PALAI NTO ISRAEL NGGARI TANA MASIR
Tesa nompakanoto isi buku
Nantuki tau-tau to Israel bo topomparasaya i Pue Yesus pamulana bo i Pue Yesus mboto topotulisi buku eꞌi nabi Musa, sabana iꞌa nireke topotulisi alima buku pamulana riara Buku Nagasa Pojanji Nggasae.
Sanga buku eꞌi niala nggari kajadia to napokona to nitesa riarana, etumo palai nto Israel nggari Tana Masir, petoꞌo ira nipobatua labi patatu mpae kasaena. Riara buku eꞌi naria tolubagia to nabetena:
1. To Israel nikabasaka nggari pobatua ri Tana Masir pade nalai mpaka ri Bulu Sinai (1:1-18:27)
2. Pojanji Alatala ante todeana to nipowiana ri Bulu Sinai (19:1-24:18)
3. Tenda Mpepue ante parewa-parewana nipowia (25:1-40:38)
Buku eꞌi nantesa powia Alatala nanggabasaka todeana nggari Tana Masir, pokaingguna, parenta-parenta bo atura-aturana, pade akala mepue ka Iꞌa to nipakatantu ka to Israel. Riara buku eꞌi nipakatantu woꞌu pojanji Alatala ante manusia to niurusi nabi Musa, pade nitesa pompamulana Agama Yahudi ante topanggeni-topanggenina bo Tenda Mpepue ka i PUE.
Isi buku to napokona iweꞌi:
1. To Israel nikabasaka nggari Tana Masir (1:1-15:21)
-To Israel nipobatua ri Tana Masir (1:1-22)
-Tesa pesuwu i Musa pade katuwuna sampe ri Tana Midian (2:1-4:31)
-Musa bo Harun nantingayo Magau Masir (5:1-11:10)
-Eo Paska pamulana bo palai nto Israel nggari Tana Masir (12:1-15:21)
2. Polumako nto Israel nggari Tasi Lei mpaka ri Bulu Sinai (15:22-18:27)
3. Parenta-parenta Alatala bo pojanjina ante to Israel (19:1-24:18)
4. Tenda Mpepue bo parewa-parewa mpepue nipowia (25:1-40:38)