50
Pade notinggadunggamo Yusuf ri bambara umana, pade nitangina umana bo niekina. 2 Naopu etu niparentana tau-tau topande mombarampa watabaku Yakub ala neꞌe mapopo. 3 Pokarajaa etu patampulu mbengi kasaena sabana etumo tempo to nabiasa mamimo mombarampa watabaku ntomate. Naopu etu to Masir nantangi Yakub pitumpulu mbengi kasaena.4 Sangga naliumo tempo nantangi nangulimo Yusuf ka pangga bete magau, “Ane aku nipotowe komi tulungi ulimo ka magau tesaku eꞌi: 5 ‘Tempo umaku daꞌa mana masae mamate, nipakauna aku mojanji ka iꞌa aku kana manggeni watabakuna mpaka ri dayo to nipakasadiana mamimo ri Tana Kanaan. Etu sabana aku merapi loga ri jaꞌi magau ala aku mamala malau mombatana umaku. Maopu etu pade aku manjili.’ ”
6 Nangepe pomperapi Yusuf etu nangulimo magau ka iꞌa, “Kalaumo iko mombatana umamu nantuki pojanjimu ka iꞌa.”
7 Jadi nalaimo Yusuf mpaka ri Tana Kanaan mombatana umana. Pura-pura pangga bete magau, pura-pura totuꞌa ri sapo magau bo pura-pura totuꞌa Tana Masir nalau mpasanggani-nggani ante Yusuf. 8 Pade ira saongu njapo Yusuf ante sampesuwu sararana bo ananjapo Yakub nalau puramo. Aga damo ngana-ngana nggedi bo pompatuwu ira pura-pura niboli ri Bagia Gosyen. 9 Pade tantara nokareta bo tantara nesawi jara nantuki woꞌu sampe ira najadi salunu bete.
10 Nalaumo ira sampe narata ri petoꞌo pomporo gando namosu ngata Goren-Haatad ri sabingga kamataeona Binangga Yordan. Ri setu ira nageo ante nasusa rara nantangi Yakub ante suara namangga mpuꞌu. Pade ri setu woꞌu Yusuf nanggawia ada ntomate pitu eo kasaena ala mantora umana. 11 Tempo pue ngata Tana Kanaan ri setu nanggita Yusuf ante roa-roana nageo nantangi ri petoꞌo pomporo gando ri ngata Goren-Haatad nangulimo ira, “Nasusa mpuꞌu rara to Masir nantangi tomate ri setu.” Etu sampe petoꞌo etu nipoposanga ntau “Abel-Mizraim.”a
12 Jadi iwetumo ana-ana Yakub nanggawia nuapa to nitewaina ka ira. 13 Watabakuna nikeni ira mpaka ri Tana Kanaan pade nitana ira ri bololia Makhpela ri sabingga kamataeona Mamre ri pampa to nioli Abraham nggari jaꞌi Efron tau to Het majadi dayo. 14 Sangga naopupa nombatana umana nanjilimo Yusuf mpaka ri Tana Masir nosanggani-nggani ante sampesuwuna bo pura-pura tau ntanina to nantuki iꞌa nombatana umana.
Yusuf nompakasana rara ntuakana
15 Sangga namatepa Yakub nangulimo tuaka-tuaka Yusuf sambaꞌa bo sambaꞌa, “Iwenumo kita eꞌi ane Yusuf nomboli rau rarana ri jaꞌita? Neꞌe-neꞌe iꞌa mombabalasi kajaꞌata ri jaꞌina nokolu!” 16 Sabana etu ira nompakau sambaꞌa tau malau ri jaꞌi Yusuf nanggeni tewai ira iweꞌi: “Daꞌapa umata namate 17 iꞌa nompakau kami manguli ka komi iweꞌi: ‘Ampungimo sala bo silaka tuaka-tuakamu to nipowia ira ri jaꞌimu tempo ira nompakajaꞌa komi nokolu.’ Jadi weꞌi-weꞌi kami merapi ka komi, ampungimo sala to nipowia kami batua nu Alatala to nisomba umamu.” Sangga nangepe tewai ntuaka-tuakana etu nageomo Yusuf.
18 Naopu etu naratamo sampesuwu-sampesuwuna mboto ri jaꞌina. Nekadedemo ira sampe ri tana pade nanguli, “Kami eꞌi batuamu, i Tua.”
19 Tapi nangulimo Yusuf ka ira, “Neꞌe maeka, sabana aku eꞌi daꞌa Alatala! 20 Komi nosaongu rara nompowia to najaꞌana ri jaꞌiku nokolu. Tapi Alatala nombabali to najaꞌana etu najadi to neliu nggabelona, ala nggari to najadi nokolu etu nadea tau to natuwu weꞌi-weꞌi namala nipakasalama. 21 Jadi neꞌe maeka! Akumo to mombatanggu panggoni komi ntaliana.” Iwetumo Yusuf nompakasana rara tuaka-tuakana ante motesa ka ira.
Tesa kamate Yusuf
22 Yusuf naroo netoꞌo ri Tana Masir ante sampesuwu-sampesuwuna. Iꞌa natuwu sampe umuruna nagana satu sampulu mpaena. 23 Jadi nakapomo iꞌa nanggita makumpu nu anana Efraim. Nakapo woꞌu iꞌa nanggita ana-ana i Makhir, etumo makumpu i Manasye. Pade ira nirekena ewa anana mboto.
24 Pade nangulimo Yusuf ka sampesuwu-sampesuwuna, “Aku eꞌi daꞌa mana masae mamate. Tapi natantumo Alatala kana mantulungi komi pade manggeni komi mesuwu nggari Tana Masir eꞌi malau mpaka ri tana to nijanjina ante nojanji ka totuꞌata Abraham, Ishak bo Yakub.” 25 Naopu etu nipakau Yusuf ka sampesuwu-sampesuwuna iweꞌi: “Natantumo Alatala kana mantulungi komi mesuwu nggari tana eꞌi. Jadi pojanjimo ri jaꞌiku tempo etu majadi komi kana manggeni woꞌu wuku-wukuku nggari Tana Masir eꞌi.” Pade nojanjimo ira.
26 Daꞌa nasae kaliuna namatemo Yusuf. Tempo etu umuruna nagana satu sampulu mpaemo. Pade watabakuna nirampa-rampa ala neꞌe mapopo pade niboli riara peti ntomate ri Tana Masir etu.