Tau to Israel nompakaropu kota Yerikho
6
Tempo etu bobaa kota Yerikho nijagai mpuꞌumo bo nipiku mpii sabana todea Yerikho naeka ka tau to Israel. Daꞌa ria sambaꞌa tau mamala mesua atau mesuwu nggari kota etu. 2 Nangulimo i PUE ka Yosua, “We'i-we'i Kuwai ka ikomo kota Yerikho ante magauna bo pura-pura tadulakona to nabia-biana etu. 3 Iko bo pura-pura tantaramu kana molumako mantalili kota Yerikho etu aono eo kasaena, sanggani riarana saeo. 4 Papitu mbaꞌa tau topanggeni agama simbau manggeni kololio to nipowia nggari tandu bimba pomawa, kana molumako ri ngayo Peti Pojanji. Pade ri eo kapapituna, iko bo tantaramu kana mantalili kota Yerikho etu pitunggani, bo topanggeni-topanggeni agama batena mokolu ka komi mantawui kololio. 5 Naliu etu topanggeni-topanggeni agama kana mantawui kololiona ante oni to naintina. Tempo komi mangepe oni to naintina etu, pura-pura tantara kana mongare ante suara to namangga, pade tembo kota Yerikho etu kana manawunjaka mpasanggani. Pade komi pura-pura kana mapola mesua ri kota Yerikho etu.”6 Pade nipokio Yosuamo pura-pura topanggeni agama ante nanguli, “Onggotakamo Peti Pojanji etu, pade papitu mbaꞌa tau nggari olo komi topanggeni agama kana molumako ri koluna ante manggeni kololio to nipowia nggari tandu bimba pomawa. 7 Pade niul Yosua ka todea Israel, “Polumakumo mantalili kota etu, salunu tantara ante parewa mposibalina kana molumako mokolu ka Peti Pojanji PUE.”
8 Sangga naopupa Yosua notesa ka todea Israel etu, nolumako nokolumo papitu mba'a topanggeni agama, nanggeni papitu kololio ri ngayo Peti Pojanji i PUE. Nitawui iramo kololio etu bo topokowa Peti Pojanji nantuki puri ira topanggeni kololio. 9 Tau-tau to naria parewa mposibalina nolumako ri kolu topanggeni agama to nantawui kololio. Pade topanggeni-topanggeni agama to nokowa Peti Pojanji nantuki ira bo naria tantara nobaresi ri puri topokowa Peti Pojanji etu. Tempo etu kololio batena nitawui njuꞌu 10 Pura-pura tantara niparenta Yosua ala neꞌe mongare bara motesa nau aga sambela ane daꞌapa raparentana. 11 Jadi iwetumo Yosua nompakau topanggeni agama nanggeni Peti Pojanji mantalili kota etu aga sanggani ri eo pamulana. Naliu etu natinggulimo ira mpaka ri petoꞌo potenda ira pade naturu ri setu.
12 Kaeona etu nembangu woꞌumo Yosua kampadondo njiina, pade topanggeni-topanggeni agama nangonggotaka Peti Pojanji i PUE. 13 Papitu mbaꞌa topanggeni agama to nanggeni papitu kololio to nipowia nggari tandu bimba pomawa nolumako ri kolu topokowa Peti Pojanji etu. Tempo nolumako ira batena nantawui kololio. Tau-tau to naria parewa mposibalina nolumako ri kolu topanggeni agama etu, pade naria tantara-tantara topojagai nantuki ri purina. Tempo etu kololio nitawui njuꞌu. 14 Karoeona etu ira nantalili kota Yerikho sanggani lau. Pade natingguli wo'umo ira mpaka ri petoꞌo potenda ira. Iwetumo to nikawia ira sampe nagana aono eo kasaena.
15 Ri eo kapapituna nembangumo ira mpadondona, tempo eo dako nebulu, pade nolumako nantalili kota Yerikho etu papitu nggani, nasimbayu ante akala pamulana. Aga ri eo kapapituna ira nantalili kota etu papitu nggani. 16 Tempo kapapitu ngganina, topanggeni-topanggeni agama nantawui kololiona, pade Yosua nomparenta pura-pura tantarana, "Pongaremo! Sabana niwai i PUE-mo kota Yerikho e'i ka komi. 17 Pura-pura kota Yerikho bo pura-pura isina kana rapakaropu sanggani lau majadi pesomba ka i PUE. Tapi aga i Rahab saongu njapona nipakamba matuwu, sabana i'a nantulungi mata-matata. 18 Tapi komi e'i, ne'e mangala mbara-mbara to nipakatantu rapakaropu nau aga sangele nggari mbara-mbara etu. Ane ra'ala komi, kita to Israel kana rarata kasusa bo kapari.a 19 Pura-pura mbara-mbara nggari salaka, bulawa, tambaga bo ase kana rapakatantu ka i PUE, pade raboli ri petoꞌo pomboli mbara-mbara bagia i PUE.”
20 Naopu etu topanggeni-topanggeni agama nantawui kololiona. Nangepe oni kololio etu to Israel nongare mpakaroꞌo-roꞌo, sampe tembo kota Yerikho nanawunjaka mpasanggani. Pura-pura tantara to Israel kapola-pola nepone bo nesua nombagero kota etu. 21 Pura-pura to naria ri kota Yerikho etu, naopu nipatesi ante guma, nabelo ka langgai, nabelo ka besi, nabelo ka totuꞌa, nabelo ka ngana muda. Bo pura-pura binata woꞌu nipatesi, nabelo ka japi, nabelo ka bimba, nabelo ka keledai.
22 Pade nangulimo Yosua ka rombaꞌa mata-matana etu, “Kalaumo komi mpaka ri sapo i Rahab, pade kenimo ira saongu njapo mesuwu ewa to nijanji komi mamimo ka i'a.” 23 Pade nalaumo rombaꞌa mata-matana etu nanggeni i Rahab nesuwu nosanggani-nggani ante indo umana bo sampesuwu-sampesuwuna ntanina. Pura-pura ira etu nikeni nesuwu nalau mpaka ri petoꞌo to naꞌama namosu potenda tau to Israel.
24 Naopu etu tantara tau to Israel nompalabu mpakaopu pura-pura kota Yerikho etu ante pura-pura to naria riarana, aga mbara-mbara bulawa, salaka, tambaga bo ase to naboli. Mbara-mbara etu niala ira pade nikeni ri petoꞌo pomboli mbara-mbara bagia i PUE. 25 Tapi i Rahab saongu njapona etu nipakamba Yosua batena natuwu, sabana i'a nantulungi rombaꞌa mata-mata to nipakau Yosua malau mpaka ri kota Yerikho. Muli i Rahab danariapa ri Israel sampe weꞌi-weꞌi.b
26 Tempo etu Yosua nojanji iweꞌi: “Tau to mompasimbuku mombabangu mpanjili kota Yerikho e'i, i'a kana rajanjiaka i PUE. Tau to manggawia pandasina kana mamate anana ulumbua. Tau to mompataka bobaa kota Yerikho e'i, kana mamate ana kaopuna.c ”
27 PUE batena nomporoa bo nantulungi Yosua, sampe sanga Yosua natolele ri pura-pura bagia Tana Kanaan etu.