Yosua notesa ka todea Israel ri Sikhem
24
Naopu etu Yosua nompasiromu pura-pura tau to Israel ri ngata Sikhem, pade nompakau pura-pura totu'a ngata Israel, topanggeniaka-topanggeniaka, topotangara-topotangara bo pura-pura balengga tantara marata ri ja'i PUE. Jadi naratamo ira nantingayo I'a. 2 Pade nangulimo Yosua ka ira pura-pura, “Epemo nuapa to niuli PUE Alatala Israel ka komi, 'Tempo nggaulu totu'amu neto'o ri sambote Binangga Efrat bo nombasomba pue-pue ntanina. Naria samba'a nggari ira, etumo i Terah, uma Abraham bo i Nahor. 3 Pade Aku nangala Abraham, uma totu'amu etu, nggari ngata ri sambote Binangga Efrat bo nompakau i'a nompesayo pura-pura Tana Kanaan. Aku nombawai ka i'a muli to nadeana. Pamula-mulana niwai-Ku Isak ka iꞌa. 4 Pade ka Ishak niwai-Ku romba'a ngana, etumo i Yakub bo Esau. Niwai-Ku ka Esau bagia Bulu Edom najadi bagiana. Tapi Yakub, uma totu'amu etu, nolinja mpaka ri Tana Masir nosanggani ka ana-anana.5 Naopu etu Aku nombasuro i Musa bo i Harun, bo nompakarata kasusa bete ri tatongo to Masir, pade nisuwuraka-Ku komi nggari sa'a. 6 Tempo Aku nanggeni totuꞌamu etu nesuwu nggari Tana Masir, naratamo ira ri wiwi ntasi. Pade ira niraga tau-tau to Masir ante kareta mposibali bo tantara topesawi jara. Tempo totuꞌamu etu narata ri Tasi Lei, 7 ira nekakai nerapi tulungi ri ja'i-Ku. Pade peto'o ri olo ira ante tau to Masir etu nipowia-Ku najadi narumau, pade nionga-Ku tau to Masir etu ante ue tasi, sampe ira pura-pura natala. Ninjani komi puramo nuapa to nikawia-Ku ka tau to Masir.
Naopu etu nasae mpu'u komi neto'o ri karawa baina. 8 Pade nikeni-Ku komi mpaka ri tana tau to Amori to neto'o ri sabingga pebulu nu eo Binangga Yordan. Tempo ira nosibali ka komi, Aku nantulungi komi nombadagi ira. Komi nomba'ago tana ira bo Aku wo'u nompakaropu ira. 9 Tempo etu magau Moab, etumo i Balak ana i Zipor, madota mangewa komi. I'a nompakau tau mpaka ri ja'i Bileam ana i Beor, merapi ala i Bileam mombajanjiaka komi. 10 Tapi Aku da'a nantuki dota i Bileam, jadi iꞌa aga nerapi rasi ka komi. Iwetumo Aku nompakasalama komi nggari ja'i Balak.
11 Naopu etu komi nombawote Binangga Yordan, sampe narata ri kota Yerikho. Tau to Yerikho nangewa komi, pade iwetu wo'u to Amori, to Feris, to Kanaan, to Het, to Girgasi, to Hewi bo to Yebus. Tapi Aku nantulungi komi nombadagi ira pura-pura.a 12 Tempo komi nalau nombasuaki ira, Aku nompakau patuntu mokolu ka komi mompopalai ira,b sampe romba'a magau Amori etu nangowa nalai nggari ja'i komi. Da'a nggari gumamu bara panamu sampe komi padagi.c 13 Tana to niwai-Ku ka komi, nitarima komi ante da'a nasusa-susa. Niwai-Ku ka komi kota-kota to daꞌa nibangu komi, pade we'i-we'i komimo to neto'o ri sa'a. Bo komi wo'u nanggoni wua anggur bo wua zaitun to daꞌa nituja komi.’ ” d
14 Pade notesa wo'umo Yosua, “Jadi we'i-we'i, bilamo i PUE. Pekoumo ri jai-Na ante mpuꞌu-mpuꞌu rara. Palasimo pue-pue ntanina to nisomba totu'a komi ri sambote Binangga Efrat bo ri Tana Masir nggaulu. Pekoumo aga ri jaꞌi PUE. 15 Ane rapana komi da'a madota mepue ka i PUE, pakatantumo eona e'i wo'u, isema to masipato rapepue komi: Mepue ka pue-pue ntanina to nisomba totu'a komi nggaulu ri sambote Binangga Efrat, bara mepue ka pue-pue to nisomba tau to Amori to nipeto'o komi ngatana we'i-we'i. Tapi aku bo kami saongu njapo, aga mepue ka i PUE!"
16 Pade nesonomo tau to Israel etu, “Da'a rapakulena kami mompalasi i PUE ala mepue ka pue-pue ntanina! 17 Sabana I'amo PUE Alatalata, I'amo to nanggabasaka totu'ata bo kita mboto nggari pepatundu ri Tana Masir. Nikitatamo kabaraka-kabaraka to nipowia i PUE. PUE wo'u tunggai nanggalendu kita riara pura-pura polumakota, nombaliunaka ngata-ngata tau ntanina. 18 Tempo kita nesua ri ngata e'i, i PUE nompopalai pura-pura tau to Amori to neto'o ri se'i. Jadi kami woꞌu madota mepue ka PUE, sabana I'amo Alatalata.”
19-20 Pade nangulimo Yosua, “Tapi komi da'a mompakule mepue ka i PUE, sabana I'amo Alatala to nagasana, to samba'a lau. Da'a nipokono-Na maria masimbayu ka I'a. Ane komi mompalasi I'a bo mepue ka pue-pue ntanina, I'a da'a momba'ampungi silakamu. Tapi I'a kana mangewa bo mombasuku komi. I'a kana mompakaropu komi, naupa nggaulu I'a nabelo ri jaꞌi komi.”
21 Nesonomo tau to Israel etu, “Da'a! Kami da'a mepue ka pue-pue ntanina! Kami aga mepue ka i PUE!”
22 Pade nanguli wo'umo Yosua, “Komi mbotomo najadi sabina, nipakatantu komimo aga mepue ka i PUE.”
Nesonomo ira, “Nakono, kami mbotomo najadi sabina!”
23 Nangulimo Yosua, "Ane wetu, palasimo pue-pue tau ntanina to naria ri ja'i komi etu, bo pojanjimo komi kana mekou ri jaꞌi PUE Alatala Israel.”
24 Pade nesonomo todea Israel etu ka Yosua, “Kami aga mekou ri jaꞌi PUE Alatalata! Kami kana mantuki parenta-parenta-Na!”
25 Ri eo etu wo'u Yosua nompowia pojanji ante todea Israel ri Sikhem. Pade ri setu niwaina ka ira parenta-parenta to masipato ratuki ira. 26 Pura-pura parenta etu nitulisina riara buku Atura Alatala. Pade nialana saongu watu bete, bo nipatidona ri wayo kayu nabete ri petoꞌo to nipatani ka i PUE.e 27 Naopu etu niulina ka pura-pura todea Israel, “Watu e'i majadi sabita. Pura-pura tesa to nitesa i PUE ka kita, nitesa ri ngayo watu e'i. Pade watu e'imo to najadi sabi ka komi, mompopatora ka komi ala ne'e mangewa Alatalata.” 28 Naopu etu Yosua nompakau todea to Israel etu natingguli. Pade ira pura-pura simbau natingguli mpaka ri tana ira mboto.
Tempo kamate Yosua bo Eleazar
29 Naopu kajadia-kajadia etu, namatemo Yosua ana i Nun, batua i PUE etu, tempo noumuru satu sampulu mpaena. 30 Pade i'a nitana ri tanana mboto ri Timnat-Serah ri Bulu Efraim ri sabingga tasina Bulu Gaas.f
31 Tempo Yosua danatuwu todea Israel nepue ka i PUE. Pade tempo i'a namatemo ira wo'u danepue ka i PUE, tempo danaria topanggeniaka-topanggeniaka ira to nanggita mboto mpengele-ngele to nikawia i PUE ka todea Israel.
32 Wuku-wuku Yusuf to nikeni to Israel nggari Tana Masir, nitana ri ngata Sikhem ri tana to nioli Yakub nggari ana-ana i Hemor, uma i Sikhem, ante olina satu mpeka doi salaka. Tana etu nipakatantu majadi bagia muli Yusuf.g
33 Naopu etu namate woꞌumo Eleazar ana i Harun, pade iꞌa nitana ri ngata Gibea, etumo ngata to naria ri bagia Bulu Efraim. Ngata etu niwai ka i Pinehas ana Eleazar.