Jos 12

Magau-magau to nidagi Musa

Tempo Musa da'apa namate i'a nanggeniaka todea Israel nombasuaki bo nangago tana ri bagia sabingga pebulu nu eo Binangga Yordan, nompamula nggari Lemba Binangga Arnon napola nantende mpaka ri Lemba Yordan sampe narata ri Bulu Hermon ri sabingga tasina. Pade bagia etu nipeto'o to Israel. Naria rombaꞌa magau to nidagi ira, etumo i Sihon bo Og. 2 Sihon etu magau nto Amori to neto'o ri Hesybon. Bagia to niparentana sabagia nggari tana Gilead, etumo nggari ngata Aroꞌer ri wiwi Lemba Arnon, bo ngata ri tatongo-tongo lemba etu sampe narata ri Binangga Yabok ri kabingga bagia ngata Amon. 3 Nesua wo'u bagia Lemba Yordan sabingga pebuluna, nggari Rano Galilea mpaka ri puluna sampe narata ri kota Bet-Yesimot ri sabingga pebulu nu eo Tasi Mate, napola mpaka ri kente Bulu Pisga.

4 Magau ntanina to nidagi tau to Israel etumo Magau Og nggari bagia Basan, to netoꞌo ri kota Asytarot bo Edrei. I'a sambaꞌa tau to danabolina nggari ngata Refaim. 5 Bagia poparenta Magau Og etu nompamula nggari Bulu Hermon, Salkha, bo pura-pura bagia Basan sampe narata ri bagia Gesur bo Maakha. Nesua wo'u sabagia nggari Gilead sampe narata ri bagia to niparenta Magau Sihon ri ngata Hesybon.

6 Sihon bo Og etumo rombaꞌa magau to nidagi i Musa ante tau to Israel. Tana magau-magau etu niwai i Musa batua i PUE etu, ka suku Ruben, suku Gad, bo sabagia suku Manasye, ala majadi tana ira mboto.

Magau-magau to nidagi Yosua

7 Magau-magau to nidagi Yosua ante tau to Israel etumo pura-pura magau ri bagia sabingga kasolo nu eo Binangga Yordan, nggari Baal-Gad ri Lemba Libanon napola sampe ri Bulu Gundul ri sabingga puluna namosu ngata tau to Edom. Bagia etu nibagi-bagi Yosua ka suku-suku Israel ala majadi bagia ira mboto. 8 Bagia etu nesua bagia buluna, bagia kente nu bulu ri sabingga kasolo nu eo Lemba Yordan ante bagia kente nu bulu, bagia kente-kentena ri sabingga pebuluna, bo bagia bulu rapa sabingga puluna. Bagia-bagia etu walea ngata ntau to Het, tau to Amori, tau to Kanaan, tau to Feris, tau to Hewi bo tau to Yebus.

9-24 Kadea pura-pura magau to nidagi tau to Israel tolumpulu bo sambaꞌa. Ira etumo magau nggari kota-kota e'i:

Yerikho,

Ai (namosu Betel),

Yerusalem,

Hebron,

Yarmut,

Lakhis,

Eglon,

Geser,

Debir,

Geder,

Horma,

Arad,

Libna,

Adulam,

Makeda,

Betel,

Tapuah,

Hefer,

Afek,

Lasaron,

Madon,

Hazor,

Simron-Meron,

Akhsaf,

Taanakh,

Megido,

Kedes,

Yokneam (ri Karmel),

Dor (ri wiwi ntalinti),

Goyim (ri Galilea) bo

Tirza.