PALAI NTO ISRAEL NGGARI TANA MASIR
Todea Israel nipandasa ri Tana Masir
1
Yakub to nosanga ka woꞌu Israel, nalau mpaka ri Tana Masir ante ana-anana bo ira saongu njapo. Iweꞌimo sanga-sanga anana: 2 Ruben, i Simeon, i Lewi, Yehuda, 3 Isakhar, i Zebulon, i Benyamin, 4 i Dan, i Naftali, i Gad, Asyer. 5 Yusuf nokolu mamimo ri Tana Masir. Pura-pura muli Yakub etu kadeana pitumpulu mbaꞌana.6 Bara sakuya tempo kaliuna namatemo Yusuf bo sampesuwu-sampesuwuna bo pura-pura tau to nosintoꞌu ante iꞌa. 7 Tapi muli ira, tau to Israel, nomuli-muli nadea, pade kadea ira nantambai ntoto sampe Tana Masir naponumo nipetoꞌo ira.
8 Naliu etu nariamo sambaꞌa magau to nabouna nompamula momparenta Tana Masir to daꞌa nangginjani Yusuf. 9 Nangulimo Magau etu ka todeana, “Kitamo! Tau to Israel neliu nggadea bo neliu nggaroso pade kita pue ngata. 10 Ane rapana majadi posipatesi, ira bara mosaongu rara ante tau majadi balita mosimpatesi ante kita pade malai nggari tana eꞌi. Kana raelota jala ala tau to Israel etu neꞌe mana mantambai kadeana.”
11 Jadi tau to Masir nangonggotaka mandoro-mandoro moparenta bo mompandasa tau to Israel ante pokarajaa natomo. To Israel nipasuꞌu mombabangu ka magau ngata Pitom bo Raamses, ngata rapomboli mbara-mbara bo panggoni. 12 Tapi tau to Israel etu nantambai nipandasa nantambai woꞌu ira nomuli sampe nadea mpuꞌu. Ira nakamburaka ri tana etu sampe naekamo tau to Masir nanggita ira. 13 Jadi nasoa mpuꞌu tau to Masir nompandasa to Israel, 14 pade nompakakaja katuwu ira ante pokarajaa natomo. Daꞌa ria asi mata ira nompandasa to Israel mokarajaa ntomo mowia batu bata nggari tana pulu bo mpengaya-ngaya pokarajaa ri tana.
15 Naopu etu notesamo Magau nto Masir ka sando to nantulungi besi-besi to Ibrania moana to nosanga ka i Sifra bo i Pua. 16 Niulina, “Tempo komi mantulungi besi-besi to Ibrani moana pariara ntanimo ngana to mesuwu. Ane ngana langgai mesuwu, patesimo iꞌa! Tapi ane ngana besi mesuwu palambamo iꞌa matuwu!” 17 Tapi rombaꞌa sando etu naeka ka Alatala. Ira daꞌa nantuki parenta Magau. Nipalamba iramo pura-pura ngana langgai natuwu. 18 Jadi ira rombaꞌa nipokio Magau nto Masir woꞌumo pade nipekutanana iweꞌi: “Nokuya tanu komi? Nokuya komi nompalamba ngana-ngana langgai natuwu?”
19 Nesonomo ira, “Besi-besi to Ibrani daꞌa nasimbayu ewa besi-besi Masir. Ira nadisi mpuꞌu noana. Daꞌapa sando narata nesuwumo ana ira.” 20-21 Naopu etu Alatala nombagane sando-sando etu pade nombawai ka ira pompakule moana sabana ira naeka ri jaꞌina. Pade to Israel nantambai eona nantambai kadeana bo nantambai karosona.
22 Jadipa Magau nto Masir nombawai parenta ka todeana iweꞌi: “Pura-pura ngana langgai nto Ibrani to lako nesuwu kana ratajiaka riara Binangga Nil. Tapi ane ngana besi, palambamo ira matuwu!”