Yakub nosirata ka Magau Masir
47
1-2 Naopu etu Yusuf nanggeni limambaꞌa sampesuwuna lau mantingayo magau. Narata ri setu nangulimo Yusuf ka magau, “Naratamo umaku bo sampesuwu-sampesuwuku nggari Tana Kanaan nosanggani-nggani ante towau, bimba, bo japi ira bo pura-pura mbara-mbara ira. Weꞌi-weꞌi nariamo ira ri Bagia Gosyen.”3 Pade nekutanamo magau ka sampesuwu-sampesuwu Yusuf, “Nuapa pokarajaa komi?”
Nesonomo ira, “Kami topoewu, nasimbayu ewa totuꞌa kami nggaolu.” 4 Pade nitambai ira, “Kami nomai netoꞌo ri tana eꞌi sampalai, sabana ri Tana Kanaan nandasa mpuꞌu kamateoro sampe daꞌa mana mpuꞌu naria kawoko rakoni towau, bimba bo japi kami. Kami merapi ka magau, palogamo kami metoꞌo ri Bagia Gosyen.”
5 Naopu etu nangulimo magau ka Yusuf, “Weꞌi-weꞌi naratamo umamu bo sampesuwumu ri jaꞌimu ri seꞌi. 6 Tana eꞌi namala rapetoꞌo ira. Palogamo ira metoꞌo ri Bagia Gosyen, bagia to neliu nggabelo ri Tana Masir eꞌi. Pade ane munjani tau nggari tatongo ira to nataꞌuna, pajadimo ira topoewu pompatuwuku.”
7 Pade Yusuf woꞌu nanggeni umana ri jaꞌi magau. Narata ri setu Yakub nombagane magau. 8 Pade nekutanamo magau ka Yakub, “Sakuya mpaemo umuru komi, Uma?”
9 Nesonomo Yakub, “Magau, umuruku eꞌi satu tolumpulu mpaemo. Aku aga nolinja-linja ri dunia eꞌi, daꞌa naroo petoꞌoku. Riara nggatuwuku nadea kasusa bo kapari. Umuruku daꞌa sampe umuru totuꞌaku nggaolu.” 10 Naopu etu sangganipa Yakub nombagane magau, pade nopasabi nalaimo iꞌa.
11 Jadi Yusuf nompakatantu ka umana bo sampesuwu-sampesuwuna bagia rapetoꞌo ira ri Tana Masir. Niwaina ka ira tana ri bagia to neliu nggabelo, etumo Bagia Gosyena ewa to niparenta magau ka iꞌa. 12 Pade nipakasadiana panggoni ka umana bo sampesuwuna bo ira saongu njapo nantuki kadea nu ana-ana ira.
Powia Yusuf tempo kamateoro
13 Nantambaimo kajaꞌa nu kamateoro etu ri umba-umba ngata sampe daꞌa mana ntoto naria panggoni. Pura-pura tau ri Tana Masir bo Tana Kanaan nalentemo pade daꞌa mana naroso sabana kamateoro etu. 14 Jadi ira nalau nangoli gando nggari jaꞌi Yusuf. Pade pura-pura doi oli gando etu nggari tau-tau to Masir bo tau-tau to Kanaan nipasiromu Yusuf pade nibolina riara sapo magau.
15 Sangga naopu puramo doi todea ri Tana Masir bo Tana Kanaan, naratamo to Masir ri jaꞌi Yusuf pade nanguli, “Wai ka kami panggoni. Nuapa gunana ane kami mamateoro ri ngayo i Tua. Mana ria doi kami.”
16 Nesonomo Yusuf, “Ane mana ria doi komi, kita mosinjula. Waimo pompatuwu komi ka aku, pade aku mombawai panggoni ka komi.” 17 Jadi todea etu nanggeni pompatuwu ira ri jaꞌi Yusuf. Pade Yusuf nombawai panggoni ka ira raposinjula ante jara, towau, bimba, japi bo keledai ira. Mpae etu Yusuf nombawai panggoni ka ira pade ira nombabayari oli panggoni etu ante pura-pura pompatuwu ira.
18 Naopu mpae etu narata woꞌumo todea ri jaꞌi Yusuf pade nanguli, “Tua, daꞌa namala ratabuniaka nggari jaꞌi Tua, naopumo doi kami, pade pompatuwu kami pura-pura niwai ka komi. Mana ria nuapa-nuapa ri jaꞌi kami to mamala rawai ka komi, aga koro kami mboto bo tana kami. 19 Neꞌe rapalamba kami mamate ri ngayo i Tua! Neꞌe rapalamba tana kami majadi karawa baina. Oli komimo kami eꞌi ante tana kami, pade waimo panggoni ka kami. Kami eꞌi bo tana kami majadi magau puena. Wai ka kamimo gando mompakapola katuwu kami bo sawua ala tana kami neꞌe majadi karawa baina.”
20 Jadi nioli Yusuf puramo tana ri Masir majadi magau puena. Pura-pura to Masir nompobalu tana ira rapangoli panggoni sabana najaꞌa mpuꞌumo kamateoro. Jadi pura-pura tana ri Masir najadi magau puramo puena. 21 Pade pura-pura tau ri njumaongu Tana Masir najadi batua magau. 22 Aga damo tana topanggeni agama Masir daꞌa nioli Yusuf, sabana ira pura-pura niwai magau petulungi to nagana rakoni ira. Jadi etu sampe tana ira daꞌa nipobalu.
23 Tempo Yusuf nangoli tana ntodea ri Masir nangulimo iꞌa ka ira, “Eo eꞌi komi ante tana komi niolikumo ka magau. Jadi eꞌimo gando to mamala ratuja komi ri tana etu. 24 Tempo komi mokato, kana rawai ka magau sabagia nggari lima bagia nggari asele ntana etu. Patabagia ntanina etu mamala rapake komi majadi sawua pade rakoni komi saongu njapo.”
25 Nesonomo todea, “Komi nompakasalama kami eꞌi. Perapi kami mukonoa rara. Kami madota majadi batua nu magau.” 26 Jadi Yusuf nompakatantu saongu atura to nalaku ri njumaongu Tana Masir sampe eo eꞌi iweꞌi: Nggari pura-pura asele ntana to nirata todea sabagia nggari lima bagia kana rawai ka magau. Aga tana ntopanggeni agama Masir daꞌa najadi tana magau.
Pomperapi Yakub kaopuna
27 Iwetumo tau-tau to Israel netoꞌo ri Tana Masir ri Bagia Gosyen. Ri setu ira najadi nakalumana pade nomuli mpakadea sampe nantambai kadea ira.
28 Yakub danatuwu sampulu pitumpaepa ri Tana Masir sampe umuruna nagana satu patampulu bo pitumpae. 29 Tempona Yakub daꞌa mana masae mamate, nipokionamo anana Yusuf pade niulina ka iꞌa, “Ane iko nompotowe aku, tuꞌumo palemu ri olo ntimpuku eꞌi,b pade pojanjimo ka aku iko kana matutu mowia to nabelona ane aku mamate. Neꞌe mombatana aku ri Tana Masir eꞌi. 30 Tapi ane aku mamate kenimo watabakuku nggari seꞌi pade tanamo aku riara dayo mosanggani-nggani ante totuꞌaku.”
Nesonomo Yusuf, “Aku kana mantuki nuapa to niuli komi, Uma.”
31 Pade nanguli woꞌumo Yakub, “Pojanjimo ka aku!”
Jadi nojanjimo Yusuf ka iꞌa. Naopu etu notimbakotumo Yakub ri paturuna pade nosukuru ka Alatala.