Yusuf nompopanjani korona ka sampesuwu-sampesuwuna
45
Nangepe etu mana nipakule Yusuf nantaꞌamaka rarana ri ngayo batua-batuana to naria ri setu. Jadi nongaremo iꞌa ka ira, “Pesuwu puramo komi nggari ri seꞌi!” Jadi daꞌa ria to Masir nosanggani-nggani ante Yusuf tempo iꞌa nompopanjani korona ka sampesuwu-sampesuwuna. 2 Nageomo Yusuf nakanjodu-njodu sampe niepe pura-pura tau to Masir ri sawaliku tombi etu, pade kareba etu natolele sampe ri sapo magau.3 Pade nangulimo Yusuf ka sampesuwu-sampesuwuna, “Aku eꞌimo Yusuf! Danatuwupa umaku?” Nangepe etu daꞌa ntoto nenjuꞌi ira sabana naeka mpuꞌumo rara ira. 4 Nanguli woꞌumo Yusuf ka ira, “Kamaimo komi pakamosumo aku ri seꞌi.” Nalau mpuꞌumo ira nompakamosu iꞌa. Pade nanguli woꞌumo Yusuf, “Aku eꞌimo sampesuwumu Yusuf, to nipobalu komi pade nikeni mpaka ri Tana Masir. 5 Tapi neꞌe mana masusa rara bara manjoso rara sabana komi nompobalu aku. Kakonona Alatala mboto nanggeni aku mpaka ri seꞌi mokolu ala mompakasalama tau dea. 6 Sabana kamateoro eꞌi lako rompae kasaena. Damaria limampae woꞌupa tau daꞌa mamala mopajeko bara mokato. 7 Alatala mboto nanggeni aku mokolu ka komi ri seꞌi ala mompakasalama komi nggari kamateoro eꞌi sampe batena maria mulimu ri dunia eꞌi. 8 Jadi kakonona daꞌa nggari komi sampe aku nikeni mpaka ri Tana Masir eꞌi, tapi nggari Alatala mboto. Iꞌamo to nompakajadi aku pangga bete Magau nto Masir to nakuasa nombaurusi sapo magau mboto pade njumaongu Tana Masir.
9 Jadi weꞌi-weꞌi, panjilimo komi masalisa mpaka ri jaꞌi umaku, pade ulimo ka iꞌa, iweꞌimo to niuli anana Yusuf: ‘Alatala nompakajadi aku Gubernur njumaongu Tana Masir eꞌi. Jadi kamaimo komi masalisa mpaka ri jaꞌiku ri seꞌi. 10 Komi mamala metoꞌo ri Bagia Gosyen namosu ante aku; komi ntaliana ntalimakumpu bo bimbamu, towaumu, japimu pade pura-pura mbara-mbaramu. 11 Ri setumo aku mamala mompiara komi saongu njapo. Sabana kamateoro eꞌi dalimampaepa kasaena. Ane komi daꞌa momai seꞌi, komi saongu njapo bo pura-pura tau to nantuki komi kana mandasa mpuꞌu!’ ”
12 Pade niuli Yusuf woꞌumo ka tuakana, “Weꞌi-weꞌi nikita komi mbotomo pade nikita i Benyamin woꞌu, aku Yusuf mbotomo to notesa ka komi. 13 Ulimo ka umaku ewa kabete nu kuasaku ri Tana Masir eꞌi, pade tesamo ka iꞌa nuapa to nikita komi mboto. Pade kenimo iꞌa mpakasalisa wemai.”
14 Naopu etu nikalipuina tuaꞌina i Benyamin pade nageo. Benyamin woꞌu nageo bo nanggalipui Yusuf. 15 Pade ante nageo Yusuf woꞌu nanggalipui tuaka-tuakana pade niekina ira. Naopu etu notesa-tesamo ira ante iꞌa.
16 Tempo kareba karata sampesuwu-sampesuwu Yusuf natolele sampe ri sapo magau, nadamba woꞌumo rara magau bo pura-pura pangga betena. 17 Pade nangulimo magau ka Yusuf, “Pakaumo sampesuwu-sampesuwumu mombasawiraka gando ri bengo keledai-keledai ira pade manjili masalisa mpaka ri Tana Kanaan 18 mangala uma komi saongu njapo molinja mpaka wemai. Aku kana mombawai ka ira tana to neliu nggabelo, pade ira kana matuwu magana nggari asele ntana etu. 19 Pakau woꞌu ira manggeni bara sakuya kareta nggari Tana Masir eꞌi rapesawi rongo ira ntaliana, pade malau manggeni umamu mpaka wemai. 20 Daꞌa paraluu ira mompekiri mbara-mbara to rapalasi ira, sabana mbara-mbara to neliu nggabelo ri Tana Masir eꞌi kana majadi anu ira mboto.”
21 Jadi ana-ana Yakub nantuki parenta magau etu. Yusuf nombawai ka ira bara sakuya ongu kareta ewa to niparenta magau ka iꞌa, pade niwaina woꞌu baku rakoni ira ri jala. 22 Pade niwaina ka ira simbau sapasa pakea nabou. Tapi ka i Benyamin niwaina toluatu mpeka doi salaka bo limapasa pakea nabou. 23 Nipakatuna ka umana sampulu ongu keledai tuamana nanggeni mbara-mbara to neliu nggabelo nggari Tana Masir. Pade naria woꞌu sampulu ongu keledai besina nanggeni gando, roti bo panggoni ntanina rapobaku tempo ira malai mpaka ri Tana Masir. 24 Sangga nasadia puramo, nanggaliwomo sampesuwu-sampesuwu Yusuf. Nangulimo iꞌa ka ira, “Neꞌe mosinggarau ri jala.”
25 Nalaimo ira nompalasi Tana Masir nalau mpaka ri jaꞌi uma ira ri Tana Kanaan. 26 Naratapa ira ri jaꞌina notesamo ira ka iꞌa, “Yusuf danatuwu! Iꞌamo to najadi Gubernur ri njumaongu Tana Masir!”
Tempo Yakub nangepe pantesa ira natekajamo rarana, daꞌa niparasayana pantesa ira etu. 27 Tapi sangga nitesa ira puramo nuapa to niuli Yusuf ka ira pade nikitana kareta-kareta to nipakatu Yusuf manggeni ira mpaka ri Tana Masir, nanoto balimo rarana. 28 Niulina, “Naganamo! Anaku Yusuf danatuwu! Aku kana malau manggita iꞌa daꞌapa aku mamate.”