Pobagi labi Tana Kanaan
18
Naopu Tana Kanaan nikuasai tau-tau to Israel, nasiromumo ira pura-pura ri ngata Silo pade nipataka ira Tenda Mpepue ri setu. 2 Tempo etu Danariapa papitu suku to Israel to da'apa nombarata tana.3 Jadi nangulimo Yosua ka todea Israel, “Sampe nepia wo'u komi mopea malau metoꞌo ri tana to niwai PUE Alatala to nisomba ntotuꞌamu ka komi? 4 Pelisimo tolumbaꞌa tau nggari butu-butu suku. Aku kana mompakau ira malau momparesa pura-pura tana etu ala mantulisi kabingga-kabingga tana to majadi bagia ira. Maopu etu ira kana matingguli mpaka ri ja'iku. 5 Tana etu kana rabagi ira majadi papitu bagia. Suku Yehuda batena metoꞌo ri tana ira ri sabingga puluna, bo Suku Yusuf batena metoꞌo ri tana ira ri sabingga tasina. 6 Gambara kabingga-kabingga papitu bagia tana etu kana rakawia bo rawai ka aku. Damo aku mowia nomoro ri ngayo PUE Alatalata, ala ranjani nuapa to nipakatantu Alatala ka komi. 7 Aga suku Lewi daꞌa mombarata tana to nibagi nosanggani-nggani ka komi, sabana bagia ira etumo majadi topanggeni-topanggeni agama mantui bago PUE Alatala. Pade suku Gad, suku Ruben bo sabagia nggari suku Manasye, nitarima iramo tana ri sabingga kamataeo Binangga Yordan to niwai Musa, batua i PUE ka ira.”
8 Pade niwai Yosua panoto-panoto ka tau-tau etu, “Kalau paresamo pura-pura tana etu pade powiamo gambara kabingga-kabinggana. Naopu etu patinggulimo mpaka ri ja'iku, pade aku kana mowia nomoro ri ngayo i PUE ri Silo ri seꞌi.”
9 Naopu nangepe panoto-panoto nggari ja'i Yosua etu, nalaumo ira nomparesa tana etu. Pura-pura tana etu nikalau ira, pade kabingga-kabingga papitu bagia tana etu nitulisi ira ante sanga kota-kota to naria riarana. Pade natinggulimo ira mpaka ri jaꞌi Yosua ri petoꞌo potenda ri Silo. 10 Naopu etu nipowia Yosuamo nomoro ri ngayo i PUE ala mangginjani nuapa to nipakatantu PUE Alatala ka ira. Pade nibagi Yosuamo tana ka butu-butu suku to Israel to da'apa nombarata tana.
Tana to nipobagia ka suku Benyamin
11 Nomoro pamuluna nawela suku Benyamin nantuki butu-butu ongo njapo ira. Tana nipobagia ka ira etu naria ri olo tana suku Yehuda bo tana suku Yusuf.
12 Ri sabingga tasina, kabingga-kabingga tana ira nompamula nggari Binangga Yordan, pade nantende mpaka ri sabingga tasina ngata Yerikho, pade mpaka ri kasolona nantuki bagia buluna sampe nakawao ri karawa baina namosu ngata Bet-Awen. 13 Kabingga tana etu napola mpaka ri sabingga puluna ngata Lus (to niuli woꞌu Betel), pade notua mpaka ri ngata Atarot-Adar ri bulu ri sabingga puluna ngata Bet-Horon-Hilir. 14 Nggari sabingga kasolo bulu etu kabingga tana etu negoli mpaka ri puluna napola mpaka ri ngata Kiryat-Baal (etumo Kiryat-Yearim). Kiryat Baal etumo bagia suku Yehuda. Etumo kabingga tana ri sabingga kasolona.
15 Kabingga-kabingga ri sabingga puluna nompamula nggari wiwi ngata Kiryat-Yearim napola mpaka ri ulu-ulu ue Me-Neftoah, 16 pade notua mpaka ri kente bulu to nosintingayo ante Lemba Ben-Hinom ri tampa tasina Lemba Refaim. Naopu etu kabingga etu mpaka ri sabingga puluna noliu ri Lemba Hinom ri sabingga puluna kente-kente bulu ri tana Yebus, pade napola mpaka ri En-Rogel. 17 Nggari setu negoli mpaka ri tasina mpaka ri En-Semes, pade mpaka ri Gelilot ri sabingga Pantendena Adumim. Naopu etu kabingga etu notua mpaka ri Batu Bohan (Bohan muli Ruben). 18 Pade nantuki sabingga tasina kente-kente bulu to nosintingayo ante Lemba Yordan, pade notua mpaka ri lemba etu. 19 Nggari setu nantuki tasina kente-kente bulu Bet-Hogla, panta'ana ri bagia tasina Tasi Mate ri bamba Binangga Yordan. Etumo kabingga bagia puluna.
20 Binangga Yordan najadi kabingga ri sabingga pebuluna. Etumo kabingga-kabingga tana to niwai ka tau-tau riara suku Benyamin ala majadi bagia ira.
21-24 Kota-kota to najadi bagia tau-tau riara suku Benyamin sampulu rongu kota ante ngata-ngata ri sinjorina, etumo;
Yerikho, Bet-Hogla, Emek-Kezis, Bet-Araba, Zemaraim, Betel, Haawim, Para, Ofra, Kefar-Haamonai, Ofni bo Geba.
25-28 Naria sampulu ampa kota e'i wo'u ante ngata-ngata ri sinjorina, etumo:
Gibeon, Rama, Beerot, Mizpa, Kefira, Moza, Rekem, Yirpeel, Tarala, Zela, Elef, Yebus (etumo Yerusalem), Gibeat bo Kiryat-Yearim.
Etumo tana-tana to niwai ka suku Benyamin nantuki butu ongu njapo ala majadi bagia ira.