Tana to nipobagia ka suku Yehuda
15
Iweꞌimo tana to niwai ka suku Yehuda nantuki butu-butu ongu njapo majadi bagia ira:Ri sabingga puluna, tana etu nandate sampe ri puluna ntoto tana karawa baina to nosanga ka Zin ri kabingga Tana Edom; 2 nompamula nggari tampa puluna Tasi Mate, 3 napola mpaka ri puluna nantuki kente-kente bulu Akrabim sampe karawa baina nosanga ka Zin. Napola mpaka ri puluna ngata Kades-Barnea, napola noliu ri ngata Hezron, nantende mpaka ri ngata Adar, pade negoli mpaka ri ngata Karka. 4 Nggari setu napola wo'u mpaka ri ngata Azmon, pade nosaꞌu binangga nggedi ri pobingga Tana Masir, pade pantaꞌana ri Tasi Tongo. Etumo pantaꞌa tana sabingga puluna to niwai ka suku Yehuda.a
5 Ri sabingga pebuluna pantaꞌana Tasi Mate, mapola mpaka ri sabingga tasina marata ri bamba Binangga Yordan.
Ri sabingga tasina, pantaꞌana nompamula nggari bamba Binangga Yordan etu, 6 nantende mpaka ri Bet-Hogla, pade napola mpaka ri pantaꞌa Lemba Yordan.b Nggari kabingga tasina etu nantende njuꞌu mpaka ri sabingga tasina sampe narata ri Batu Bohanc (Bohan muli Ruben), 7 pade napola mpaka ri Lemba Akhord sampe narata ri Debir, pade negoli wo'umo mpaka ri tasina mpaka ri Gilgal ri petoꞌo to nosintingayo ante kente-kente bulu ri Adumim ri sabingga puluna ri lemba etu. Nggari setu napola wo'umo mpaka ri ulu ue En-Semes, pade mpaka ri En-Rogel, 8 pade nantende mpaka ri Lemba Hinom mpaka ri sabingga pulu nu bulu, petoꞌo ngata Yerusalem, kota to Yebus. Nggari setu panta'ana etu mapola mpaka ri bunggu bulu etu ri sabingga kasolo Lemba Hinom, ri tampa puluna Lemba Refaim. 9 Pade napola mpaka ri ulu-ulu eu Me-Neftoah, sampe ri kota-kota namosu Bulu Efron. Nggari setu pobingga tana etu negoli mpaka ri ngata Baala (etumo Kiryat-Yearim), 10 pade negoli nggari Baala mpaka ri kasolona ri Bulu Seir, pade napola mpaka ri bagia tasi Bulu Yearim (etumo Bulu Kesalon), pade notua mpaka ri ngata Bet-Semes, bo napola mpaka ri ngata Timna. 11 Nggari ngata Timna, kabinga etu napola mpaka ri sabingga tasina Bulu Ekron, pade negoli mpaka ri ngata Sikron, noliu ri Bulu Baala, napola mpaka ri ngata Yabneel, pantaꞌana ri Tasi Tongo.
12 Tasi Tongo bo wiwina najadi pantaꞌa pobingga kasolona bagia suku Yehuda. Etu puramo pantaꞌa tana to nipetoꞌo tau-tau nggari suku Yehuda nantuki butu-butu ongu njapo.
Kaleb nombaago kota Hebron bo kota Debir
13 Nantuki to niparenta i PUE ka Yosua, sabagia tana Yehuda rawai ka i Kaleb ana Yefune nggari suku Yehuda. I'a rawai ka kota Hebron, kota bagia Arba, uma Enak. 14 Muli Enak to Sesai, to Ahiman bo to Talmai. Kaleb nompopalai ira pura-pura nggari kota Hebron. 15 Nggari setu i'a nalau nombasuaki tau to Debir. (Kota etu nggaulu niuli Kiryat-Sefer). 16 Nangulimo Kaleb, “Sema-sema mamala mombaago kota Kiryat-Sefer, i'a mamala momporongo anaku besi, Akhsa.” 17 Nangepe etu Otniel, ana nggari sampesuwu i Kaleb to nosanga ka i Kenas, nombaago kota etu. Jadi niwai Kalebmo anana Akhsa najadi rongo Otniel. 18 Ri tempo eo mponikana, Otniel nitanara Akhsa merapi sabagia tana nggari ja'i umana i Kaleb. Tempo Akhsa nana'u nggari keledaina, nekutanamo umana ka i'a, "Nuapa to mupodota?"
19 Nesonomo Akhsa, “Aku madota merapi bara sakuya ulu ue, sabana tana to niwai uma ka aku tana to nangau.” Jadi niwai Kaleb ka i'amo ulu ue nggari uluna bo ulu ue ri lumbuna.
Kota-kota to niwai ka Suku Yehuda
20 E'imo kota to niwai ka tau-tau riara suku Yehuda ala majadi bagia ira: 21-32 Kota-kota to neliu kakawaona ri sabingga puluna to najadi bagia to Yehuda, namosu kabingga tana nto Edom, pura-pura naria rompulu bo sasio kota, nesua wo'u ngata-ngata ri sinjorina. E'imo kota-kota etu:
Kabzeel, Eder, Yagur, Kina, Dimona, Adada, Kedesh, Hazor, Yitnan, Zif, Telem, Bealot, Hazor-Hadata, Keriot-Hezron (etumo Hazon), Amam, Sema, Molada, Hazar-Gada, Hesmon, Bet-Pelet, Hazar-Sual, Bersyeba bo ngata-ngata to namosuna, Baala, Iyim, Ezem, Eltolad, Kesil, Horma, Ziklag, Madmana, Sansana, Lebaot, Silhim, Ain bo Rimon.
33-36 Kota-kota bo ngata-ngata ri sinjorina to naria ri kente-kente bulu, kadeana pura-pura sampulu bo ampa kota. Sanga kota etu:
Esytaol, Zora, Asna, Zanoah, En-Ganim, Tapuah, Enam, Yarmut, Adulam, Sokho, Azeka, Saaraim, Aditaim, Gedera, bo Gederotaim.
37-41 Naria wo'u sampulu aono kota e'i nosanggani ka ngata-ngata ri sinjorina:
Zenan, Hadasa, Migdal-Gad, Dilean, Mizpa, Yokteel, Lakhis, Bozkat, Eglon, Kabon, Lahmas, Kitlis, Gederot, Bet-Dagon, Naama, bo Makeda.
42-44 Naria wo'u sasio kota e'i nosanggani ka ngata-ngata ri sinjorina:
Libna, Eter, Asan, Yiftah, Asna, Nezib, Kehila, Akhzib bo Maresa.
45 Naria wo'u kota Ekron ante kota-kota nggedi bo ngata-ngatana; 46 ante pura-pura kota bo ngata-ngata namosu Asdod, nggari Ekron sampe mpaka ri Tasi Tongo. 47 Wetu wo'u kota Asdod bo kota Gaza ante kota-kota nggedi bo ngata-ngata to nosimpotatare sampe namosu binangga nggedi ri pobingga Tana Masir bo talinti Tasi Tongo.
48-51 Ri bagia buluna naria sampulu saongu kota nosanggani ka ngata-ngata ri sinjorina:
Samir, Yatir, Sokho, Dana, Kiryat-Sana (etumo Debir), Anab, Estemo, Anim, Gosyen, Holon, bo Gilo.
52-54 Naria wo'u sasio kota e'i, nesua wo'u ngata-ngata ri sinjorina:
Arab, Duma, Esan, Yanum, Bet-Tapuah, Afeka, Humta, Kiryat-Arba (etumo Hebron) bo Zior.
55-57 Naria wo'u sampulu kota e'i nosanggani-ka ngata-ngata ri sinjorina:
Maon, Karmel, Zif, Yuta, Yizreel, Yokdeam, Zanoah, Kain, Gibea bo Timna.
58-59 Naria wo'u aono kota e'i nosanggani ka ngata-ngata ri sinjorina:
Halhul, Bet-Zur, Gedor, Maarat, Bet-Anot, bo Eltekon.
60 Naria wo'u rongu kota e'i nosanggani ka ngata-ngata ri sinjorina:
Kiryat-Baal (etumo Kiryat-Yearim) bo Raba.
61-62 Ri bagia karawa baina, naria aono kota nosanggani ka ngata-ngata ri sinjorina:
Bet-Araba, Midin, Sekhakha, Nibsan, Kota Garam, bo En-Gedi.
63 Tau to Yehuda da'a namala nompopalai tau to Yebus to neto'o ri Kota Yerusalem. Sampai we'i-we'i tau to Yebus daneto'o nosanggani ka tau to Yehuda ri kota etu.