थिसलुनीके नगर में पउलुस के परचार
2
1 हे भइवन-बहिनियन तोहिने जानत हां कि हमिन के तोहिन भीरा आइल डड़ नई होलई । 2 तोहिने इहो जानत हां कि हमिन फिलिप्पी सहर में दुख भोगलियई आऊ बेजती सहलियई, तबो में हमिन के परमेस्वर हमिन के अइसन हियाव देलथीन कि हमिन के ढेरे बिरोध होते भर में हमिन परमेस्वर के बढ़िया खबर के तोहिन के सुनउलिवा । 3 काहेकि हमिन के सिक्छा गलती, आऊ गलत सोच-बिचार आऊ आल-जाल से नई हई ।4 काहेकि परमेस्वर हमिन के ऊपरे भरोसा कर के बढ़िया खबर के सोंपे खातिर आपन लायक समझलथीन । इहेसे हमिन अदमिनियन के नई, बाकि हमिन के दिल के परखेवोला परमेस्वर के खुस कर के बतावत हिवा । 5 तोहिन जानत हां कि हमिन कहियो डिंगबाजी करे आऊ धन के लालच खातिर कुछु धोखेबाजी नई करलियई, एकर परमेस्वर गोवाह हथीन । 6 हमिन मसीह के खास चेलवन होवे के चलते तोहिन पर बोझ डाल सकत हलिवा, तबो में हमिन तोहिन से आऊ कवनो से बड़ाई नई चहलिवा ।
7 बाकि जइसे एगो माई आपन बाल-बच्चा के पाला-पोसा हई, ओइसही हमिन तोहिन के बीचवा में नम्रता* साथे रहलिवा । 8 आऊ ओइसही हमिन तोहिन से पेयार-दुलार करते में, तोहिन खातिर खाली परमेस्वर के बढ़िया खबर सुनावेला नई, बाकि आपन आपन जानो देवेला तइयार हलिवा, काहेकि तोहिन हमिन खातिर बड़ी दुलरुवा बन गइल हां । 9 हे भइवन-बहिनियन तोहिन हमिन के मेहनत आऊ कस्ट के इयाद रखत हां; हमिन रात-दिन काम-धन्हा करके तोहिन के बीच में परमेस्वर के बढ़िया खबर सुनावत हलिवा ताकि हमिन तोहिन में से कोनो परे बोझ नई होऊं । 10 तोहिने आऊ परमेस्वर भी गोवाह हथीन कि हमिन के चाल-चलन तोहिन बिसवासीयन के संगे कइसन पबितर आऊ सही आऊ बेकसूर हलई । 11 तोहिन जानत हां कि जइसे बाप आपन लइकवा-लइकियन संगे चाल-चला हई, ओइसही हमिनो तोहिन में से हर कोई के सिक्छा देवत हलिवा, आऊ हियाव बढ़ावत हलिवा आऊ समझावत हलिवा । 12 ताकी तोहिन के चाल-चलन परमेस्वर के लायक होई, जे तोहिन के आपन राज आऊ महिमा में सहभागी होवेला बोलावा हथीन ।
13 इहेसे हमिन हर घरी परमेस्वर के दन्यबाद करत हियई कि जखनी हमिन के चलते परमेस्वर के बढ़िया खबर तोहिन भीर पहूंचलई, त तोहिन ओकरा अदमिनियन के वचन जइसन नई बाकि सच में परमेस्वर के वचन बुझ के मंजूर कइला, उहे वचन तोहिन बिसवासीयन में काम करत हई ।
14 हे भइवन-बहिनियन, तोहिन परमेस्वर के यहूदिया इलाका के कलीसियन तरी चाल चले लगलहीं, काहेकि तोहिनो सब अदमिनियन से ओइसही दुख-तकलिफ पउला जइसे यहूदिया इलाका के बिसवासियन यीसु मसीह में आपन बिसवास के चलते आपन लोगन से पउले हलथीन । 15 उहे यहूदियन परभु यीसु के आऊ परमेस्वर देने से बोलेवोलनो के मुवा देलथीन आऊ हमिन के सतउलथीन, आऊ परमेस्वर ओकिन से खुस नई हथीन, आऊ ओकिन सब अदमिनियन के बिरोध में हथीन । 16 आऊ ओकिन गइर-यहूदी लोगन भीरा एकिन के मुक्ती पावेला बढ़िया खबर बतावे से हमिन के रोकत हथीन । आऊ ओकिन हरमेसा अइसन कर के आपन पाप के घड़ा भरते रहतथीन; इहेसे ओकिन परे परमेस्वर के बड़ी गोसा आइल हई आऊ ओकिन के डंड़ देतथीन ।
पउलुस कलीसिया से फिन मिलेला चाहत हई
17 हे भइवन-बहिनियन, हमिन कुछु दिना से तोहिन भीरा से दूर में हलिवा, बाकि मन से दूर नई, तबो में हमिन तोहिन के देखेला आपन मन से ढेर कोसिस कइलिवा । 18 इहेला हमिन तोहिन भीरा आवेला, बिसेस कर के हम पउलुस, एक-दु खवां कोसिस कइलिवा बाकि सइतान हमिन के अड़ांगा लगउलई । 19 हमिन के परभु यीसु के दुबारा आवे घरी तोहिने हमिन के आसरा आऊ खुसी आऊ बड़ाई के मुकुट होइबा । 20 असली में हमिन के बड़ाई आऊ खुसी तोहिने हां ।