Todea Israel nombawote Binangga Yordan
3
Naeo mpadondona, nembangumo Yosua bo pura-pura todea Israel nompalasi peto'o potenda ira ri Sitim, bo nalau mpaka ri wiwi Binangga Yordan. Pade notendamo ri setu mantongoraka tempo mewote. 2 Sangga naganapa tolueo, balengga-balengga tantara nompesayo njumaongu peto'o potenda ira ri wiwi Binangga Yordan 3 bo nomparenta todea Israel iweꞌi: “Ane rakita komi topanggeni agama mokowa Peti Pojanji PUE Alatalata, komi wo'u kana manggaliwo mompalasi petoꞌo potenda komi e'i. Pade tukimo Peti Pojanji etu, 4 tapi ne'e molumako mamosu gaga ante Peti Pojanji to nagasa etu. Tukimo nggari purina ante kakawaona saongu kilo. Patujuna ala ranjani komi jala to ratuki komi, sabana komi da'apa sanggani nalau mpaka ri ngata etu."5 Nangulimo Yosua ka todea Israel, “Komi kana mompakasadia koro bata komi mantingayo i PUE, sabana naile i PUE mompowia kabaraka ri tatongo komi.” 6 Pade Yosua nompakau topanggeni agama etu iwe'i, "Onggotakamo Peti Pojanji etu manggaliwo mokolu ka todea Israel." Jadi nituki iramo parenta Yosua.
7 Notesamo i PUE ka Yosua, “Mompamula e'o e'i, Aku kana mompakabete sangamu ri mata pura-pura todea Israel, ala ira mombabila iko bo mangginjani Aku nomporoa iko nasimbayu ewa Aku nomporoa i Musa. 8 We'i-we'i parentamo pura-pura topanggeni agama to nombakowa Peti Pojanji etu ala tempo ira marata ri Binangga Yordan, ira kana mesua ri binangga etu pade mekanggore mamosu ri wiwina."
9 Naopu etu nipokio Yosuamo todea Israel etu, pade niulina, “Kamai epemo nuapa to niparenta PUE Alatalata ka komi. 10-11 Ane komi mamaju ngena, natantumo i PUE kana mompopalai tau to Kanaan, tau to Het, tau to Hewi, tau to Feris, tau to Girgasi, tau to Amori bo tau to Yebus. Pade tempo Peti Pojanji Pue to nomparenta njumaongu dunia nikowa topanggeni agama mokolu ka komi mombawote Binangga Yordan, komi kana manggita Alatala to Natuwuna maria mosanggani-nggani ka komi. 12 Jadi we'i-we'i pelisi komimo sampulu romba'a tau nggari pura-pura suku to Israel, samba'a nggari butu-butu suku. 13 Ane topanggeni-topanggeni agama to nokowa Peti Pojanji i PUE mombalonggo ue Binangga Yordan etu ngena, winulu nu ue kana menonto, pade ue to moili nggari uluna kana matewusu ri saongu peto'o."
14-15 Tempo etu nawela tempo mpokato, pade ewa kabiasana nanggabuntumo Binangga Yordan. Tempo to Israel nalai nompalasi peto'o potenda ira ala malau mombawote Binangga Yordan, topanggeni-topanggeni agama nolumako ri koluna nanggeni Peti Pojanji. Iwetu ira nombalonggo ue Binangga Yordan etu, 16-17 nenontomo winulu ue. Pade natewusumo ue binangga etu ri ngata Adam namosu ri sabingga ngata Sartan. Pade ue to noili mpaka ri Tasi Mate naoti mpaa, sampe pura-pura todea Israel namala newote ri tana bai nosintingayo ante kota Yerikho. Topanggeni-topanggeni agama to nanggeni Peti Pojanji etu batena nekanggore ri tatongo Binangga Yordan sampe pura-pura todea Israel narata ri sambotena.