngana etu pade niulina, “Natantumo eꞌi sambaꞌa ana nto Ibrani.”
7 Sangga nanggita etu naratamo tuaka nu ngana nggedi etu ri jaꞌi ana besi magau nompekutana iꞌa, “Madota i Tua ane aku mangelo sambaꞌa totuꞌa besi nto Ibrani mompatomi ngana etu?”
8 Nesonomo ana magau, “Nabelo. Kau elomo.” Jadi nalaumo ngana besi etu nompokio indona mboto. 9 Sangga naratapa besi etu nangulimo ana besi magau ka iꞌa, “Keni komi ngana nggedi eꞌi, pade patomi komimo ka aku, damo aku mombawai gaji ka komi.” Jadi nikeninamo ngana etu pade nipatomina. 10 Sangga nabetepa ngana etu, iꞌa nikeni indonamo mpaka ri jaꞌi ana besi magau, pade iꞌa nipajadi nu ana besi magau ewa anana mboto. Nangulimo ana besi magau etu, “Iꞌa kana rapoposanga i Musa sabana iꞌa nialaku nggariara ue.” a
Musa nalai mpaka ri Tana Midian
11 Sangga nakabilasapa i Musa nalaumo iꞌa nanggita sampesuwu-sampesuwuna to Ibrani. Nikitana iwenu ira nipandasa ante pokarajaa ntomo. Nikitana woꞌu sambaꞌa to Masir nombaboba sambaꞌa to Ibrani. 12 Musa nanggita gusaꞌa guseꞌi, pade nikitana daꞌa ria tau nanggita iꞌa. Jadi nipatesinamo to Masir etu pade watabakuna nitabuniakana riara bone.
13 Naeo to nailena nalau woꞌumo i Musa pade nikitana rombaꞌa to Ibrani nosibaga. Jadi nipekutanana tau to nasala, “Nokuya iko nombaboba roamu?”
14 Nesonomo tau etu, “Isema nangonggotaka iko majadi topanggeniaka bo topotangara kami? Bara iko madota mompatesi aku woꞌu ewa iko nompatesi to Masir yowi?”
Nangepe etu naekamo rara i Musa, pade nipekirina, “Hama! Natantu powiaku etu ninjani ntaumo!”
15 Tempo Magau nto Masir nangepe nuapa to nipowia i Musa, nielona akala ala i Musa rapatesi. Tapi i Musa nangowa nalai nggari jaꞌi magau lau netoꞌo ri Tana Midian. Narata ri setu iꞌa nekatoko nangosaraka ri soso buwu. 16 Ri Tana Midian naria sambaꞌa topanggeni agama to nosanga ka Yitro.b Naria anana besi pitumbaꞌa. Tempo i Musa nekatoko namosu buwu etu naratamo pitumbaꞌa besi etu mombatombu ue ala mangisi petoꞌo panginu binata rapopainu ka towau bo bimba nu uma ira. 17 Tempo etu naratamo bara sakuya mbaꞌa topoewu langgai nompopalai ngana-ngana randoo etu. Tapi nalaumo i Musa nantulungi ira, pade nompopainu towau bo bimba ira.
18 Sangga nanjilipa randoo-randoo etu ri sapo, nekutanamo uma ira i Rehuel, “Nokuya komi nasalisa nanjili eo eꞌi?”
19 Nesonomo ira, “Naria sambaꞌa tau to Masir nantulungi kami tempo kami nipokarau topoewu-topoewu ntanina. Pade iꞌa woꞌu nombatombu ue ka kami pade nompopainu towau bo bimba kami.”
20 Nekutanamo Yitro ka ana-anana, “Ri umbamo tau etu weꞌi-weꞌi? Nokuya komi nompalasi iꞌa? Kalau pokiomo iꞌa momai manggoni mpasanggani ante kita!”
21 Musa nasituju netoꞌo mpasanggani-nggani ante Yitro. Naopu etu Yitro nompoporongo i Musa ante sambaꞌa anana besi to nosanga ka i Zipora. 22 Naliu etu i Zipora noanamo sambaꞌa ngana langgai, pade i Musa nompoposanga ngana etu i Gersom.c Niulina, “Aku eꞌi aga topesowo ri seꞌi.”
23 Nadea mpaemo kaliuna namatemo Magau ri Masir. Tapi tau to Israel to nipobatua nto Masir danandasa mpuꞌumo niepe ira. Ira nekakai nerapi tulungi ka Pue Alatala sabana ira nipobatua mpakandasa. 24 Pekakai ira etu niepe Alatalamo, pade nitorana pojanjina ka Abraham, Ishak bo Yakub. 25 Nikitana to Israel nipobatua pade nipariara ntaꞌinamo kasusa ira etu.