Rahab nantulungi rombaꞌa tau to Israel
2
Naopu etu Yosua nompakau nggalino romba'a tau nggari Sitim, peto'o ira notenda, malau mpaka ri Tana Kanaan. Romba'a tau etu nipakau majadi mata-mata momparesa nggalino Tana Kanaan etu neliu-liupa kota Yerikho. Pade nalaumo ira mpaka ri kota etu bo nesai ri sapo samba'a besi bajinga to nosanga ka i Rahab.2 Pade wengina etu wo'u nipopanjanimo ka magau kota Yerikho, "Naria to Israel narata nomparesa nggalino pura-pura kota Yerikho e'i.” 3 Jadi magau nompakau tau malau mpaka ri ja'i Rahab mompakasampe parenta e'i, “Suwurakamo tau romba'a to nesai ri sapomu etu. Sabana ira etumo romba'a mata-mata to momparesa nggalino pura-pura kota Yerikho e'i!”
4-6 Nesonomo i Rahab, “Nakono naria tau etu narata ri sapoku, tapi da'a ninjaniku nggari umba ira. Nalaimo ira etu pangane tempo naruino, tempo bobaa kota da'apa nipiku. Bo da'a nipekutanaku mpaka ri umba rakalau ira romba'a etu. Tapi ane ira masalisa-lisa raraga bara dararatapa.” (Kakonona nitabuniaka i Rahabmo ira romba'a etu ri potambunaka kawoko rami ri bunggu sapona to nabiasa nipake nompowai kawoko ramia). 7 Jadi nanggaliwomo tau-tau to nipakau magau etu nangelo romba'a mata-mata etu sampe ri pewote Binangga Yordan. Iwetu ira nesuwu nggari kota, nipikumo bobaa kota etu.
Rahab nijanji rapakasalama
8 Wengina etu wo'u tempo romba'a mata-mata to Israel da'apa naturu, neponemo i Rahab mpaka ri bunggu sapona 9 bo notesa ka ira, "Ninjanikumo i PUE nombawai kota e'i ka komi. Pade komi mpuꞌu-mpuꞌu nipokaeka kami. Pura-pura tau ri se'i nawiora ante komi, 10 sabana niepe kamimo kareba iwenu i PUE nompakabai Tasi Leib ri ngayo komi, tempo komi nesuwu nggari Tana Masir. Pade niepe kami wo'umo iwenu komi nompatesi i Sihon bo Og romba'a magau to Amori ri sabingga pebulu nu eo Binangga Yordan. 11 Tempo kami nangepe tesa-tesa etu, nawiora bo nalusuaka mpu'umo rara kami, pade pura-pura roa kami nalipomo biana nantora komi, sabana i PUE, Alatalamu, mpu'u-mpu'u Alatala to neliu nggakuasa ri langi bo ri dunia. 12-13 Aku nowia belomo ri ja'i komi, jadi komi wo'u kana mowia belo ri jaꞌi kami saongu njapo. We'i-we'i pojanjimo komi ante manguli sanga i PUE, komi daꞌa mompatesi indo umaku, sampesuwu-sampesuwuku bo pura-pura mbira ira. Pade wai ka akumo saongu tandai to namala raparasaya to mompakatantu komi batena mompalamba kami matuwu.”
14 Pade nesonomo romba'a mata-mata etu, “Kami mojanji ane i PUE mombawai tana e'i ka kami, kami kana mompowia belo ka komi, tapi neꞌe komi mompopanjani ka isema-sema ewa kami. Kami e'i masadia mamate ane kami da'a mompakadupa janji kami etu.”
15 Jadi i Rahab nangulunjaka romba'a mata-mata etu ante kaloro nipowia nggari bana nalei nggari tilalaba, sabana sapo nipeto'o besi etu nibangu ri tembo kota Yerikho etu. 16 Nangulimo i Rahab ka ira romba'a etu, "Kalaumo komi mpaka ri buluna ala tau to nombaraga komi etu da'a mombarata komi. Petabunimo gusa'a tolueo kasaena sampe tau to nombaraga komi etu manjili. Maopu etu mamalamo komi mompapola polumako.”
17 Nangulimo romba'a mata-mata etu ka i Rahab, "Nabelomo, kami kana mompakadupa janji to niperapimu ka kami. 18 Tapi ane marata tempona kami mesua ri kota e'i, po'umo kaloro to nipowia nggari bana nalei e'i ri tilalaba peto'o pombaulunjakamu kami e'i. Pade pasiromumo indo umamu, sampesuwu-sampesuwumu bo pura-pura mbira ira riara sapomu. 19 Ane maria tau to mesuwu nggariara sapomu ane i'a rapatesi, etu salana mboto, da'a sala kami. Tapi isema-sema tau to riara njapomu ane maria tau madota mompakasusa ira kami mangewa ira etu, naupa kami mamate. 20 Tapi ane komi mompatolele nia kami e'i, kami kana makabasaka nggari janji to niperapimu ka kami."
21 Pade nesonomo i Rahab, "Ewa to niuli komi etu wetumo to majadi." Naopu etu nipalambanamo romba'a mata-mata etu nalai. Naliu etu nipo'u i Rahabmo kaloro nipowia nggari bana nalei ri tilalaba sapona.
22 Naopu etu nalaimo romba'a mata-mata etu mpaka ri buluna pade neto'o ri sa'a tolueo kasaena, sampe tau-tau to nombaraga ira etu natingguli. Nasombumo nielo ira romba'a mata-mata etu tapi da'a nirata ira. 23 Pade natinggulimo romba'a mata-mata etu notua nggari buluna bo nombawote Binangga Yordan nosirata ka Yosua. Pade nitesa iramo nuapa pura to nirata ira. 24 Nangulimo ira romba'a etu ka Yosua, "Natantumo i PUE mombawai tana etu ka kita, sabana ira pura-pura ri setu nawiora bo nalusuaka mpu'umo mantingayo kita."