Pobagi tana ri sabingga kasolo eo Binangga Yordan
14
Iwe'imo tesa pobagi Tana Kanaan ri sabingga kasolo Binangga Yordan to nibagi ka todea Israel. To nombabagi-bagi tana etu ka todea Israel etumo Eleazar balengga topanggeni agama, ante Yosua ana i Nun, bo totuꞌa-totuꞌa riara suku-suku to Israel. 2 Ewa to niparenta i PUE Alatalamo ka i Musa, bagia-bagia ri sabingga kasolo eo Binangga Yordan to nipakatantu ka sasio santongo suku Israel, kana rabagi-bagi ante mowia nomoro. 3-4 Muli Yusuf nibagi najadi rongu suku, etumo suku Manasye bo suku Efraim. Pade tana ri sabingga pebulu nu eo Binangga Yordan naopu nibagi Musa ka suku Ruben, suku Gad bo santongo nggari suku Manasye. Ane suku Lewi daꞌa ria tana to niwai Musa ka ira. Ira aga niwai ka kota-kota rapetoꞌo ira, ante karawa-karawa rapompatuwu japi bo bimba ira. 5 Iwetumo todea Israel nobagi-bagi tana nantuki to niparenta i PUE Alatala ka i Musa.Ngata Hebron niwai ka i Kaleb
6 Naria saeo tau-tau nggari suku Yehuda narata nosintomu ka Yosua ri Gilgal. Naria sambaꞌa nggari ira, etumo i Kaleb ana Yefune tau to Kenas. Nangulimo iꞌa ka Yosua, “Ninjanimu nuapa to niuli PUE Alatala bopia ka suro-Na i Musa ri Kades-Barnea ewa iko bo aku. 7 Tempo aku nipakau i Musa batua PUE Alatala etu nggari Kades Barnea najadi mata-mata ala mompekinoto tana e'i aku noumuru patampulu mpae. Pade aku nanjili ri ja'ina ante nanggeni pantesa to nakonona. 8 Tau-tau to nalau mpasanggani ante aku nompakaeka rara todea Israel.a Tapi aku batena natutu nantuki parenta i PUE Alatalaku ante mpuꞌu-mpuꞌu raraku. 9 Jadi ri eo etu i Musa nojanji ka aku iwe'i: “Tana to nilonggo-longgomu etu kana rawai ka iko bo ana-anamu majadi bagia komi sampe ri kasae-saena, sabana iko natutu nantuki i PUE Alatalata ante mpuꞌu-mpuꞌu raramu.”b
10 Weꞌi-weꞌi patampulu bo alima mpaemo janji etu nitesa i PUE ka i Musa. Pade i PUE batena nanggalendu aku tempo kita to Israel nolumako ri karawa baina, sampe aku danatuwu weꞌi-weꞌi ewa to nijanji-Na bopia. Kitamo, we'i-we'i aku noumuru walumpulu bo alima mpae, 11 tapi aku danaroso nasimbayu ewa tempo i Musa nompakau aku. Aku danarosopa mosibali atau mowia nuapa-nuapa. 12 Jadi waimo ka aku bagia buluna to nijanji PUE Alatala ka aku tempo aku bo tau-tau to nosanggani-nggani ka aku nanjili nanggeni tesa. Tempo etu niepemu mboto ri tana etu naria tau to neliu nggalanga bo nabete to niuli to Enak. Ira neto'o ri kota-kota bete to naria tembo pekalenduna. Tapi nisarumakaku ante petulungi PUE aku kana mompopalai ira ewa to niuli-Na bopia.”
13 Jadi Yosua nompoiyo tesa i Kaleb ana Yefune, pade niwaina ka i'a kota Hebron najadi tana bagiana. 14 Sampe we'i-we'i kota etu batena najadi bagia muli i Kaleb ana Yefune, tau to Kenas etu, sabana i'a natutu nantuki PUE Alatala to nisomba to Israel ante mpu'u-mpu'u rarana. 15 Tempo nggaulu kota Hebron niuli kota Arba, nantuki sanga Arba. Arba sambaꞌa tadulako to neliu nggaroso nggari olo tau-tau to Enak.
Naopu etu naamamo tana etu, mana ria posibali.