Kota-kota to niwai ka suku Lewi
21
1-2 Naria saeo nalaumo totu'a-totu'a suku Lewi mpaka ri ngata Silo ri Tana Kanaan mosintomu ka Eleazar balengga topanggeni agama, bo Yosua ana i Nun, ante totu'a-totu'a suku-suku tau to Israel. Nangulimo ira, “Musa niposumba i PUE nomparenta ala kami tau to Lewi rawai ka kota-kota rapetoꞌo kami bo tana-tana ranggarawana ri sinjori kota-kota etu majadi peto'o poewu kami.” 3 Jadi nantuki parenta i PUE etu, nggari tana to niwai ka ira, tau-tau to Israel nombawai ka suku Lewi kota-kota ante tana-tana ranggarawana iwe'i:4 Ira nowia nomoro pade to nawelana pamula-mulana etumo mbira i Kehat riara suku Lewi nantuki butu-butu ongu njapo ira. Suku Lewi muli Harun, topanggeni agama, niwai ka sampulu tolongu kota nggari tana suku Yehuda, suku Simeon bo suku Benyamin. 5 Tau-tau ntanina nggari mbira i Kehat niwai ka sampulu kota nggari tana suku Efraim, suku Dan bo santongo suku Manasye to ri sabingga kasolo eo Binangga Yordan.
6 Tau-tau nggari mbira i Gerson nombarata sampulu tolongu kota nggari tana suku Isakhar, suku Asyer, suku Naftali bo suku Manasye to ri sabingga pebulu eo Binangga Yordan.
7 Tau-tau nggari mbira i Merari nombarata sampulu rongu kota nggari tana suku Ruben, suku Gad bo suku Zebulon.
8 Iwetumo tau-tau to Israel nombabagi kota-kota bo tana-tana ranggarawana ante nowia nomoro ka tau to Lewi nantuki to niparenta PUE Alatala ka i Musa.
Kota-kota to niwai ka mbira Kehat
9-19 Nggari mbira Kehat riara suku Lewi, topanggeni-topanggeni agama muli Harunmo to pamula-mulana nantarima kota-kota. Ira nantarima sampulu tolongu kota ante tana-tana ranggarawana. Nggari suku Yehuda bo suku Simeon, ira nantarima sasio kota, etumo:
Libna, Yatir, Estemoa, Holon, Debir, Ain, Yuta, Bet-Semes bo Kiryat-Arba, to nipoposanga nantuki sanga uma Enak. We'i-we'i kota etu nipoposanga Hebron, to najadi saongu kota pekalendu ri bulu suku Yehuda.
Tana ranggarawa bo ngata-ngata ri kota etu niwai ka i Kaleb ana i Yefune, ala majadi tana bagiana. Nggari suku Benyamin ira nantarima ampa kota, etumo: Gibeon, Geba, Anatot bo Almon.
20-26 Tau-tau ntanina nggari mbira i Kehat niwai ka sampulu kota ante tana-tana ranggarawana. Nggari suku Efraim ira nantarima ampa kota, etumo: Bet-Horon, Kibzaim, Gezer bo Sikhem saongu kota pekalendu ri bagia buluna Efraim. Nggari suku Dan ira nantarima ampa kota, etumo: Elteke, Gibeton, Ayalon bo Gat-Rimon. Nggari suku Manasye to ri sabingga kasolo eo Binangga Yordan ira nantarima rongu kota, etumo: Taanakh bo Gat-Rimon.
Kota-kota niwai ka mbira Gerson bo Merari
27-33 Naria saongu mbira ntanina riara suku Lewi, etumo mbira Gerson. Tau-tau riara mbira Gerson etu niwai ka sampulu tolongu kota bo tana-tana ranggarawana. Nggari suku Manasye to ri sabingga pebulu eo Binangga Yordan, ira nantarima rongu kota, etumo: Beestera bo Golan saongu kota pekalendu ri bagia Basan. Nggari suku Isakhar ira nantarima ampa kota, etumo: Kisyon, Dobrat, Yarmut, bo En-Ganim. Nggari suku Asyer ira nantarima ampa kota, etumo: Misal, Abdon, Helkat bo Rehob. Nggari suku Naftali ira nantarima tolongu kota, etumo: Hamat-Dor, Kartan bo Kedes saongu kota pekalendu ri bagia Galilea.
34-40 Mbira ntanina nggari suku Lewi, etumo mbira Merari, niwai ka sampulu rongu kota bo tana-tana ranggarawana. Nggari suku Zebulon ira nantarima ampa kota, etumo: Yokneam, Karta, Dimna bo Nahaal. Nggari suku Ruben ira nantarima ampa kota, etumo: Bezer, Yahas, Kedemot bo Mefaat. Nggari suku Gad ira nantarima ampa kota, etumo: Mahanaim, Hesybon, Yaezer bo Ramot saongu kota pekalendu ri bagia Gilead.
41-42 Jadi nggari tana-tana bagia pura-pura tau to Israel naria patampulu bo walu kota bo tana-tana ranggarawana ri sinjorina to niwai ka tau-tau to Lewi.
Tana Kanaan najadi bagia tau to Israel
43 Iwetumo i PUE nombawai ka tau-tau to Israel pura-pura tana to nijanji-Na ante nojanji ka totu'a ira. Sangga naopu nangala tana etu, todea Israel naroo neto'o ri sa'a. 44 PUE nompakaama pura-pura tana etu ewa nuapa to nijanji-Na bopia ka totu'a ira ante nojanji. Bali-bali tau to Israel da'a kamba samba'a nompakule nangewa ira, sabana i PUE nombawai kuasa ka tau to Israel nombadagi bali-bali ira. 45 PUE nompakadupa pura-pura pojanji-Na ka todea Israel; da'a kamba sangele to da'a nipakadupa-Na.