Pantesa Yosua kaopuna ka todea Israel
23
Nasaemo i PUE nompakaama todea Israel nggari pura-pura bali ira. Tempo etu natuꞌa mpuꞌumo Yosua. 2 Yosua nompokio pura-pura todea Israel, pura-pura totu'a ngata, pura-pura topanggeniaka, pura-pura topotangara bo pura-pura balengga tantara, pade niulina ka ira, “We'i-we'i aku natu'amo. 3 Nikita komimo pura-pura nuapa to nikawia i PUE Alatalata ka pura-pura balita ri se'i sabana nantora komi. PUE Alatalata mbotomo to nantulungi kita nosibali ante balita. 4 Nibagiku puramo tana ka suku-suku komi majadi bagiamu. Etumo tana tau-tau to danaboli ri Tana Kanaan, bo tana pura-pura tau to nidagita. Tana etu nompamula nggari sabingga pebulu nu eo Binangga Yordan napola mpaka ri kasolona sampe narata ri Tasi Tongo. 5 PUE Alatalata, Iꞌamo to mompowia tau-tau etu mokanggaura bo mangowa nalai nggari ja'i komi tempo komi malau mombasuaki ira sampe komi kana metoꞌo ri tana ira, ewa to nijanji PUE Alatalata ka komi.6 Jadi pakaroomo raramu ala komi batena mantuki pura-pura parenta to nitulisi riara buku Atura-atura to nipapola i Musa. Ne'e maria kamba sangele atura etu raliunaka komi. 7 Ne'e mosigalo ka tau-tau to daneto'o ri olo komi. Bo ne'e ntoto manguli sanga pue-pue to nisomba ira bara mojanji riara sanga etu. Pade ne'e woꞌu mepue bara mekou ri jaꞌi pue-pue ira etu. 8 Komi kana matutu momparasaya ka i PUE Alatalata ewa to nikawia komi sampe we'i-we'i. 9 Tau-tau nggari ngata to nabete bo naroso nipopalai i PUE ka komimo; da'a kamba samba'a nggari ira nompakule mangewa komi sampe weꞌ'i-weꞌi. 10 Butu-butu mba'a nggari komi namala mangewa sanjobu mba'ana, sabana i PUE Alatalata, Iꞌamo to nanjaliku komi nosibali, ewa to nijanji-Namo. 11 Sabana etu toramo mpakabelo-belo, potowemo i PUE Alatalata. 12 Ane komi mokanggaura momparasaya bo komi mosigalo ante tau-tau to neto'o ri olo komi, bo komi mosiporongo ante ira, 13 toramo mpakabelo-belo, natantumo PUE Alatalata mana ntoto madota mompopalai tau-tau etu ka komi. Tapi ira etu kana majadi ewa tandoko atau pasalo ka komi. Ira kana mpuꞌu-mpuꞌu mompandasa komi. Ira majadi ewa cambu mawela bengomu bara ewa karui mantosu matamu, sampe daꞌa kamba sambaꞌa nggari olo komi to maboli ri tana to nabelo eꞌi, to niwai PUE Alatalata ka komi.
14 We'i-we'i mana masaeka aku mamate. Ninjani komi pura-pura ante mpuꞌu-mpuꞌu rara i PUE Alatalata nombawai ka komi mpengele-ngele to nabelo to nijanji-Na. Butu-butu janji-Na nipakadupa-Namo, da'a kamba sangele naboli. 15-16 Tapi iwenu I'a nompakadupa janji-Na ka komi, natantumo iwetu wo'u I'a kana mompowia butu-butu pepararangga-Na madupa ri ja'imu ane komi da'a mantuki parenta-parenta-Na. Ane komi daꞌa natutu mantuki pojanji to nipowia i PUE Alatala ka kita, bo mepue ka pue-pue ntanina pade mombasomba pue-pue etu, natantumo i PUE kana manggarau bo mombasuku komi. Riara tempo sampalai lau, komi kana malipo nggari tana to nabelo e'i to niwai i PUE ka komi.”