Yosua nombadagi magau-magau ri bagia tasina
11
Tempo Magau Yabin nggari kota Hazor nangepe tau to Israel padagi, nipakaunamo tau malau mpaka ri ja'i Magau Yobab ri kota Madon, bo ri ja'i magau kota Simron bo magau kota Akhsaf, 2 ante magau-magau ri bulu sabingga tasina, ri Lemba Yordan sabingga pulu Galilea, ri bagia kente nu bulu bo ri bagia wiwi ntasi namosu kota Dor. 3 Nipakauna wo'u tau malau mpaka ri jaꞌi tau to Kanaan ri sabingga kasolona bo ri sabingga pebulu nu eo Binangga Yordan, ante tau to Amori, tau to Het, tau to Feris, bo tau to Yebus ri bagia buluna, ante tau to Hewi ri kente Bulu Hermon ri bagia Mizpa. 4 Pade naratamo magau-magau etu ante pura-pura tantara ira to neliu nggadeana, ewa bone ri wiwi talinti. Jara bo kareta mposibali ira wo'u nadea mpu'u. 5 Pura-pura magau etu nasintuwu pade narata notenda mpasanggani-nggani namosu Binangga Meron ala mombasuaki tau to Israel.6 Nangulimo i PUE ka Yosua, “Ne'e maeka ka magau-magau etu bo pura-pura tantarana to neliu nggadeana, sabana tempo we'i wo'u naile, Kupatesi puramo ira ri ngayo komi to Israel. Pura-pura jara ira kana mudapa karantagana bo kareta-kareta mposibali ira kana mupalabu.”
7 Pade nalaumo Yosua bo pura-pura tantarana nombasuaki bali-bali ira etu ante daꞌa ninjani-njani namosu Binangga Merom. 8 PUE nantulungi todea Israel nombadagi bali ira. Tau to Israel nombasuaki bo nombaraga ira nggari Misrefot-Maim sampe ri Sidon ri sabingga tasina, bo sampe ri Lemba Mizpa ri sabingga pebuluna. Posipatesi etu daꞌa nenonto sampe daꞌa kamba sambaꞌa balina naboli, pura-pura nipatesi. 9 Yosua nompowia balina nantuki nuapa to niparenta i PUE. I'a nombadapa karantaga jara ira pade nompalabu kareta-kareta mposibali ira.
10-11 Naopu etu natinggulimo Yosua, pade nombasuaki kota Hazor, sabana kota Hazor etu to neliu nggaroso nggari pura-pura kota ri setu. Kota etu nipalabuna pade magau bo pura-pura todeana nipatesi. Daꞌa kamba sambaꞌa nipalamba natuwu.
12 Pura-pura kota namosu kota Hazor etu, nisuaki Yosua, bo magau-magauna nisoko pade nipatesina, nantuki parenta i Musa batua i PUE. 13 Tapi pura-pura kota to nibangu ri walea kota to nigero nggaulu, daꞌa kamba saongu nipalabu tau to Israel, aga kota Hazor to nipalabu Yosua. 14 Pura-pura todea kota Hazor etu nipatesi tau to Israel, daꞌa kamba sambaꞌa nipakamba ira natuwu. Tapi pura-pura mbara-mbara todea kota etu to nasuli olina bo pompatuwu ira niala tau to Israel najadi bagia ira. 15 Pura-pura to niparenta i PUE ka batua-Na i Musa, nitesa Musamo ka Yosua, pade pura-pura etu nikawia Yosua. Daꞌa kamba sangele parenta to da'a nikawiana.
Bagia-bagia to niago Yosua
16 Yosua nomba'ago pura-pura tana ri bagia buluna, ri bagia kente nu bulu, nabelo ka ri tasina nabelo ka ri puluna; bo pura-pura bagia Gosyen bo ri bagia bulu rapa sabingga pulu Gosyen, ante Lemba Yordan. 17-18 Kaluona bagia etu nompamula nggari Bulu Gundul ri sabingga puluna namosu tana to Edom, sampe narata ri tasina ri Baal-Gad ri Lemba Libanon ri kente Bulu Hermon. Nasae mpuꞌu Yosua nosibali ante magau-magau ri bagia etu, tapi kaopuna i'a nombasoko bo nompatesi ira pura-pura. 19 Nggari pura-pura kota ri bagia etu daꞌa kamba sambaꞌa nompowia pojanji powega ante tau to Israel, aga tau to Hewi to neto'o ri bagia Gibeon. Pura-pura kota ntanina nidagi riara mposibali. 20 PUE nompakakoꞌo rara bali to Israel, sampe ira tunggai nangewa to Israel etu ala pura-pura bali ira etu kana rapatesi ante daꞌa naria ampu, nantuki to niparenta i PUE ka i Musa.
21 Tempo etu wo'u Yosua nalau nompakaropu tau to Enak, etumo tau to mpu'u-mpu'u nalanga bo nabete korona to netoꞌo ri bagia buluna; etumo ri Hebron, Debir, Anab, bo ri pura-pura bagia bulu Yehuda bo Israel. Ira pura-pura nipatesi Yosua, bo kota-kota ira wo'u nipakaropu. 22 Daꞌa kamba sambaꞌa nggari tau to Enak etu naboli ri bagia Israel, aga ri kota Gaza, kota Gat, bo kota Asdod naria to nabolina.
23 Pura-pura tana etu niago Yosua nantuki to niparenta i PUE Alatala ka i Musa, pade niwai Yosua ka tau to Israel najadi bagia ira. Tana etu nibagi-bagi, pade butu-butu suku nombarata bagiana. Naopu etu nenontomo tau to Israel nosibali, pade naꞌamamo ngata ira.