Sampulu rongu watu popatora niposisunju
4
Sangga pura-pura todea Israel etu narata ri sambotena, notesamo i PUE ka Yosua, 2 "Pelisimo sampulu romba'a tau, samba'a-sambaꞌa nggari butu-butu suku to Israel, 3 bo parentamo ira ala mangala sampulu rongu watu nggari tatongo Binangga Yordan, ri ntoto topanggeni agama nekanggore. Pade pakaumo ira mompasinaka watu-watu etu sampe marata ri peto'o potenda komi ngena nggawengi."4 Jadi Yosua nompokio sampulu romba'a tau to nipelisina etu, sambaꞌa-sambaꞌa nggari butu-butu suku to Israel. 5 Pade niulina ka ira, “Kalaumo ri tatongo Binangga Yordan, ri ngayo Peti Pojanji PUE Alatalata. Onggotaka komimo simbau saongu watu nggari setu, kadeana sampulu rongu nantuki kadea suku-suku to naria ri Israel. 6 Watu-watu etu majadi tandai mompopatora ka to Israel naupa to nipowia i PUE ri seꞌi. Ane ana-anamu mekutana nebanepia, ‘Nuapa batuana watu-watu etu ka komi,’ 7 komi kana manguli ka ira, iwe'i: ‘Tempo Peti Pojanji PUE nikowa nombawote Binangga Yordan, ue binangga etu nenonto noili ri ngayona. Watu-watu e'i najadi tandai mompopatora ka to Israel sampe ri kasae-saena nuapa to najadi ri se'i.’ ”
8 Jadi tau sampulu rombaꞌa etu nantuki parenta Yosua, ewa to nitesa i PUE ka i'a. Niala ira sampulu rongu watu nggari tatongo Binangga Yordan, kadeana nantuki kadea suku-suku to naria ri Israel, pade nionggotaka nipasinaka ira ri peto'o potenda ira. 9 Ri tatongo Binangga Yordan etu wo'u, Yosua nompakau nombasunju sampulu rongu watu ntanina ri ntoto pekanggore topanggeni-topanggani agama to nombakowa Peti Pojanji etu. Watu-watu etu danariapa ri sa'a sampe we'i-we'i.a
10 Topanggeni-topanggeni agama to nombakowa Peti Pojanji etu, batena nekanggore ri tatongo Binangga Yordan sampe tau to Israel naopu nanggawia pura-pura to niparenta i PUE. Etu nasimbayu ewa to niparenta i Musa nggaulu ka Yosua. Jadi nasalisa-lisamo todea Israel nombawote Binangga Yordan. 11 Sangga naratapa ira ri sambotena, newote woꞌumo topanggeni-topenggeni agama nokowa Peti Pojanji nolumako nokolu ka ira.
12 Pura-pura langgai to namala nosibali nggari suku Ruben, suku Gad bo sabagia suku Manasye etu nokolu ka todea Israel nombawote Binangga Yordan, nasadia ante parewa posibali nasimbayu ewa to niparenta i Musa nggaulu ka ira. 13 Kadea ira pura-pura etu patampulu njobu mbaꞌa langgai to naria parewa mposibalina. Nolumakomo ira ri kolu Peti Pojanji PUE malau mpaka ri lemba Yerikho, nasadia mosibali.
14 Eo etu i PUE nompajadi Yosua samba'a tau to nabete sangana ri mata todea Israel. Iꞌa nibila ira sampe kaopu katuwuna nasimbayu ewa ira nombabila i Musa.
15 Tempo pura-pura to Israel naopumo nombawote Binangga Yordan, nangulimo i PUE ka Yosua, 16 "Parentamo topanggeni-topanggeni agama to nokowa Peti Pojanji etu mesuwu nggari Binangga Yordan." 17 Jadi nikawia Yosuamo nuapa to niparenta i PUE ka i'a. 18 Iwetu topanggeni-topanggeni agama to nokowa Peti Pojanji etu narata ri wiwi Binangga Yordan, ue binangga etu sampegoli noili bali nasowe sampe ri wiwina.
19 Todea Israel narata ri sambote Binangga Yordan tanggal sampulu wula pamulana, pade notendamo ira ri ngata Gilgal ri sabingga pebulu nu eo kota Yerikho.
20 Ri setumo Yosua nombasunju sampulu rongu watu to niala ira nggariara Binangga Yordan. 21-24 Pade notesamo iꞌa ka todea Israel, “Ane ana-anamu mekutana nebanepia, 'Nuapa batuana watu-watu to nisunju e'i,' tesamo ka ira tempo todea Israel nombawote Binangga Yordan e'i ira nolumako ri tana bai. Ulimo ka ira iwenu i PUE Alatalata nompakabai ue Binangga Yordan etu ka komi, sampe komi pura-pura narata ri sambotena, nasimbayu ewa Iꞌa nompakabai Tasi Naleib ka kami. Etu nipowia-Na ala pura-pura tau ri dunia mangginjani nabete mpuꞌu kuasa-Na, pade ala komi batena maeka bo mombabila i PUE Alatalata.