Pantesa Yakub kaopuna ka ana-anana
49
Naopu etu Yakub nompokio puramo ana-anana pade nanguli, “Kamai puramo komi masiromu ri seꞌi ala kutesa ka komi puramo nuapa to majadi ri jaꞌi komi njeona.2 Pompasiromu puramo komi ana Yakub, epe komi puramo nuapa to ratesa umamu Israel.
3 Ruben, anaku ulumbua, ikomo tandai karosoku, pamulana nggari karosoku.
Iko to neliu nibila bo neliu kuasamu ri tatongo anaku pura-pura.
4 Tapi nasumpu raramu ewa ue to nagampa mojompe, sampe iko mana majadi to neliu nibila. Sabana iko nosampaturu ante rongo piaraku, iko nompakatantoru paturu umamu.a
5 Simeon bo i Lewi naria kasimbayu inggu ira. Ira nompokono mompandasa tau ante guma ira. b
6 Aku daꞌa madota mantuki sintuwu ira, pade aku daꞌa woꞌu mosaongu tesa ante ira. Sabana ira nompatesi tau ante narau rara, pade nompakapunggu kada japi majadi kadamba rara.
7 Nasurukawamo ira sabana karau rara ira! Nasurukawamo ira sabana kasoa ira!
Aku kana mompoposimpotatare muli ira ri tatongo muli Yakub, pade mombakamburaka ira ri tatongo njumaongu to Israel.
8 Yehuda,c iko kana ratoiya sampesuwu-sampesuwumu.
Iko mombadagi balimu pade pura-pura sampesuwumu kana mekadede ri ngayomu.
9 Anaku, iko nasimbayu ewa ana singa to nompatesi sokona pade nanjili ri petoꞌona.
Iko nasimbayu ewa singa to noluku pade naturu. Daꞌa ria to nabia mompopembangu iꞌa.
10 Muli Yehuda daꞌa menonto-nonto moparenta sampe karata mulina to masipato moparenta sampe ri kasae-saena.d
Pade pura-pura manusia ri dunia kana mekou ri jaꞌina.
11 Tempo etu mabelo puramo katuwu ntau. Mabete mpuꞌu asele ntana sampe walaa anggur mamala rapake rapotataka keledai ante anana.
Madea mpuꞌu asele nu anggur sampe ue anggur mamala rapake mantapasi baju!
12 Malei matana sabana kadea nu ue anggur, bo maputi ngisina sabana kadea nu susu!
13 Muli i Zebulon kana metoꞌo ri wiwi ntasi.
Sakaya bete kana masampo ri talinti petoꞌo ira etu.
Pantaꞌa bagia ira sampe ri ngata Sidon.
14 Isakhar ewa keledai to naroso wukuna noluku ante pangulayana.
15 Tempo iꞌa manggita kabelona petoꞌo pangosarakana bo kagaya nu ngata etu iꞌa kana mokarajaa ntomo.
Masadiamo iꞌa rapasuꞌu mokarajaa ewa batua.
16 Dane kana mombatangara todeana nasimbayu ewa todea nu muli Israel ntanina.
17 Iꞌa masimbayu ewa ule ri wiwi jala, ule to nabisa ri wiwi jala,
anu sampenjani nombateꞌo kada jara sampe natetajiaka topesawina.”
18 Pade niuli Yakub woꞌumo, “O PUE, aku mantongoraka sampe Komi mompakasalama aku eꞌi!
19 Gad kana rabaga topeago, tapi iꞌa megoli mombabaga ira.
20 Asyer mabelo mpuꞌu asele ntanana. Iꞌa kana mompakasadia panggoni ka magau-magau.
21 Naftali nasimbayu ewa rusa tinana natikabasaka nggari posoꞌona.
Iꞌa kana moana ka ngana-ngana to magayana.
22 Yusuf nasimbayu ewa kayu to naboyana to natuwu namosu mata ue.
Rangga-ranggana kana mendai sampe mombaliunaka tembo to nalanga.
23 Topopana kana mompandasa iꞌa pade mombapana iꞌa.
24 Tapi iꞌa batena maroso, sabana Alatala to Neliu Nggakuasa mantulungi iꞌa,
etumo Alatala Yakub, Topoewu to Narosona to nanggalendu to Israel.
25 Alatala to nisomba umamu kana mantulungi iko.
Alatala to Neliu Nggakuasa mombagane iko ante uja nggari langi bo ue nggari tambe nu dunia.
Iꞌa mompakadea ana-anamu bo pompatuwumu.
26 Rasi nggari jaꞌi Alatala to nisomba umamu meliu nggadea nggari kakalumana to nikae nggari bulu-bulu nggasae,
etumo pura-pura to nabelona to nasaemo naria ri bagia buluna.
Perapi rasi-rasi etu manaꞌu ri jaꞌi Yusuf. Iꞌamo to neliu nibila nggari pura-pura sampesuwuna.
27 Benyamin nasoa mpuꞌu nompatesi balina nasimbayu ewa asulako.
Dabobayana iꞌa nanjoko panggonina, pade nggawengina iꞌa nombatibo-tibo sokona etu.”
28 Iwetu puramo pantesa kaopuna Yakub ka anana sampulu rombaꞌa. Butu-butu mbaꞌa niganena ante tesa to masipato ka ira sambaꞌa bo sambaꞌa.
Yakub namate pade nitana
29-30 Naopu etu Yakub nantewai ana-anana iweꞌi: “Daꞌa mana masaeka aku eꞌi kana mamate. Ane etu majadi tanamo aku ri sinjori totuꞌaku ri bololia Makhpela ri sabingga kamataeona ngata Mamre ri Tana Kanaan. Etumo bololia bo pampana to nioli pueku Abraham nggari Efron to Het majadi petoꞌo rapodayo. 31 Ri setumo Abraham bo rongona i Sara, Ishak bo rongona i Ribka nitana. Pade ri setu woꞌumo nitanaku i Lea. 32 Pampa bo bololia to naria ri setu nioli nggari jaꞌi ntau to Het.” 33 Naopu Yakub nombatewai ana-anana iwetu, naturumo iꞌa pade nalaimo nosana.