Suku-suku nggari bagia pebulu nu eo Binangga Yordan nipakau manjili
22
Naopu etu Yosua nompokio tantara-tantara nggari suku Ruben, suku Gad bo sabagia suku Manasye to neto'o ri sabingga pebulu nu eo Binangga Yordan, 2 pade notesamo i'a ka ira, "Pura-pura to nipakau i Musa batua i PUE ka komi, etu nipowia komimo. Pade nituki komimo pura-pura tesa to niparentaku ka komi. 3 Sampe we'i-we'i komi da'a nompalasi sampesuwu-sampesuwumu to Israel ntanina. Tapi komi bate-batena nantulungi ira. Nituki komimo ante mpu'u-mpu'u rara nuapa to niparenta i PUE Alatalata ka komi. 4 Weꞌi-weꞌi i PUE Alatalata nombawai kaamana ka sampesuwu-sampesuwumu tau to Israel ntanina, nasimbayu ewa to nijanji-Na ka ira. Sabana etu patinggulimo mpaka ri tana to nipobagia ka komi, ri sabingga pebulu nu eo Binangga Yordan to niwai i Musa ka komi bopia. 5 Tapi tukimo ante mpuꞌu-mpuꞌu rara parenta bo atura to nipakatantu i Musa, batua i PUE ka komi. Potowemo i PUE Alatalata, batena matuwu nantuki pura-pura dota-Na, tukimo parenta-parenta-Na, batena matundu jaꞌi-Na, pade pekoumo ri jaꞌi-Na ante mpuꞌu-mpuꞌu raramu bo pura-pura katuwumu.”6-9 Naopu etu Yosua nerapi doa ka suku Ruben, suku Gad bo sabagia suku Manasye etu, pade nompopanjili ira mpaka ri peto'o to nipobagia ka ira ante nombawai tewai iwe'i: “We'i-we'i nasugimo komi, bo komi natingguli ante nanggeni nadea pompatuwu, salaka, bulawa, tambaga, ase bo pakea. Palelemo pura-pura mbara-mbara to niagomu etu ka sampesuwu-sampesuwumu ntanina.”
Pade nalaimo suku Ruben, suku Gad bo suku Manasye nggari sabingga pebulu nu eo Binangga Yordan nompalasi tau to Israel ntanina. Nanggaliwomo ira nggari ngata Silo ri Tana Kanaan mpaka ri bagia Gilead ri tana to najadi bagia ira mboto. Ira neto'o ri tana etu nantuki to niparenta i PUE ka i Musa bopia.
(Tempo bopia sabagia nggari suku Manasye nombarata Tana Basan nggari ja'i Musa, ri sabingga pebulu nu eo Binangga Yordan, bo sabagiapa wo'u nggari suku Manasye nantarima nggari ja'Yosua tana ri sabingga kasolo nu eo Binangga Yordan nosanggani-nggani ante suku-suku Israel ntanina).
Peto'o pesomba nipowia namosu Binangga Yordan
10 Tempo suku Ruben, suku Gad bo sabagia suku Manasye etu narata ri bagia Gelilot ri sabingga kasolo nu eo Binangga Yordan, ira nompowia saongu peto'o pesomba to nabetena bo to nagayana namosu Binangga Yordan. 11 Tau-tau to Israel ntanina nangepe kareba to nanguli, “Suku Ruben, suku Gad, bo sabagia nggari suku Manasye nompowia petoꞌo pesomba ri pobingga Tana Kanaan ri ngata Gelilot namosu Binangga Yordan ri bagia nto Israel.” 12 Nangepe etu nasiromu puramo tau-tau to Israel ntanina ri Silo ala malau mombasuaki suku-suku Israel nggari bagia ri sabingga pebulu nu eo Binangga Yordan etu.
13 Pade tau to Israel nombasuro i Pinehas ana Eleazar topanggeni agama etu, malau mpaka ri Gilead ri sabingga pebulu nu eo Binangga Yordan ala mosirata ka suku Ruben, suku Gad bo sabagia suku Manasye etu. 14 Naria woꞌu sampulu mbaꞌa topanggeniaka to Israel ntanina nalai nosanggani ante i Pinehas. Ira etu wakele tau-tau to Israel nggari butu-butu suku ri sabingga kasolo nu eo Binangga Yordan, simbau sambaꞌa totuꞌa langgai nggari mbira ira. 15 Naratamo ira ri peto'o suku Ruben, suku Gad bo sabagia suku Manasye ri bagia Gilead, pade nanguli ka ira, 16 “Iweꞌimo tesa nggari pura-pura todea i PUE: ‘Nokuya komi nanggawia sangele to najaꞌa eꞌi ka Alatala nto Israel? Ante nompowia peto'o pesombamu mboto, komi nangewa i PUE Alatala! Komi mana ntoto nantuki parenta-parenta-Na! 17 Da'a nitora komi silakata ri ngata Peor? Tempo etu kita nisuku i PUE ante sangele juꞌa, naupa kita e'i todea-Na mboto!a Sampe we'i-we'i kita danombarasai kasusana. Wenumo, da'apa nagana etu? 18 We'i-we'i damadotapa wo'u komi mompalasi i PUE? Ane eo e'i komi mangewa i PUE, naile I'a kana manggarau kita pura-pura todea Israel. 19 Pade ane tanamu etu nireke natantoru sampe da'a masipato rapajadi peto'o mombasomba i PUE, polinjamo ri ja'i kami ri tana to nikarata i PUE, ri umba to naria Tenda i PUE to Nagasana. Petoꞌomo ri jaꞌi kami, tapi neꞌe mangewa i PUE bara mangewa kami ante mompowia saongu peto'o pesomba ntanina, sabana nariamo peto'o pesomba ka i PUE Alatala ri ja'ita. 20 Toramo nuapa to najadi ante Akhan ana i Zerah, to daꞌa nadota nantuki parenta i PUE mompakaropu mbara-mbara! Nuapamo aselena? Pura-pura todea Israel nawela pesuku! Kakonona aga Akhanb njambaꞌana nowia silaka, tapi to namatena da'a aga i'a!”
21 Pade nesonomo ira suku Ruben, suku Gad bo sabagia suku Manasye ka topanggeniaka-topanggeniaka to Israel etu, 22 “Aga i PUE to neliu nggakuasa! Aga i PUE to neliu nggakuasa! Ninjani-Na nokuya kami nanggawia e'i, pade to nipodota kami ala komi wo'u mangginjani! Ane rapana kami nanggawia e'i ante patuju mangewa i PUE bara sabana kami mana ntoto madota mantuki parenta Alatala, nabelopa kami mamate eo eꞌi! 23 Agina i PUE mboto mombasuku kami, ane rapana kami nopatuju mangewa Iꞌa ante mompowia peto'o pesomba ka kami mboto, ala rapombawai pesomba to nitunu bara pesomba gando bara pesomba posinggabelo to raboli ri bungguna. 24 Sampesuwu-sampesuwu, daꞌa etu patuju kami! Kami nompowia peto'o pesomba etu, sabana nakini rara kami ri eo nggapurina banepia, muli komi kana motesa ka muli kami, ‘Daꞌa ntoto naria posinggamosu komi ante i PUE Alatala to Israel! 25 Kitamo, I'a nombaboli Binangga Yordan e'i ri tatongo-tongota, ala mompopogaꞌa kami ante komi tau to Ruben bo tau to Gad. Mpu'u-mpu'u da'a ntoto naria posinggamosu komi ante i PUE.’ Jadi nuapamo to majadina banepia? Natantumo muli komi kana mombatagi muli kami mepue ka i PUE. 26 Jadi kami nompowia peto'o pesomba etu da'a ala majadi peto'o pesomba to nitunu bo pesomba ntanina. 27 Tapi etu nipowia kami ala majadi tandai ka kita mpasanggani bo ka mulita ri eo nggapurina banepia, nakono kami e'i nepue ka i PUE ri Tenda Mpepue ante nanggeni pesomba to nitunu, pesomba posinggabelo bo pesomba ntanina. Ante wetu muli komi mana manguli muli kami da'a ntoto naria posinggamosu ante i PUE. 28 Jadi iweꞌimo patuju kami: Ane rapana muli komi manguli wetu, natantu muli kami mamala mesono, ‘Kitamo peto'o pesomba etu! Totuꞌa kami nompowia peto'o pesomba nasimbayu ante peto'o pesomba i PUE ri ngayo Tenda Mpepue, da'a ala majadi peto'o pesomba to nitunu bo pesomba-pesomba ntanina, tapi ala majadi tandai ka kita mpasanggani.’ 29 Parasayamo, kami da'a madota mangewa i PUE bara menonto mepue ka I'a ante mompowia peto'o pesomba ntanina rapomboli pesomba to nitunu bo pesomba gando atau rapomboli pesomba ntanina, sabana peto'o pesomba ka PUE Alatalata nariamo ri ngayo Tenda Mpepue!”
30 Pura-pura tesa to nipakanoto tau-tau nggari suku Ruben, suku Gad bo suku Manasye etu, niepe topanggeni agama i Pinehas nosanggani-nggani ante sampulu mba'a topanggeniaka todea Israel nggari bagia kasolo nu eo Binangga Yordan. Nangepe tesa etu nasana mpu'umo rara ira. 31 Pade notesamo i Pinehas ana Eleazar topanggeni agama ka tau-tau nggari suku Ruben, suku Gad bo sabagia suku Manasye etu, “We'i-we'i ninjani kamimo i PUE nomporoa kita, sabana komi da'a nangewa I'a. Nipakasalama komimo todea Israel nggari pesuku i PUE.”
32 Naopu etu nanggaliwomo i Pinehas bo pura-pura topanggeniaka todea to Israel etu. Ira nompalasi tau to Ruben bo tau to Gad etu ri bagia Gilead, pade nanjili mpaka ri Tana Kanaan. Narata ri setu nitesa iramo kajadia etu ka todea Israel ntanina. 33 Nasana mpu'umo rara todea Israel tempo ira nangepe tesa etu, sampe ira nombatoiya-toiya Alatala. Mana nitesa ira nia ira mosibali ka tau to Ruben bo tau to Gad, bo mompakaropu ngata ira etu.
34 Kaopuna nangulimo suku Ruben bo suku Gad, “Peto'o pesomba e'i najadi sabi ka kita pura-pura to nompakanoto i PUE etumo Alatalata mpasanggani.” Pade nipoposanga iramo peto'o pesomba etu “Sabi.”