Kota Ai nipakagero
8
Nangulimo i PUE ka Yosua, "Pasiromu puramo tantaramu, bo kalaumo ante ira mombasuaki kota Ai. Ne'e maeka bo ne'e mawiora! Aku kana mompowia iko padagi mangewa magau Ai bo todeana, pade ngatana kana muago. 2 Kota Ai kana ragero komi bo magauna wo'u kana rapatesi komi, nasimbayu ewa to nipowiamu ka ngata Yerikho bo magauna sisayo. Tapi tempo e'i mbara-mbarana bo binata to nipatuwu ira mamala ra'ala komi majadi bagia komi. Pakasadia tantara-tantara mantingawu nggari taliku kota Ai."3 Jadi nompakasadiamo Yosua bo pura-pura tantarana malau mpaka ri kota Ai. Nipelisina tolumpulu njobu mba'a tantarana, etumo tadulako to narosona, pade nipakaunamo ira malau tempo nggawengina, 4 bo niparentanamo ira iweꞌi: “Petabunimo ri sinjori kota etu, tapi ne'e makawao gaga. Pade komi kana masadia-dia mosibali. 5 Aku bo pura-pura tantara ntanina kana mompakamosu kota etu. Ane tau to Ai mesuwu mangewa kami ewa sisayo, kami kana megoli ntaliku pade mangowa malai. 6 Natantumo ira kana mombaraga kami sampe makawao nggari kota Ai etu, sabana rasarumaka ira kami batena mangowa malai ewa sisayo. 7 Tempo etumo komi kana mesuwu nggari peto'o petabunimu, pade mombasuaki kota Ai etu. PUE Alatalata kana mombawai kota etu ka komi. 8 Maopu komi mombasuaki bo momba'agona, palabumo kota etu, ewa to niparenta i PUE. Etumo bagomu.” 9 Iwetumo Yosua nompakau ira, pade nalaumo ira netabuni ri sabingga kasolo kota Ai, ri olo kota Ai bo Betel, pade nepopeamo ira ri setu. Tapi Yosua batena naturu ri petoꞌo potenda to Israel.
10 Ri mpadondo njiina nembangumo Yosua pade niparentana tantarana ala masiromu. Naopu etu i'a bo pura-pura topanggeniaka todea Israel nanggeni tantarana etu malau mpaka ri kota Ai. 11 Tantarana etu nolumako nosanggani-nggani ante Yosua nalau mpaka ri bobaa kota Ai, pade notendamo ira ri sabingga tasina, ri saongu lembana ri olo ira bo kota Ai etu. 12 Yosua wo'u nompakau lima njobu mba'a tantara netabuni ri sabingga kasolo kota etu, ri olo kota Ai bo Betel. 13 Iwe'imo tantara toposibali etu niaturu: Tantara to nadeana nipopetꞌo ri sabingga tasi kota etu, bo tantara ntanina nipopetoꞌo ri sabingga kasolo kota. Tapi wengi etu Yosua nalau mpaka ri lembana.
14 Mpadondo etu tempo magau Ai nanggita tantara-tantara Yosua, nesuwumo iꞌa nasalisa ante pura-pura todeana nalau mpaka ri Lemba Yordan ala mombasuaki tau-tau to Israel ri petoꞌo sisayo. Tapi da'a ninjanina naria to Israel nantingawu ri taliku kotana ala mombasuaki ira. 15 Tempo nisuaki, Yosua bo tantara-tantarana tumoni-moni nokanggaura nangowa nalai mpaka ri karawa baina. 16 Nanggita etu, pura-pura langgai ri kota Ai niparenta mombaraga Yosua ante tantarana etu. Tapi nantambai ira nombaraga Yosua nantambai kakawaona ira nggari kota Ai. 17 Pura-pura tau ri kota Ai etu nesuwu ala mombaraga to Israel, sampe kota etu nipakamba natebuka waꞌamo, mana naria topojagaina.
18 Pade notesa wo'umo i PUE ka Yosua, “Onggotakamu tawalamu etu pade pakantongo mpaka ri kota Ai, sabana we'i-we'i kota etu kana Kuwai ka iko.” Pade Yosua nanggawia nuapa to niparenta i PUE etu. 19 Iwetu Yosua nombawiataka palena, tantarana to netabuni etu nasalisa-lisa nenggore bo nombasuaki kota Ai, pade kota etu niago bo nipalabu ira. 20-22 Iwetu tau to Ai neili ntaliku, nikita ira sumoa nu apu nojumu sampe ri langi. Yosua bo tantarana wo'u nanggita sumoana etu, pade ninjani ira tantara to netabuni naopumo nompalabu kota etu. Jadi negoli ntalikumo Yosua bo tantarana nalau nompatesi tau to Ai. Tau to Israel to naria ri kota Ai etu wo'u nesuwu nosibali ka to Ai, sampe tau to Ai nitatiku bo da'a namala nangowa nalai. Da'a kamba sambaꞌa ira namala nalai. Ira pura-pura namate nipatesi tau to Israel, 23 aga magau to Ai etu nisoko to Israel, pade nikeni ri ngayo Yosua.
24 Naopu tantara Israel nompatesi mpakaopu bali to nombaraga ira ri karawa baina, negoli ntalikumo ira pura-pura mpaka ri kota Ai, pade nompatesi pura-pura tau to naria ri sa'a. 25-26 Yosua batena nangonggotaka tawalana nompakantongo mpaka ri kota Ai, bo da'a nitaurakana sampe pura-pura tau to Ai naopu nipatesi. Eona etu wo'u namate puramo todea kota Ai. Kadeana sampulu ronjobu mba'ana, langgai bo besi. 27 Aga binata to nipatuwu bo mbara-mbara tau to Ai etu niala to Israel ala majadi bagia ira, nantuki to nitesa i PUE ka Yosua. 28 Yosua nompalabu kota Ai etu, pade nipakambana najadi awu sampe weꞌi-weꞌi. 29 Magau Ai niloemo ri sampeka tinja, pade wata bakuna nipakamba ri setu sampe ngguwiana. Tempo eo nasolomo, Yosua nompakau tau nantauraka watabaku magau Ai pade nantijaka ri ngayo bobaa kota Ai. Pade peto'o etu ni'iwu ante watu nadea mpu'u. Watu-watu etu danariapa sampe weꞌi-weꞌi.
Atura-atura PUE Alatala nibasa ri Bulu Ebal
30 Naliu etu Yosua nompowia saongu peto'o pesomba ka i PUE Alatala Israel ri Bulu Ebal. 31 Peto'o pesomba etu nikawia nantuki to nipakatantu riara buku i Musa, batua i PUE etu, ka tau to Israel etumo, "Saongu peto'o pesomba nggari watu-watu to da'a nipa'a pade da'apa sanggani nikawia manusia ante parewa-parewa nggari ase." Ri bunggu peto'o pesomba etu tau to Israel nombawai pesomba ka i PUE, pesomba to nitunu mpakaopua bo pesomba posinggabelo.b 32 Ri watu-watu petoꞌo pesomba etu Yosua nantulisi atura-atura i PUE anu naria riara buku i Musa, nisabi ntau to Israel. 33 Pura-pura tau to Israel, ante topanggeniaka-topanggeniaka, balengga-balengga tantara, topotangara-topotangara bo tau-tau ntanina wo'u to neto'o ri olo ira etu, nenggore ri ntimali-mali Peti Pojanji ri ngayo topanggeni-topanggeni agama muli Lewi to nokowa Peti Pojanji i PUE etu. Sabagia nggari tau etu notingayo mpaka ri Bulu Gerizim, pade sabagiapa wo'u notingayo mpaka ri Bulu Ebal. Etu nipowia ira nantuki to niparenta i Musa, batua i PUE bopia, ane maratamo tempona mantarima rasi nggari jaꞌi PUE. 34 Naliu etu Yosua nombabasa mpakaro'o-ro'o pura-pura atura to nitulisi riara buku i Musa, etumo rasi-rasi bo pejanjiaka-pejanjiaka.c 35 Pura-pura parenta i Musa nibasa Yosua ka pura-pura to Israel to nasiromu ri setu, ante besi bo ngana-ngana bo tau-tau ntanina to neto'o ri tatongo ira.