Tana to nipobagia ka Suku Efraim bo Suku Manasye
16
Kabingga tana to niwai ka muliYusuf,a nompamula nggari Binangga Yordan namosu kota Yerikho, ri sabingga pebuluna mata ue Yerikho sampe narata ri karawa baina. Nggari kota Yerikho kabingga etu nantende sampe ri ngata Betel ri bagia buluna. 2 Nggari ngata Betel, kabingga etu napola mpaka ri ngata Lus, nombaliunaka Ataro, etumo petoꞌo ntau to Arki. 3 Nggari setu kabingga etu napola mpaka ri kasolona bagia to Yaflet, sampe ri ngata Bet-Horon-Hilir, pade nggari setu napola mpaka ri ngata Geser, pade kaopuna narata ri Tasi Tongo.4 Etumo tana nipobagia ka suku Manasye bo suku Efraim, muli Yusuf majadi bagia ira.
Tana to nipobagia ka Suku Efraim
5 Iweꞌimo pobingga-pobingga tana to niwai ka butu-butu ongu njapo riara suku Efraim. Kabingga ntana ira ri sabingga pebuluna nompamula nggari ngata Atarot-Adar sampe ri ngata Bet-Horon-Hulu, 6 pade napola mpaka ri Tasi Tongo. Pade Mikhmetat naria ri sabingga tasina. Ri sabingga pebuluna kabingga etu negoli mpaka ri Taanat-Silo, pade noliu nggari sabingga pebuluna napola mpaka ri Yanoah. 7 Nggari setu kabingga etu notua mpaka ri Atarot bo Naharat, pade nosaꞌu bagia Yerikho sampe narata ri Binangga Yordan. 8 Ri sabingga kasolona kabingga tana to Efraim etu nompamula nggari ngata Tapuah sampe ri Binangga Kana, sampe narata ri Tasi Tongo. Etumo tana to nipobagia ka butu-butu ongu njapo suku Efraim ala majadi bagia ira, 9 nesua wo'u kota nggedi bo ngata-ngata to nipakatantu ka suku Efraim to naria riara bagia suku Manasye. 10 Tapi to Israel daꞌa nompopalai tau to Kanaan nggari ngata Geser. Etu sabana sampe we'i-we'i tau to Kanaan danetoꞌo ri ngata Geser nosangani-nggani ka tau to Efraim. Tapi ira nipasuꞌu nokarajaa najadi batua ntau to Efraim.