3
1 इहेसे हमिन अथेना में अकेले रहेला सोंचलियई, काहेकि हमिन के ओकरा से आऊ जादे सहे नई सकलियई । 2 आऊ हमिन तीमुथियुस के तोहिन भीरा पेठउलिवा । उ मसीह के बढ़िया खबर के परचार में हमिन के भाई आऊ परमेस्वर के सेवक हई । ताकि उ जा के तोहिन के बिसवास के मजबूत करतई आऊ बढ़ावा देतई । 3 इहेसे कवनो इ दुख-तकलीफ के चलते न डगमगइहां । काहेकि तोहिने जानत हां कि इहे दुख-तकलीफ खातिर हमिन ठहरावल गइल ही । 4 जखनी हमिन तोहिन भीर हलियई, त सचो में तोहिन से कहत हलिवा कि हमिन के दुख-तकलीफ उठावेला परतई आऊ ओइसही होलई, एकरा तोहिन जनबो करा हां । 5 इहे चलते हमरा से आऊ नई सहलई, त तोहिन के बिसवास के खबर पता करेला तीमुथियुस के तोहिन भीरा पेठउलिवा, काहेकि हम डेरा गलियई कि सइतान तोहिन के परीक्छा कइले होतई आऊ हमिन के मेहनत बेकार हो गइले होतई ।तीमुथियुस से हाल-चाल पाके पउलुस खुस होलई
6 बाकि अभी तीमुथियुस तोहिन भीर से हमिन भीर आइल हई, आऊ तोहिन के बिसवास आऊ परेम के बढ़िया हाल सुनउलई आऊ इहो बतउलई कि तोहिन हरदम हमिन के बड़ी इयाद करत हां, आऊ जइसे हमिन तोहिन के देखेला मन करा हई ओइसही तोहिनो हमिन के देखेला मन करा हई ।
7 इहेसे हे भइवन-बहिनियन, हमिन के सब दुख-तकलीफ आऊ सताव में तोहिन के बारे में तोहिन के बिसवास के चलते हमिन के मन जुड़ा गलई। । 8 काहेकि तोहिन परभु में बड़ी मजबुत हां । एकरा सुन के हमिन के जान में जान आ गलई ।
9 आऊ परमेस्वर के नजर में जेतना खुसी तोहिन के बारे में हमिन के हई, ओकर चलते हमिन परमेस्वर के ढेरे धन्यबाद करत हियई । 10 हमिन रात-दिन जतन से पराथना करते रहा हियई कि तोहिन के मूंह देखूं आऊ तोहिन के बिसवास में जे कुछु कमी रह गइल हई ओकरा पूर्ती करूं ।
11 अब हमिन के पिता परमेस्वर अपनही आऊ हमिन के परभु यीसु हमिन के तोहिन भीरा आवे खातिर डहर दिखावे । 12 आऊ परभु अइसन करतथीन कि जइसे हमिन तोहिन से परेम करत हियई, ओइसही तोहिन अपनन ही में आऊ सब अदमिनियन के संगे तोहिन के परेम बढ़तई आऊ उमड़तई । 13 जखनी हमिन के परभु यीसु आपन सब पबितर लोगन के संगे अतथीन, त हमिन के पिता परमेस्वर के सामने तोहिन के मनवा के अइसन मजबुत करतथीन ताकि तोहिन पबितर आऊ बेकसूर होइबा ।