Rut
Elimelek saongu njapona nolinja mpaka ri Tana Moab
1
1-2 Tempo nggaulu da'apa naria magau noparenta ri Israel, tana Israel nirata nu oro. Tempona etu naria sambaꞌa langgai nosanga ka Elimelekh. Iꞌa tau to Efrata, pade neto'o ri ngata Betlehem ri bagia Yehuda. Iꞌa nalau ri tana Moab nosanggani ante rongona i Naomi bo rombaꞌa anana langgai to nosanga ka i Mahlon bo i Kilyon sabana ngata ira nirata nu oro. Jadi neto'omo ira ri saꞌa. 3 Tempo ira ri setu namatemo Elimelekh, pade naboli damo Naomi ntalianana rombaꞌa. 4 Anana rombaꞌa etu norongo ante randoo-randoo to Moab nosanga ka Orpa bo i Rut. Sampulu mpae kaliuna 5 namate woꞌumo anana langgai rombaꞌa etu, sampe naboli damo Naomi njamba'ana.Naomi bo Rut natingguli mpaka ri ngata Betlehem
6 Bara sakuya mpae kaliuna niepe i Naomi PUE nantulungi todea-Na ante nombawai asele tana to nabelona. Jadi Naomi ante rombaꞌa maniana etu masadia-dia mompalasi tana Moab. 7 Nanggaliwomo ira mpasanggani-nggani nggari petoꞌo ira natingguli mpaka ri bagia Yehuda. Ri tatongo jala 8 nangulimo i Naomi ka romba'a maniana, “Patinggulimo komi mpaka ri ja'i indomu. Perapi PUE mabelo ri ja'i komi ewa komi nabelo ri ja'iku bo rongo-rongo komi to namatena. 9 Perapi PUE mantulungi komi mombarata petoꞌo to nabelo ri jaꞌi rongomu nggapurina." Sangga naopu notesa wetu, nopasabimo i Naomi ka ira bo nombaeki ira romba'a.
Tapi Orpa bo i Rut aga notumangi mpakaroꞌo 10 bo notesa ka Naomi, “Kami madota mantuki komi manjili mpaka ri ngata komi.”
11 Tapi nesonomo i Naomi, "Patinggulimo ana-anaku. Nuapa mutuki ka aku? Ninjanimu aku mana moana langgai to mamala majadi rongo komi banepia. 12 Patinggulimo ana-anaku. Natuꞌa gagamo aku morongo wo'u. Ane rapana damariapa dotaku morongo, pade wengi eꞌi aku morongo pade mangote ngana langgai, 13 madota komi mompopea i'a sampe mabete? Madota komi mantaꞌamaka mana morongo ante langgai ntanina?a Ne'e wetu, ana-anaku. Neliu nggapaꞌipa katuwuku pade komi. Bara eꞌimo pesuku i PUE ri ja'iku.”
14 Nangepe tesa i Naomi etu notumangi woꞌumo Orpa bo i Rut. Pade nieki Orpamo matuꞌana bo natinggulimo iꞌa. Tapi i Rut da'a nadota moga'a ante matu'ana. 15 Notesamo Naomi ri ja'ina, “Rut, kitamo! Lagomu natinggulimo mpaka ri ngatana bo mpaka ri ja'i wiata-wiata to niparasayana. Kalau tukimo i'a matingguli!”
16 Tapi nesonomo i Rut, “Ne'e rapakau aku matingguli bo mompalasi komi! Ri umba rakalau komi, ri setu wo'u kukalau. Ri umba rapeto'o komi, ri setu woꞌu kupeto'o. Pue to musomba, etu wo'u kusomba. 17 Ri umba komi mamate, ri setu wo'u aku mamate bo ratana. Perapi PUE mombasuku aku meliu nggatomo ane aku moga'a ante komi! Aga mate mamala mombaga'a kita!”
18 Tempo Naomi nanggita mpu'u-mpu'u i Rut kana metuki, i'a mana notesa nuapa-nuapa.
19 Ira nompapola polumako sampe naratamo ira ri ngata Betlehem. Wetu ira narata ri Betlehem natekaja puramo tau ri ngata etu. Nangulimo besi-besi riara ngata etu, “Nakono mpu'u i'a etu i Naomi?”
20 Nesonomo Naomi ka ira, “Mana rapokio komi sangaku Naomi. Pokiomo aku Mara,b sabana Alatala to Neliu Nggakuasa nompowia nadea kasusa ri ja'iku. 21 Tempo aku nalai nggari se'i aku nagana, tapi weꞌi-weꞌi aku nipopanjili PUE ante pale ntoya. Etumo sabana neꞌe mana rapokio aku Naomi, apa i PUE to Neliu Nggakuasa nombasuku aku ante nadea kasusana!”
22 Wetumo tesana i Naomi natingguli ngggari tana Moab nosanggani-nggani ante maniana i Rut besi to Moab etu. Ira narata ri ngata Betlehem tempo nompamula nokato pae jelai.c