Bagia-bagia Tana Kanaan to daꞌapa niago
13
Tempo natuꞌa mpuꞌumo Yosua, nangulimo i PUE ka iꞌa, “Natuꞌamo iko, tapi danadeapa bagia tana daꞌapa namala niago. 2 Iweꞌimo tana anu daꞌapa niago: Pura-pura bagia nto Filistin bo to Gesur, 3 bo pura-pura bagia nto Awi mpaka ri puluna. (Bagia nggari Binangga Sikhor ri pobingga Tana Masir narata ri pobingga ngata Ekron ri sabingga tasina, pura-pura etu nireke bagia tau to Kanaan; bo magau-magau to Filistin netoꞌo ri ngata Gaza, Asdod, Askelon, Gat bo Ekron.) 4 Pade pura-pura bagia Tana Kanaan bo Meara (ngata ntau to Sidon), sampe ri ngata Afek ri kabingga bagia tana nto Amori kana raꞌago woꞌu. 5 Waꞌa woꞌu bagia tana to Gebal, bo pura-pura bagia ri sabingga pebulu Tana Libanon, nggari ngata Baal-Gad ri sabingga puluna Bulu Hermon, mapola sampe ri jala mpaka ri ngata Hamat. 6 Nesua wo'u pura-pura bagia ntau to Sidon, to netoꞌo ri bagia buluna ri olo bulu-bulu Libanon bo Misrefot-Maim. Pura-pura tau etu kana Kupasuma banepia tempo todea-Ku Israel mosibali ka ira. Tana eꞌi kana mubagi-bagi ka todea-Ku Israel ala majadi bagia ira, ewa to niparenta-Ku ka iko. 7 Jadi we'i-we'i pakatantumo bagia tana etu ka sasio suku to Israel, bo ka sabagia nggari suku Manasye, ala tana etu majadi bagia ira.”Tana to nibagi ri sabingga pebulu eo Binangga Yordan
8 Suku Ruben bo Gad ante santongo nggari suku Manasye nantarima tana to nibagi Musa, batua i PUE ka ira. Tana etu ri sabingga pebulu eo Binangga Yordan. 9 Bagia ira etu nompamula nggari ngata Aroꞌer ri wiwi lemba Binangga Arnon, bo ngata ri tatongo lemba etu, pade lemba naluo ri bagia buluna nggari ngata Medeba sampe ri ngata Dibon, 10 bo narata ri kabingga bagia nto Amon, nesua pura-pura ngata to niparenta Sihon, magau nto Amori bopia, to netoꞌo ri ngata Hesybon. 11 Nesua wo'u bagia Gilead, bagia nto Gesur bo to Maakha, ante pura-pura bulu Hermon, bo pura-pura bagia Basan sampe ri ngata Salkha. 12 Bagia ira wo'u nesua bagia to niparenta Magau Og to noparenta ri ngata Astarot bo Edrei. Iꞌa tau to naboli nggari tau Refaim to nidagi bo nipasuma i Musa bopia. 13 Tapi todea to Gesur bo to Maakha daꞌa nipasuma ntau to Israel. Ira danetoꞌo ri tatongo to Israel sampai weꞌi-weꞌi.a
14 Suku Lewi daꞌa nombarata tana to nibagi Musa, sabana to najadi bagia ira etumo pesomba-pesomba nitunu to niwai to Isael ka i PUE, ewa to nijanji-Na ka ira."b
Tana to nipobagia ka suku Ruben
15 Sabagia nggari tana to nijanji PUE ka todea Israel etu niwai Musamo ka suku Ruben nantuki butu-butu ongu njapo ala majadi bagia ira. 16 Bagia ira etu nompamula nggari ngata Aroꞌer ri wiwi lemba Binangga Arnon, bo ngata ri tatongo-tongo lemba etu sampe narata ri pura-pura lemba to naluona ri bagia buluna namosu ngata Medeba; 17 pade ngata Hesybon bo pura-pura ngata ri lemba to naluona, etumo Dibon, Bamot-Baal, Bet-Baal-Meon, 18 Yahas, Kedemot, Mefaat, 19 Kiryataim, Sibma, Zeret-Hasahar to naria ri baꞌa bulu ri lemba etu, 20 Bet-Peor, kente-kente nu Bulu Pisga, bo ngata Bet-Yesimot. 21 Nesua wo'u pura-pura ngata ri lemba to naluona etu, pura-pura bagia to niparenta i Sihon, magau nto Amori to netoꞌo ri Hesybon nggaulu. Iꞌa bo topanggeniaka-topanggeniaka nto Midian wo'u nidagi Musa; ira etumo: Ewi, i Rekem, i Zur, i Hur bo i Reba. Pura-pura topanggeniaka etu nanggeniaka ngata ka Magau Sihon.
22 Ri olo tau-tau to nipatesi tau to Israel naria wo'u i Bileam ana i Beor, topeanto.c 23 Binangga Yordan najadi pobingga ri sabingga kasolona bagia suku Ruben. Etu puramo kota-kota bo ngata-ngata to niwai ka suku Ruben ala majadi tana bagia ira.
Tana to nipobagia ka suku Gad
24 Sabagia tana to nijanji PUE ka todea Israel etu wo'u niwai Musamo ka suku Gad nantuki butu-butu ongu njapo ala majadi bagia ira. 25 Bagia ira etumo ngata Yaser bo pura-pura ngata ri Bagia Gilead ante santongo nggari tana ntau to Amon sampe narata ri ngata Aroꞌer ri sabingga pebulu eo ngata Raba; 26 pade bagia nggari ngata Hesybon sampe ri ngata Ramat-Mizpa bo Betonim, ante bagia nggari ngata Mahanaim sampe ri pobingga Debir. 27 Ri Lemba Yordan, bagia suku Gad etu nompamula nggari ngata Bet-Haram, Bet-Nimra, Sukot, bo Zafon, etumo tana labi poparenta Magau Sihon ri Hesybon. Kabingga bagia kasolona bagia suku Gad etu Binangga Yordan sampe narata ri rano Galilea ri sabingga tasina. 28 Etumo kota-kota bo ngata-ngata to niwai ka suku Gad nantuki butu-butu ongu njapo ala majadi bagia ira.
Tana ri sabingga pebulu nu eo Binangga Yordan to nipobagia ka santongo nggari suku Manasye
29 Sabagia nggari tana to nijanji PUE ka todea Israel etu woꞌu niwai Musamo ka santongo suku Manasye nantuki butu-butu ongu njapo ala majadi bagia ira. 30 Pantaꞌa bagia ira sampe narata ri ngata Mahanaim, nesua pura-pura Bagia Basan, etumo pura-pura bagia to niparenta Og, magau Basan, bo onompulu ngata i Yair ri Bagia Basan. 31 Nesua wo'u santongo Bagia Gilead, ante ngata Asytarot bo Edrei, etumo rongu ibu kota bagia to niparenta Magau Og ri Bagia Basan. Pura-pura bagia etu niwai ka santongo nggari muli Makhir, ana i Manasye, saongu njapo saongu njapo majadi bagia ira.
32 Iwetumo Musa nombabagi tana ri sabingga pebulu nu eo ngata Yerikho, ri sambote Binangga Yordan tempo iꞌa naria ri lemba to naedena ri Tana Moab. 33 Tapi suku Lewi daꞌa nombarata bagia tana nggari jaꞌi Musa nau aga sakedi. To majadi bagia ira etumo PUE Alatala to nisomba nto Israel, ewa to nijanji-Na ka ira bopia.d