Tau to Israel nidagi tau to Ai
7
PUE nomparenta ka todea Israel ala neꞌe ntoto mangala mbara-mbara to nitagi nggari kota Yerikho etu. Tapi parenta etu daꞌa nituki. Naria sambaꞌa langgai nosanga ka Akhan nombaliunaka parenta etu, sampe i PUE nanggarau mpuꞌu ka todea Israel. (Uma i Akhan nosanga ka i Karmi bo puena nosanga ka i Zabdi mbira i Zerah nggari suku Yehuda).2 Tempo etu Yosua nompakau bara sakuya mbaꞌa tau to Israel nggari kota Yerikho malau mpaka ri kota Ai, ri sabingga pebulu nu eo kota Betel, namosu Bet-Awen. Tau-tau etu nipakau malau mompekinoto ngata etu. 3 Naopu ira nompekinoto ngata etu, natinggulimo ira bo notesa ka Yosua. Nangulimo ira, "Daꞌa paraluu kita pura-pura malau mombasuaki kota Ai. Pakaumo kira-kira ronjobu atau tolunjobu mbaꞌa tantara. Ne'e rapakau pura-pura tantara malau mosibali gusaꞌa, sabana kota etu nanggedi.” 4 Jadi nalaumo aga tolunjobu mba'a tantara nombasuaki kota etu, tapi ira nidagi. 5 Tau-tau ri kota Ai nombaraga tantara to Israel nggari bobaa kota Ai sampe narata ri bagia Syebarim, etumo peto'o pangelo watu, bo niraga notua sampe ri kente bulu etu. Pade tantara to Ai nompatesi tolumpulu bo aono mbaꞌa nggari olo tantara to Israel. Jadi naeka mpuꞌumo rara tau-tau to Israel.
Yosua nerapi doa ka i PUE
6 Naopu etu nasusa mpuꞌumo rara Yosua bo pura-pura topanggeniaka todea Israel sampe ira nombaseka-seka baju ira. Njineo ntua ira notimbakotu ri ngayo Peti Pojanji i PUE ante nombaboli awu ri balengga ira ewa tandaina nasusa rara. 7 Nangulimo Yosua ka i PUE, “O PUE Alatalaku! Nokuya Komi nanggeni kami narata ri sambote Binangga Yordan eꞌi, ane kami aga rawai Komi ka tau to Amori ala rapatesi ira? Nabelopa kami aga meto'o ri sambote Binangga Yordan gusaꞌa! 8 O PUE! Tau to Israel nidagi balinamo. We'i-we'i nuapamo to kutesa ka todea-Mu? 9 Ane tau to Kanaan bo pura-pura tau ntanina ri bagia e'i mangepe nuapa to najadi etu, ira kana mantatiku bo mompatesi kami. Pade nuapamo to Mukawia ala mompakabelo sanga-Mu to nabetena etu?”
10 Nesonomo i PUE ka Yosua, “Pembangumo! Da'a ntoto naria gunana iko motimbakotu sampe ri tana! 11 Tau to Israel nowia silakamo. Niparenta-Kumo ka ira ala mantuki pojanji ira ante Aku, tapi ira nombaliunaka pojanji etu. Mbara-mbara to nitagi batena niala ira. Tau to Israel nangangga mbara-mbara etu pade nitabuniaka ira ri olo mbara-mbara ira ala da'a ranjani. 12 Etumo sabana tau to Israel da'a nompakule mantingayo balina. Ira nidagi sabana ira mboto wo'u nipawela pesuku ala rapakaropu. Ane mbara-mbara to nitagi etu da'apa rapakaropu, Aku da'a ntoto momporoa komi. 13 Pembangumo, bo kalaumo Yosua! Komi kana mompakasadia korobata komi mantingayo i PUE Alatala. Pade parentamo todea Israel ala masadia-dia naile, sabana Aku i PUE Alatala to Israel kana manguli ka ira iwe'i: ‘Umba komi tau to Israel! Mbara-mbara to niparenta-Ku ka komi ala rapakaropu, sabagia danariapa ri ja'i komi. Ane komi da'apa mantajiaka mbara-mbara etu, komi da'a mompakule mangewa balimu.’
14 Yosua, ulimo ka todea Israel, naile mpadondo ira kana mantingayo Aku saongu-saongu suku. Ane Aku mantujuraka saongu suku, pura-pura mbira riara suku etu kana mosinjambei marata. Pade ane Aku mantujuraka komi ntale sampesuwu pura-pura, komi etu kana mosinjambei marata. Maopu etu ane Aku mantujuraka saongu njapo, butu mbaꞌa tau riara njapo etu kana mosinjambei marata. 15 Ane tau to nitujuraka etu, nakono nirata nomboli mbara-mbara to nitagi etu, ira saongu sapo kana rapalabu mpakaopu mosanggani-nggani ante pura-pura to najadi bagiana. Sabana i'amo to nombaliunaka pojanji i PUE bo nanggawia kaja'a to nabetena ri tatongo to Israel.”
Akhan nawela pesuku nggari ja'i PUE
16 Kaeona etu nembangumo Yosua mpadondo njiina, nompakau todea Israel saongu-saongu suku nosinjambei marata ri koluna, pade suku Yehudamo to nawelana nipelisi PUE. 17 Pade nipakau Yosuamo suku Yehuda mosinjambei marata mpaka ri koluna, pade muli Zerahmo to nawela nipelisi-Na. Naopu etu muli Zerah saongu-saongunjapo nosinjambei marata mpaka ri koluna, pade i Zabdi saongu njaponamo to nawela nipelisi-Na. 18 Naopu etu Yosua nompakau i Zabdi saongu njapona marata mpaka ri koluna sambaꞌa bo sambaꞌa, pade Akhan ana i Karmi, makumpu i Zabdi to nawela nipelisi. 19 Jadi nangulimo Yosua ka i Akhan, “Anaku, pangakumo bo ulimo pakanoto ri se'i ri ngayo i PUE Alatala Israel, nuapa to nikawiamu. Ulimo ka aku, ne'e mutabuniaka.”
20 Nangulimo i Akhan, “Nakono, aku nowia silakamo ri jaꞌi PUE Alatala Israel. E'imo to nikawiaku: 21 Ri olo mbara-mbara to niagota, nikitaku santonga baju to nandoe bo nagaya mpu'u, nikawia to Babilonia, ante salaka kira-kira rongu kilo, bo sampeka bulawa santongo kilo labi. Nipokonoku mpu'u mbara-mbara etu sampe nialaku bo nitabuniakaku riara ntana ri tendaku, pade salaka niboliku ri tambena ntoto.”
22 Pade Yosua nompakau tau nasalisa-lisa nalau mpaka ri tenda i Akhan. Nakono mpu'u mbara-mbara to nitagi etu pura-pura naria ri saꞌa, nitabuniaka riara ntana, salaka nibolina ri tambena ntoto.
23 Ira nangala mbara-mbara etu pade nikeni ka Yosua bo pura-pura tau to Israel. Pade mbara-mbara etu niboli ri ngayo i PUE. 24 Naopu etu Yosua ante pura-pura tau to Israel nanjoko i Akhan, pade nanggeni i'a nalau mpaka ri lemba to niuli Lemba Kasusa. I'a nikeni nosanggani-nggani ante pura-pura anana, japina, keledaina, bimbana, tendana, bo pura-pura to naria ri ja'ina ante salaka, baju to nandoena bo bulawa to nipanganggana etu. 25 Pade notesamo Yosua ka i Akhan, “Nokuya iko nompakasusa kita? We'i-we'i i PUE mompakasusa iko!” Jadi i Akhan saongu njapo nirempe pura-pura tau to Israel ante watu sampe namate. Pura-pura to naria ri ja'ina bo mbara-mbara to nipanganggana wo'u nipalabu mpakaopu. 26 Naopu etu ira nombaiwu peto'o etu ante watu to nadeana, to danaria ri setu sampai weꞌi-weꞌi. Nanggita etu naopumo rau rara i PUE. Jadi etumo sabana peto'o etu nipoposanga ka Lemba Kasusa sampe weꞌ'i-weꞌi.a