Yakub nombagane Efraim bo Manasye
48
Bara sakuya tempo kaliuna naratamo tau nanguli ka Yusuf, “Najuꞌa ntomomo uma komi.” Nangepe tesa etu Yusuf nanggeni anana rombaꞌa i Manasye bo Efraim, pade nalaumo ira nantalioda Yakub. 2 Tempo naria tau nanguli ka Yakub naratamo anana Yusuf, iꞌa nompasimbuku nombarii korona pade nembangu nekatoko ri bunggu paturuna. 3 Nangulimo Yakub ka Yusuf, “Alatala to Neliu Nggakuasa nompopokita korona ka aku ri ngata Lusa ri Tana Kanaan, pade ri setu Iꞌa nombagane aku. 4 Niulina ka aku, ‘Aku kana mombawai ka iko ana bo makumpu madea-dea ala ira momuli madea majadi kasiromu ngata-ngata. Aku woꞌu mombawai tana eꞌi ka muli-mulimu majadi tana ira sampe ri kasae-saena.’5 Yusuf, rombaꞌa anamu to nesuwu ri Tana Masir daꞌapa aku nomai ri seꞌi kana kureke anaku mboto. Ira Efraim bo i Manasye kana kureke nasimbayu ewa i Ruben bo i Simeon. 6 Ane iko damoanapa, anamu etu daꞌa mana kureke ewa anaku mboto, tapi ngana etu rareke anamu mboto. Jadi ane ira mombarata kakalumana banepia, damo Efraim bo Manasye mombabagi ka ira. 7 Etu nipowiaku mombatora indomu i Rahel. Tempo kami ri polumako nanjili nggari Tana Padan aku nirata nu kasusa rara ante kamate nu indomu ri Tana Kanaan namosu ngata Efrata. Pade aku nombatana iꞌa ri setu, dayona ri wiwi jala mpaka ri Efrata.” (Weꞌi-weꞌi Efrata niuli Betlehem.)
8 Tempo Yakub nanggita ana-ana Yusuf nipekutanana, “Isema pura ngana-ngana eꞌi?”
9 Nesonomo Yusuf, “Eꞌimo ana-anaku to niwai Alatala ka aku ri Tana Masir eꞌi.”
Pade nangulimo Yakub ka Yusuf, “Pakamosumo ira ri seꞌi ala aku mamala mombagane ira.” 10 Niuli Yakub iwetu sabana mana nanoto matana nekita. Nagawumo matana sabana natuꞌamo iꞌa. Jadi Yusuf nanggeni ana-anana namosu ante Yakub pade Yakub nanggalipui bo nombaeki ngana-ngana etu. 11 Pade nangulimo Yakub ka Yusuf, “Bopia daꞌa ntoto nisarumakaku aku mosirata ante iko, tapi weꞌi-weꞌi Alatala nompaloga aku nanggita ana-anamu!”
12 Naliu etu Yusuf nangala ana-anana nggari timpu Yakub pade iꞌa mboto nekadede sampe ri tana ri ngayo umana. 13 Naopu etu nikenina ana-anana rombaꞌa etu namosu umana, Efraim totuaꞌi ri sabingga njidi Yakub bo i Manasye ri sabingga ngganana sabana iꞌa totuaka. 14 Tapi Yakub nombatuꞌu pale ngganana ri balengga Efraim naupa iꞌa totuaꞌi, pade pale njidi Yakub nituꞌuna ri balengga i Manasye naupa iꞌa ana ulumbua. 15 Pade niganena Yusuf ntalianana. Niulina,
“Alatala, Iꞌamo to nisomba pueku Abraham bo umaku Ishak,
pade Iꞌamo topoewu to nombanini aku sampe weꞌi-weꞌi.
16 Iꞌamo malaeka to nombakabasaka aku nggari pura-pura kajaꞌana.
Perapi Iꞌa mombagane ngana-ngana eꞌi.
Perapi sangaku bo sanga pueku Abraham bo sanga umaku Ishak matolele ri dunia sabana ngana-ngana eꞌi.
Perapi ira momuli mpakadea-dea riara dunia eꞌi.”
17 Tempo Yusuf nanggita umana nantuꞌu pale ngganana ri balengga Efraim daꞌa nadamba rarana. Jadi nisokona pale nggana nu umana madota ralinjana nggari balengga Efraim mpaka ri balengga i Manasye. 18 Niulina ka umana, “Neꞌe iwetu, Yuma. Manasyemo anaku ulumbua. Tuꞌumo pale nggana komi ri balenggana.”
19 Tapi Yakub nompoara pomperapi Yusuf. Niulina, “Ninjaniku, anaku, ninjaniku. Manasye woꞌu mabete kuasana, pade iꞌa woꞌu madea mulina riara dunia. Tapi Efraimpa meliu nggakuasa nggari jaꞌi ntuakana pade mulina kana majadi todea bara sakuya ngata bete.” 20 Pade niganena woꞌumo ira tempo etu. Niulina,
“Tau to Israel kana manguli sangamu ane ira mombagane tau.
Ira kana manguli iweꞌi: ‘Perapi Pue Alatala mompowia iko ewa Efraim bo Manasye!’ ”
Iwetumo Yakub nompopokolu Efraim nggari Manasye.
21 Naopu etu nangulimo Yakub ka Yusuf, “Aku eꞌi daꞌa mana masae mamate. Tapi Alatala kana mosanggani-nggani ante komi pura-pura, pade Iꞌa kana manggeni komi manjili mpaka ri tana to nipetoꞌo totuꞌa komi. 22 Aga ka iko kana kuwai meliu nggari jaꞌi sampesuwumu, etumo ngata Sikhemb to niagoku nggari jaꞌi ntau to Amori ante guma bo panaku.”