Posuna tau to Israel
5
Tempo pura-pura magau tau to Amori ri sabingga kasolo Binangga Yordan bo pura-pura magau Kanaan ri wiwi tasi nangepe i PUE nompakabai ue Binangga Yordan ri ngayo todea Israel, nawioramo rara ira bo mana nabia ira mangewa tau to Israel.2 Tempo etu wo'u nangulimo i PUE ka Yosua, "Kawiamo ladi nggari watu, pade kawia woꞌumo ada mposuna ka todea Israel." 3 Jadi nikawia Yosuamo ladi-ladi nggari watu, pade nisunanamo to Israel ri bulu to nipoposanga ka Bulu Posuna. 4 Eꞌimo sabana Yosua nombasuna ira: Pura-pura langgai to Israel to nesuwu nggari Tana Masir to nagana umuruna mosibali namatemo ri karawa baina naopu nesuwu nggari Tana Masir. 5 Ira pura-pura nisunamo, tapi pura-pura langgai to niote tempo ri karawa baina naopu nesuwu nggari Tana Masir daꞌapa nisuna. 6 Patampulu mpae kasaena to Israel nolumako ri karawa baina sampe namate puramo langgai to nagana umuruna mosibali to nesuwu nggari Tana Masir, sabana ira daꞌa nantuki tesa i PUE. Iꞌa nompakatantu ante nojanji ira daꞌa rapaloga manggita tana to nijanji-Na ka totuꞌa ira nggaulu ante nojanji, etumo tana to nabelo bo nadea aselena.a 7 Tapi ana-ana ira nipajadi-Na sambeina, pade ana-ana langgai to Israel etumo to nisuna Yosua, sabana ira da'apa nisuna tempo riara mpolumako.
8 Sangga naopupa pura-pura langgai to Israel nisuna, naroomo ira riara tenda sampe naori belana. 9 Pade nangulimo i PUE ka Yosua, "Eo e'i nikabasaka-Kumo komi nggari pepatundu to Masir ri ja'imu." Etumo sabana peto'o etu niuli Gilgalb sampe we'i-we'i.c
Eo bete Paskah ri Gilgal
10 Tempo to Israel notenda ri Gilgal, ira nompowia eo bete Paskahd tempo ngguwiana ri eo kasampulu ampana wula pamulana, ri lemba Yerikho. 11 Naliu eo bete Paskah, kaeo mpadondona etu, nompamulamo ira nanggoni asele ntana to Kanaan, etumo roti to da'a nidika ragi bo gando nitunu. (Etumo eo pamulana ira nanggoni panggoni nggari Tana Kanaan.) 12 Sangga ira nanggoni asele ntana ri setu, mana naria roti to niuli mannae nanawu nggari langi. Nompamula eo etu ira damo nanggoni asele ntana Kanaan etu.
Yosua nosintomu ante Balengga Tantara i PUE
13 Naria sanggani tempo Yosua namosu kota Yerikho. Sampegoli nikitana samba'a langgai nenggore ri ngayona nanjoko mata guma. Yosua nompakamosu i'a pade nekutana ri ja'ina, "Komi e'i, roa atau bali?"
14 Nesonomo i'a, "Aku eꞌi daꞌa roa, daꞌa woꞌu bali! Tapi aku e'imo Balengga Tantara i PUE. We'i-we'i naratamo aku."
Pade nekadedemo Yosua ante lenjena narapa ri tana nombabila i'a pade nanguli, "Aku e'i batua komi, nuapa tewai komi ka aku?"
15 Nangulimo Balengga Tantara i PUE etu ka Yosua, "Wonjumo solo nggari kadamu, sabana peto'o to nipekanggoremu etu peto'o to nagasana.f" Jadi niwonju Yosuamo solona.