Yakub saongu njapo nolinja mpaka ri Tana Masir
46
Jadi nalaumo Yakuba nosanggani-nggani ante mpengele-ngele to naria ri jaꞌina. Tempo iꞌa narata ri ngata Bersyeba nisambalena binata nipesombana ka Alatala to nisomba umana Ishak. 2 Tempo nggawengina Alatala notesa ka Yakub riara mpangipina. Niulina, “Yakub! Yakub!”Nesonomo Yakub, “Iyo, Pue!”
3 Nangulimo Alatala, “Aku eꞌimo Alatala, etumo Alatala to nisomba umamu. Neꞌe iko maeka malau mpaka ri Tana Masir. Aku kana mompakadea mulimu ri setu. 4 Aku mboto momporoa iko malau mpaka ri Tana Masir, pade natantumo Aku kana manggeni mulimu manjili mpaka ri tana eꞌi. Pade Yusuf mboto kana maria ri sinjorimu ane maratamo janjimu.”
5 Jadi nalaimo Yakub nggari ngata Bersyeba. Ana-anana nompopesawi uma ira nosanggani-nggani ante ana-ana bo rongo-rongo ira riara kareta-kareta to nipakatu magau Masir. 6 Ira woꞌu nanggeni pompatuwu ira pade mbara-mbara to nirata ira ri Tana Kanaan, pade nalaimo ira mpaka ri Tana Masir. 7 Yakub nanggeni pura-pura anana bo makumpuna, besi bo langgai, etumo pura-pura mulina.
8 Iweꞌimo sanga-sanga nto Israel to nolinja mpaka ri Tana Masir, etumo Yakub ante muli-mulina:
Ruben, anana ulumbua.
9 Ana-ana i Ruben, etumo:
Henokh, i Palu, i Hezron bo i Karmi.
10 Simeon ante ana-anana, etumo:
Yemuel, Yamin, Ohad, Yakhin, i Zohar bo i Saul, ana nggari rongona to Kanaan.
11 Lewi ante ana-anana, etumo:
Gerson, i Kehat bo i Merari.
12 Yehuda ante ana-anana, etumo:
Syela, i Peres bo i Zerah. Ana Yehuda ntanina Er bo Onan namate ri Tana Kanaan.
Ana-ana i Peres: i Hezron bo i Hamul.
13 Isakhar ante ana-anana, etumo:
Tola, i Pua, Ayub bo i Simron.
14 Zebulon ante ana-anana, etumo:
Sered, Elon bo Yahleel.
15 Ira etu ana-ana Yakub to nipoana i Lea ri Tana Padan-Aram. Pade naria woꞌu anana besi to nosanga ka i Dina. Jadi pura-pura muli Yakub nggari rongona i Lea, langgai bo besi, tolumpulu bo tolumbaꞌa kadeana.
16 Naria woꞌu i Gad ante ana-anana, etumo:
Zifyon, i Hagi, i Syuni, Ezbon, Eri, Arodi bo Areli.
17 Asyer ante ana-anana, etumo:
Yimna, Yiswa, Yiswi bo i Beria.
Sampesuwu besi ira nosanga ka i Serah.
Ana-ana i Beria, etumo: i Heber bo i Malkiel.
18 Ira etu muli i Yakub nggari i Zilpa, batua besi to niwai i Laban ka anana besi i Lea, sampulu onombaꞌa kadeana.
19 Ana-ana i Rahel, rongo Yakub, etumo:
Yusuf bo i Benyamin.
20 Ri Tana Masir Yusuf noana ka rombaꞌa ngana langgai, etumo i Manasye bo Efraim to nipoana rongona Asnat ana i Potifera topanggeniaka agama ri ngata On.
21 Benyamin ante ana-anana, etumo:
Bela, i Bekher, Asybel, i Gera, i Naaman, Ehi, i Rosh, i Mupim, i Hupim bo Ared.
22 Ira etu muli Yakub nggari rongona i Rahel, sampulu patambaꞌa kadeana.
23 Naria woꞌu i Dan ante anana i Husim.
24 Naftali ante ana-anana, etumo:
Yahzeel, i Guni, Yezer bo i Syilem.
25 Ira etu muli Yakub nggari i Bilha, batua besi to niwai i Laban ka anana i Rahel, pitumbaꞌa kadeana.
26 Muli Yakub to nalau mpaka ri Tana Masir onompulu bo onombaꞌa kadeana. Daꞌa nireke mania-maniana. 27 Ana-ana Yusuf to nipoana ri Tana Masir rombaꞌa. Jadi ira nosanggani ante Yakub saongu njapo to narata ri Tana Masir pitumpulu mbaꞌa kadeana.
Yakub saongu njapo ri Tana Masir
28 Yakub nompakau Yehuda molumako mokolu ala manguli ka Yusuf mantomunaka umana ri Bagia Gosyen ane ira marata ri setu. Tempo naratamo ira ri Gosyen 29 Yusuf nompakasadia dokana pade nalau mosirata ka umana. Tempo nosirata ante umana Yusuf nanggalipui iꞌa pade nasae mpuꞌu nageo. 30 Pade nangulimo Yakub ka iꞌa, “Weꞌi-weꞌi nasadiamo aku mamate, sabana nikitaku ante mataku mboto pade ninjanikumo iko mpuꞌu-mpuꞌu danatuwu!”
31 Pade nangulimo Yusuf ka sampesuwu-sampesuwuna bo ira Yakub saongu njapo, “Aku kana malau mpaka ri jaꞌi Magau Masir manguli ka iꞌa sampesuwu-sampesuwuku bo umaku saongu njapo to netoꞌo ri Tana Kanaan naratamo ri jaꞌiku. 32 Aku kana manguli ka iꞌa komi pura-pura topoewu to nabiasa nompiara binata. Pade kuuli ka iꞌa woꞌu komi nanggeni pura-pura pompatuwu bo mbara-mbara komi. 33 Ane komi rapokio mantingayo magau ngina, pade iꞌa mompekutana nuapa pokarajaa komi, 34 ulimo ka iꞌa iweꞌi: ‘Kami eꞌi topompiara towau, bimba bo japi nggari kakedi kami sampe weꞌi-weꞌi nasimbayu ewa totuꞌa kami nggaolu.’ Ane iwetu pesono komi iꞌa kana mompaloga komi metoꞌo ri Bagia Gosyen.” Yusuf nanguli iwetu sabana nagigi rara tau to Masir mosigalo ka topoewu.