Tau to Israel nibagiu tau to Gibeon
9
Kareba to Israel padagi natolele sampe ri ja'i pura-pura magau ri sabingga kasolo Binangga Yordan, ri buluna, ri kente nu bulu, pade ri lembana ri wiwi Tasi Tongo sampe ri sambotena ri Bulu Libanon ri sabingga tasina, etumo magau-magau to Het, to Amori, to Kanaan, to Feris, to Hewi bo to Yebus. 2 Nangepe kareba etu nasintuwu puramo magau-magau etu ala mosibali ka Yosua bo todea to Israel.3 Wetu niepe to Gibeon nggari ngata Hewi ewa nuapa to nikawia Yosua ka kota Yerikho bo kota Ai, 4 nielo ira akala mombabagiu Yosua. Nipakasadia ira baku riara karu-karu gero bo pomboli-pomboli anggur to naserina damo nitampala-mpala. Baku etu nisawiraka ira ri bunggu keledai. 5 Nipasua ira pakea nte sanjia-njia bo sapatu gero to nitampala. Bo roti nipakasadia ira aga roti ngau to nakawulu. 6 Iwetumo ira nalau nosirata ka Yosua ri petoꞌo potenda to Israel ri Gilgal. Pade notesamo ira to Gibeon etu ka Yosua bo tau to Israel, “Kami narata nggari ngata to nakawao mpu'u, pade kami madota mompowia pojanji powega ante komi pura-pura.”
7 Tapi nangulimo tau to Israel ka ira, “Iwenumo kami mompowia pojanji powega ante komi? Ne'e-ne'e peto'o komi aga namosu-mosu ri se'i.”
8 Nesonomo tau to Gibeon etu, “Kami masadia manggawia nuapa to raparenta komi ka kami.”
Nangepe etu nekutana wo'umo Yosua ka ira, “Isema komi bo nggari umba ngata komi?”
9 Nesonomo ira to Gibeon etu, “Kami batua-batuamu e'i narata nggari ngata to nakawao mpu'u, sabana niepe kamimo kareba ewa i PUE Alatala to nisomba komi. Niepe kamimo pura-pura nuapa to nikawia-Na ri Tana Masir, 10 bo nuapa to nikawia-Na wo'u ka romba'a magau tau to Amori ri sabingga pebulu nu eo Binangga Yordan, etumo Sihon magau Hesybon ante Og magau Basan to neto'o ri Asytarot. 11 Etumo sabana topanggeniaka-topanggeniaka bo pura-pura todea ngata kami nompakau kami mompakasadia baku ala manggaliwo mpaka wemai mosirata ka komi. Kami nipakau ira manguli kami eꞌi batua-batuamu. Jadi kami merapi kabelo rara komi ala mompowia pojanji powega ante kami. 12 Kamai kita komimo roti nipobaku kami e'i. Tempo kami nanggaliwo roti e'i dako nangongo. Tapi kita komimo roti kami e'i nangaumo bo nakawulu. 13 Pade pomboli anggur eꞌi tempo niisi danabelo. Tapi we'i-we'i, kitamo! Naseri puramo! Pade pakea bo sapatu kami wo'u naseri puramo sabana nakawao mpu'u polumako kami e'i.”
14 Jadi tau to Israel nangala baku to nikeni tau to Gibeon etu, tapi ira daꞌa nekutana dota i PUE. 15 Pade Yosua nompowia pojanji powega ante tau to Gibeon etu, bo nojanji da'a mompatesi ira. Topanggeniaka-topanggeniaka to Israel wo'u nojanji ala mompakadupa pojanji ira etu.
Pebagiu to Gibeon ninjani to Israel
16 Tapi ri eo katolueona pojanji etu nikawia, niepe to Israelmo to Gibeon neto'o namosu ante ira, ira neto'o ri bagia tau to Israel. 17 Jadi nalaumo tau to Israel nompekinoto, bo ri eo katolueona naratamo ira ri kota-kota to Gibeon etu; etumo kota Gibeon, kota Kefira, kota Beerot bo kota Kiryat-Yearim. Ninjani iramo ngata-ngata etu kakonona peto'o-peto'o to Gibeon etu. 18 Tapi tau to Israel da'a mamala mompatesi ira, sabana topanggeniaka-topanggeniaka tau to Israel nojanjimo ka ira to Gibeon ante nanguli sanga i PUE Alatala to Israel. Jadi nonguamo pura-pura todea Israel ka topanggeniaka-topanggeniaka ira ewa nuapa to najadina.
19 Tapi notesamo topanggeniaka-topanggeniaka tau to Israel etu, “Nuapapa raulita! Nojanjimo kami ka tau to Gibeon ante nanguli sanga i PUE Alatala Israel. We'i-we'i kita da'a mamala mompakasusa ira. 20 Kita da'a mamala mompatesi ira sabana nojanjimo kita ka ira. Pade ane kita mombaliunaka pojanji etu, Alatalata kana mombasuku kita. 21 Jadi pakambamo to Gibeon etu matuwu, tapi kita pura-pura mompajadi ira topobingga kayu bo topantombu ue ka kita pura-pura.” Iwetumo to nipakau topanggeniaka-topanggeniaka tau to Israel etu.
22 Pade Yosua nompokio tau to Gibeon etu mantingayo iꞌa pade niulina ka ira, “Nakuya komi nombabagiu kami ante nanguli ngata komi nakawao mpu'u, tanu peto'o komi aga namosu ri se'i? 23 Sabana etu komi kana rasuku Alatala. Komi batena majadi batua, topobingga kayu bo topantombu ue ka sapo PUE Alatalaku.”
24 Nesonomo ira, “Batua-batuamu e'i nowia iwetu sabana niepe kami PUE Alatala to nisomba komi nompakau batua-Na i Musa mombawai ka komi pura-pura ngata e'i bo mompatesi pura-pura todeana tempo komi mangala tana e'i. Naeka mpu'u rara kami ne'e-ne'e kami wo'u rapatesi komi. Etumo sabana sampe pura-pura e'i nikawia kami. 25 Jadi we'i-we'i kami batua-batuamu riara poparentamu. Powiamo kami mantuki nuapa to mukita mabelo.”
26 Jadi iwe'imo to nipowia Yosua ka ira. I'a nanggalendu tau to Gibeon etu pade da'a nompaloga tau to Israel mompatesi ira. 27 Tau to Gibeon etu nipajadi Yosua batua, topobingga kayu bo topantombu ue ka tau to Israel bo ka petoꞌo to rapelisi PUE majadi petoꞌo mpesomba ka Iꞌa. Pade etumo to najadi sampe weꞌi-weꞌi.