Tau to Amori nidagi tau to Israel
10
Adoni-Zedek, magau Yerusalem,a nangepe kareba Yosua nombadagi bo nompakaropu kota Ai ewa to nikawiana ka kota Yerikho bo magauna. Pade niepena woꞌu tau-tau to Gibeon nanggawia pojanji powegamo ante tau to Israel pade neto'o ri tatongo-tongo ira. 2 Jadi naeka mpuꞌumo iꞌa bo todeana, sabana kota Gibeon nabete mpuꞌu nasimbayu betena ante kota-kota to naria magauna, pade neliu nggabetepa nggari kota Ai. Pura-pura pue ngata etu wo'u natadulako bo nata'u nosibali. 3 Sabana etu Adoni-Zedek, magau Yerusalem, nompakau tau malau mpaka ri ja'i Magau Hoham ri Hebron, Magau Piream ri Yarmut, Magau Yafia ri Lakhis bo Magau Debir ri Eglon, ante nanggeni tewai iwe'i: 4 “Kamai tulungimo aku mangewa kota Gibeon, sabana ira naopumo nompowia pojanji powega ante Yosua bo todea Israel.”5 Jadi nasiromumo alima mbaꞌa magau nto Amori etu, etumo magau kota Yerusalem, magau kota Hebron, magau Kota Yarmut, magau kota Lakhis bo magau kotaEglon. Pade nalaimo ira nosanggani-nggani ante pura-pura tantara ira. Pade ira notenda nantatiku kota Gibeon, bo nosibali ka tau to Gibeon etu.
6 Pade tau to Gibeon nompakatu kareba e'i ka Yosua ri petoꞌo potenda to Israel ri Gilgal, “Uma, ne'e rapakamba kami! Kamaimo pakasalisa mantulungi bo mompakasalama kami, sabana pura-pura tantara magau nto Amori nggari bagia buluna nasintuwu mangewa kami!”
7 Jadi nanggaliwomo Yosua nggari Gilgal nosanggani-nggani ante tantara-tantarana malau mosibali. Ira pura-pura tadulako to neliu nggaroso. 8 Nangulimo i PUE ka Yosua, “Ne'e maeka ka ira, sabana nipakatantu-Kumo ira kana radagi komi. Da'a kamba sambaꞌa nggari ira mompakule mangewa komi.”
9 Njambengi ntua Yosua bo tantara-tantarana nalau nggari Gilgal sampe narata ri kota Gibeon, pade nombasuaki tau-tau to Amori ante daꞌa ninjani-njani. 10 Pade i PUE nompakagado tantara to Amori tempo nanggita tantara to Israel, sampe nadea tau to Amori nipatesi ri kota Gibeon. Pade tau to danatuwuna niraga ira sampe ri pantendena mpaka ri ngata Bet-Horon, bo nipatesi ira sampe narata ri ngata Azeka bo ngata Makeda ri sabingga puluna. 11 Tempo tau to Amori notua nggari buluna sabana nangowa nalai nggari ja'i tantara Israel, i PUE nompakadunggu uja es to nabete-betena nggari langi nombarunju ira pumpu jala sampe narata ri ngata Azeka. To namate nirunju uja es etu neliu nggadeapa pade to nipatesi tau to Israel.
12 Ri eo etu tempo i PUE nantulungi tau to Israel nombadagi tau to Amori, notesamo Yosua ka i PUE. Pade ri ngayo tau to Israel niulina iweꞌi:
“He, mata eo! Peta'amo ri baꞌa bagia Gibeon.
Pade iko wula, ne'epa molinja
nggari ba'a Lemba Ayalon.”
13 Pade neta'a mpuꞌumo mata eo, bo wula da'a nolinja ri langi sampe naopu to Israel nombadagi bali-bali ira. Kajadia e'i nitulisi riara Buku Yasar.b Njineo ntua mata eo neta'a ri tatongo-tongo langi. Nasae mpu'u pade nasolo. 14 Da'apa ntoto sanggani najadi ewa eo etu, pade mana maria majadi ewa eo etu. PUE nantuki dota manusia. PUE nomporoa tau to Israel nosibali!
15 Naopu posibali etu, natinggulimo Yosua nosanggani-nggani ante tantarana mpaka ri petoꞌo potenda ira ri Gilgal.
Yosua nanjoko lima mbaꞌa magau tau to Amori
16 Tapi tempo to Israel etu da'apa natingguli mpaka ri potenda ira, alima mbaꞌa magau to Amori etu namala nalai bo netabuni riara saongu bololia namosu ngata Makeda. 17 Naria tau nanggita ira netabuni, pade nitesa ntaumo ka Yosua petoꞌo ira netabuni etu. 18 Nangulimo Yosua, “Luliakamo watu-watu bete mombatutu bololia etu bo pakaumo tau mombajagai ri setu. 19 Tapi komi ne'e menonto ri setu. Raga njuꞌumo balimu, pade suakimo ira to Amori nggari taliku. Ne'e rapakamba ira mesua ri kota-kota ira! PUE Alatalata nantulungi komi nombadagi ira to Amori.” 20 Nadea mpuꞌu tau to Amori nipatesi Yosua ante tau to Israel. Tapi naria wo'u ri olo ira to nalai mpaka ri kota nangelo pekalendu, sampe ira da'a naopu nipatesi.
21 Naopu etu natingguli puramo tantara Yosua ante nasalama mpaka ri ja'ina ri petoꞌo potenda ira ri Makeda. Da'a kamba sambaꞌa tau ri bagia etu nabia nanguli nuapa-nuapa mangewa tau to Israel.
22 Naopu etu nangulimo Yosua, “We'i-we'i kaliakamo watu-watu bete to nombatutu bololia etu, pade keni wemaimo alima mbaꞌa magau to Amori etu ka aku.” 23 Jadi nikaliakamo watu-watu bete to nombatutu bololia etu, pade nisuwurakamo magau kota Yerusalem, magau kota Hebron, magau kota Yarmut, magau kota Lakhis bo magau kota Eglon mpaka ri sawalikuna. 24 Pade ira nikeni mpaka ri ja'i Yosua. Pade nipokio Yosuamo pura-pura tau to Israel nasiromu. Naopu etu niparentana ala pura-pura balengga tantara to nantuki i'a nosibali marata mombadika kada ira ri kayu tambolo magau-magau etu.c 25 Naopu etu nangulimo Yosua ka tantara-tantarana, “Ne'e masusa bo maeka. Komi kana momparasaya bo mabia, sabana iwe'imo akala i PUE mompowia bali-balimu.”
26 Pade nipatesi Yosuamo magau-magau etu pade niloenamo ira ri alima mpeka tinja. Watabaku ira nipakamba ri setu sampe nangguwia. 27 Nantuki parenta Yosua, tempo nasolomo, watabaku-watabaku etu nitauraka pade nitajaka riara bololia to nipake magau-magau etu netabuni pangane. Pade bololia etu ni'iwu ante watu-watu bete. Pade watu-watu etu danariapa ri setu sampe weꞌi-weꞌi.
Yosua wo'u nomba'ago neliu nggadea bagia tau to Amori ri sabinga puluna
28 Ri eo etu woꞌu Yosua nombasuaki kota Makeda, pade nombadagi kota etu bo magauna. Pura-pura todea kota etu nipatesina. Da'a kamba sambaꞌa nipakambana natuwu. Nikawiana ri jaꞌi magau kota Makeda nasimbayu ewa nikawiana ka magau kota Yerikho.
29 Naopu etu nalaimo Yosua ante tantarana nggari kota Makeda napola mpaka ri kota Libna bo nombasuaki kota etu. 30 PUE wo'u nantulungi tau to Israel nombadagi todea ri kota-kota etu bo magauna. Da'a kamba sambaꞌa nipakamba natuwu. Pura-pura tau riara kota etu nipatesi. Nikawia Yosua ri jaꞌi magau kota Makeda nasimbayu ewa nikawiana ka magau kota Yerikho.
31 Naopu etu nalaimo Yosua bo tantarana nggari kota Libna napola mpaka ri kota Lakhis pade nantatiku bo nombasuaki kota etu. 32 PUE nantulungi tau to Israel nombadagi tau to Lakhis riara posibali ri eo ka roeona. Nuapa to nikawia Yosua ri kota Libna, nikawiana wo'u ri kota Lakhis. Da'a kamba sambaꞌa nipakambana natuwu, pura-pura tau riara kota etu nipatesina. 33 Tempo etu i Horam, magau kota Gezer narata nantulungi tau to Lakhis, tapi Yosua nombadagi i'a ante tantarana. Da'a kamba sambaꞌa wo'u niboli, ira pura-pura nipatesina.
34 Naopu etu nalaimo Yosua bo tantarana nggari kota Lakhis napola mpaka ri kota Eglon, pade nantatiku bo nombasuaki kota etu. 35 Eo etu wo'u ira nombadagi kota Eglon, bo nompatesi pura-pura tau ri setu ewa to nikawia ira ri kota Lakhis.
36 Nggari kota Eglon, nantendemo Yosua bo tantarana ri buluna nalau mpaka ri kota Hebron. Pade kota etu nisuaki 37 bo nidagi ira. Magauna bo butu mba'a tau ri kota etu bo tau ri kota-kota ntanina ri sinjorina ri setu, nipatesi puramo. Kota etu nipakagero Yosua nasimbayu ewa to nikawiana ri kota Eglon. Da'a kamba samba'a tau nipakambana natuwu ri setu.
38 Naopu etu, natinggulimo Yosua bo tantarana nombasuaki kota Debir. 39 Kota etu bo magauna ante pura-pura kota ntanina ri sinjorina ri setu nidagi Yosua. Pura-pura tau ri setu nipatesi. Nikawia Yosua ka kota Debir bo magauna nasimbayu ewa to nikawiana ka kota Hebron bo kota Libna ante magauna.
40 Pura-pura bagia etu nidagYosua. I'a nombadagi magau ri buluna, ri kente-kente nu bulu sabingga pebuluna, ri kada-kada nu bulu sabingga kasolona, bo ri bulu rapa sabingga puluna. Da'a kamba samba'a wo'u nipakamba natuwu; pura-pura nipatesi, nantuki parenta nggari ja'i PUE Alatala Israel. 41 Yosua nombadagi bagia-bagia nggari Kades Barnea ri sabingga puluna sampe narata ri Gaza namosu ri wiwi ntasi, nesua bagia Gosyen, napola sampe ri kota Gibeon ri sabingga tasina. 42 Riarana sanggani nosibali, Yosua nombadagi pura-pura magau etu bo ngata-ngata to niparenta ira, sabana i PUE Alatala Israel nomporoa to Israel nosibali. 43 Naopu etu natinggulimo Yosua bo pura-pura tantarana mpaka ri petoꞌo potenda ira ri Gilgal.