Tana to nipobagia ka Suku Manasye ri sabingga kasolo nu eo Binangga Yordan
17
Sabagia tana ri kasolo nu eo Binangga Yordan niwai ka tau-tau muli Manasye, ana ulumbua i Yusuf. Makhir, uma i Gilead, i'amo ana ulumbua i Manasye. Sabana i'a sambaꞌa tantara, niwai ka i'amo tana Gilead bo Basan to naria ri sabingga pebulu nu eo Binangga Yordan. 2 Tana ri sabingga kasolo nu eo Binangga Yordan niwai ka tau-tau ntanina nggari muli Manasye, etumo Abiezer, i Helek, Asriel, i Sekhem, i Hefer bo i Semida; pura-pura etu muli langgai nggari Manasye ana i Yusuf. Ira etumo topanggeniaka-topanggeniaka todea ira.3 Tapi Zelafehad ana i Hefer makumpu i Gilead ana i Makhir makumpu i Manasye, daꞌa naria anana langgai, aga ana besi. Ira etumo: i Mahla, i Noa, i Hogla, i Milka bo i Tirza. 4 Ira nalau mpaka ri ja'i Eleazar balengga topanggeni agama, Yosua ana i Nun ante pura-pura topanggeniaka, pade nanguli, “PUE nomparenta ka i Musa ala kami woꞌu rawai ka tana nasimbayu ewa sampesuwu-sampesuwu kami langgai.” Nangepe etu, Yosua nombawai ka ana-ana besi i Zelafehad tana nosanggani-nggani ante sampesuwu-sampesuwu ira langgai, nantuki to niparenta i PUE. 5-6 Jadi da'a aga muli Manasye langgai nombarata tana, tapi mulina besi wo'u. Etu sabana suku Manasye niwai ka sampulu bagia, ntanina nggari tana Gilead bo Basan ri sabingga pebulu nu eo Binangga Yordan. Tana Gilead niwai ka muli Manasye ntanina.
7 Kabingga tana bagia suku Manasye nompamula nggari ngata Asyer mpaka ri Mikhmetat ri sabingga pebulu nu eo ngata Sikhem. Nggari setu kabinga etu notua mpaka ri sabingga puluna sampe ri tana todea En-Tapuah. 8 Tana Tapuah bagia suku Manasye, tapi kota Tapuah, ri kabingga tana etu, bagia muli Efraim. 9 Kapola kabingga tana bagia Manasye etu notua sampe ri sabingga puluna Binangga Kana. Kota-kota ri sabingga pulu binangga etu bagia suku Efraim, naupa nesua ri tana suku Manasye. Kabingga tana suku Manasye etu napola nantuki jala mpaka ri sabingga tasi binangga etu, pade pantaꞌana ri Tasi Tongo. 10 Jadi bagia suku Efraim ri sabingga puluna, bo bagia suku Manasye ri sabingga tasina, pade Tasi Tongo najadi kabingga ira ri sabingga kasolona. Ri sabingga tasina naria bagia tana suku Manasye etu nokabingga ante tana suku Asyer, bo ri sabingga pebuluna nokabingga ante tana suku Isakhar.
11 Riara bagia suku Isakhar bo suku Asyer etu naria kota-kota to najadi bagia suku Manasye, etumo, Bet-Sean bo Yibleam ante ngata-ngata ri sinjorina, Dor to naria ri wiwi tasi, En-Dor, Taanakh, Megido ante ngata-ngata ri sinjorina. 12 Tapi suku Manasye da'a namala neto'o ri kota-kota etu sabana to Kanaan nanta'amaka neto'o ri setu. 13 Tapi tempo tau to Israel najadi naroso ri eo nggapurina, ira nompasuꞌu tau-tau Kanaan etu nokarajaa ka ira; aga ira da'a nompopalai to Kanaan pura-pura nggari setu.
Suku Efraim bo Suku Manasye ri sabingga kasolona nerapi tambai tana
14 Nangulimo muli Yusuf ka Yosua, “Nokuya kami aga niwai ka tana sabagia lau majadi bagia kami? Kakonona kami nadea mpu'u, sabana i PUE batena nombagane kami.”
15 Nesonomo Yosua, “Ane komi neliu nggadea, pade bagia bulu Efraim napigu ntoto ka komi, kalaumo mpaka ri bagia to Feris bo to Refaim, pade talumo pangale-pangale ka komi mboto ri bagia etu.”
16 Nesonomo muli Yusuf etu, “Bagia buluna etu da'a nagana ka kami, pade tau to Kanaan to netoꞌo ri kaedena naria kereta-kereta mposibali nggari ase, nabelo ka ira to netoꞌo ri Bet-Sean ante ngata-ngata ri sinjorina, nabelo ka ira to netoꞌo ri Lemba Yizreel.”
17 Tapi nangulimo Yosua ka suku Efraim bo suku Manasye, “Nakono, komi nadea mpuꞌu bo naroso, bo masipato rawai ka melabi nggari sabagia tana etu. 18 Tana ri bagia buluna wo'u kana rawai ka komi. Talumo pangale ri setu ala bagia etu pura-pura majadi bagia komi. Komi mompakule mompopalai tau-tau to Kanaan nggari setu, naupa ira naroso bo naria kareta-kareta mposibali nipowia nggari ase.”