Rut nokarajaa ri tinalu Boas
2
Naria sampesuwu Elimelekh rongo i Naomi. Sampesuwuna etu nosanga ka i Boas. Iꞌa tau to nasugina bo nibila todea. 2 Naria saeo nangulimo i Rut to Moab etu ka Naomi, “Palambamo aku malau mantirunaka pae jelai to nanawu nikato. Nisarumakaku kana maria to nabelo rarana mompaloga aku mantirunaka pae to nanawuna."Nesonomo i Naomi, "Kalaumo anaku!”
3 Jadi nalau mpu'umo i Rut nombatirunaka pae nantuki puri topokato. Daꞌa ninjani-njanina tinalu to nikalauna etu tinalu i Boas, sampesuwu matu'ana Elimelekh.
4 Tempo iꞌa ri setu naratamo i Boas nggari ngata Betlehem pade nombatabe topokato ante nanguli, “Perapi PUE momporoa komi.”
Nesonomo topokato, "PUE mombagane komi.”
5 Pade nekutanamo i Boas ri ja'i mandorona, "Isema besi etu?”
6 Nesonomo mandorona, "I'a etu besi to Moab dako narata nosanggani ka i Naomi nggari tana Moab. 7 Iꞌa nomperapi ka aku ala rapaloga mantuki puri topokato mantirunaka pae to nanawuna. Iꞌa nokarajaa nju'u nggari mpadondona sampe weꞌi-weꞌi pade aga sampalai lau i'a nenonto ri pakumpa."
8 Jadi nangulimo i Boas ka i Rut, "Epe ruru, anaku. Neꞌe mana komi malau mantirunaka pae ri tinalu tau ntanina. Aginamo iko mosanggani-nggani ka besi-besi ri seꞌi. 9 Kitamo ri umba ira nokato, pade tukimo ri purina etu. Neꞌe malai nggari jaꞌi ira. Nitewaikumo ka langgai-langgai topokarajaa ri setu ala daꞌa mombabago iko. Ane mabai tambolomu inumo ue to nitombu topokarajaa ri setu."
10 Nangepe i Boas notesa wetu, notimbakotumo i Rut ri ngayona, lenjena ntora narapa ri tana ante nanguli, "Aku da'a masipato rapoasi mata komi. Sabana aku e'i aga tosangatana."
11 Nesonomo i Boas, "Niepeku puramo anu nipowiamu ka matuꞌamu tempo kaliu kamate nu rongomu. Ninjaniku iko nompalasi totuꞌamu bo ngata to nipesuwumu, ala marata meto'o ri se'i mosanggani ante tau daꞌapa niposinjanimu. 12 Perapi PUE mombabalasi pura-pura belo to nipowiamu. Perapi PUE Alatala to nisomba to Israel mombawai to masipato ka iko, sabana iko narata nekalendu ri jaꞌi-Na.”
13 Nesonomo i Rut, “Uma, nabelo mpuꞌu komi nanggita aku, naupa aku daꞌa nasimbayu ante batua-batuamu besi to nokarajaa ka komi.”
14 Sangga naratapa tempona manggoni, nangulimo i Boas ka i Rut, “Kamaimo manggoni. Ri seꞌi naria roti bo dabu-dabu.” Jadi nekatokomo i Rut ri sinjori topokato-topokato etu. Pade i Boas nombawai pae jelai to nitunu ka i'a. Nanggonimo i Rut sampe nabosu. Naopu iꞌa nanggoni danariapa labina.
15-16 Naopu etu nalau woꞌumo i Rut nombatirunaka pae. Iwetu iꞌa nalai nangulimo i Boas ka topokarajaa, “Ane ratirunakana namosu pae to nipo'umo, waikamo. Ne'e rapakaeya bo rapokarau iꞌa. Namala woꞌu raosu komi sakedi-sakedi anu nipoꞌu etu pade nawusaka ka iꞌa ala ratirunakana.”
17 Jadi i Rut nantirunaka pae sampe nangguwia. Naopu niporona nipasiromunamo pae etu, naria kira-kira sampulu kilona. 18 Naopu etu nanjilimo iꞌa mpaka ri kota nanggeni asele pompasiromuna etu, pade nipopokitana ka matuꞌana sakuya kadea to nipasiromuna. Pade niwaina ka matuꞌana woꞌu labi panggoni to da'a naopu nikonina pangane.
19 Jadi nangulimo i Naomi ka iꞌa, “Ri umba nipombaratamu pura-pura etu? Ri tinalu sema nipokarajamu eo eꞌi? Perapi Alatala mombawai rasi ka tau to nowia belo ka iko!”
Jadi nitesa i Rutmo tinalu to nipompasiromuna pae etu tinalu nu langgai nosanga ka i Boas.
20 Nangulimo i Naomi, “Tau etu danamosu posampesuwuta. Iꞌamo sambaꞌa tau masipato mompeili kita.a Damo i PUE mombawai rasi ka iꞌa. PUE batena nabelo ante kita nabelo ka to danatuwuna nabelo ka to namatenamo.”
21 Pade nanguli woꞌumo i Rut besi to Moab etu ka i Naomi, “Tau etu nanguli woꞌu ka aku damamalapa aku mompasiromu nju'u mosanggani ante topokarajaana sampe maopu pura asele tinalu rakato.”
22 Nesonomo Naomi ka i Rut, “Iyo, anaku, nabelopa iko mokarajaa ante besi-besi ri tinalu i Boas, apa ane iko malau ri tinalu tau ntanina iko bara rapongei-ngei ira ri sa'a!”
23 Jadi Rut batena nantuki besi topokarajaa ri tinalu i Boas. Nipasiromuna pae ri sa'a sampe naopu tempo pokato. Pade iꞌa batena neto'o ante matuꞌana.