Kota-kota pekalendu
20
Naopu etu notesamo i PUE ka Yosua, 2 “Ulimo ka tau-tau to Israel iwe'i: Pakatantumo kota-kota pekalendu ewa to nitewai-Ku bopia ka i Musa ala rapasimbayuna ka komi. 3 Ane maria tau to mompatesi tau ntanina ante da'a nitunggaina, i'a mamala mangowa mpaka ri kota-kota etu ala makabasaka nggari jaꞌi ntau to madota mompesawa iꞌa. 4 I'a kana mangowa mpaka ri saongu nggari kota-kota etu, bo mekanggore ri peto'o potangara ri pewobo bobaa kota etu, pade motarangga ka totuꞌa-totuꞌa ngata ri setu nuapa to najadi ri ja'ina. Ira kana mompaloga i'a mesua ri kota etu, bo mombawai ka i'a peto'o to rapeto'ona. 5 Ane tau to madota mompesawa iꞌa mombaraga i'a marata ri setu, totuꞌa-totuꞌa ngata etu da'a mamala mombawai i'a ka tau etu. Ira kana manggalendu iꞌa sabana daꞌa nitunggaina nompatesi tau, bo daꞌa ante rau rara. 6 I'a kana metoꞌo ri kota etu sampe i'a ratangara ri ngayo ntau dea, bo sampe tau to nionggotaka majadi Balengga Topanggeni Agama mamate. Maopu etu pade i'a mamala matingguli mpaka ri ngata petoꞌona mboto to nipalasina tempo i'a nangowa nalai.”7 Jadi ri bagia kasolo eo Binangga Yordan todea Israel nompakatantu kota-kota e'i najadi kota pekalendu: Kedes ri bagia buluna tana Naftali ri bagia Galilea, Sikhem ri bagia buluna tana Efraim, bo Hebron ri bagia buluna tana Yehuda. 8 Ri bagia pebulu nu eo Binangga Yordan ri sabingga pebulu eo ngata Yerikho, ira nompakatantu kota Bezer ri lemba naluo ri bagia buluna ri karawa baina ri tana suku Ruben, kota Ramot ri bagia Gilead ri tana suku Gad, bo kota Golan ri bagia Basan ri tana suku Manasye. 9 Etu puramo kota-kota pekalendu to nipakatantu ka todea Israel bo ka tau-tau to sangatana to netoꞌo ri tatongo-tongo ira. Butu mbaꞌa tau to nepatesi ante da'a nitunggaina, namala mangowa mpaka ri kota-kota etu pade rakalendu nggari ja'i ntau madota mompesawa i'a. I'a kana rakalendu sampe ratangara ri ngayo ntodea.