यीसु मसीह के खास चेलवन के ढेरे काम के बखान
किताब के परिचय
‘यीसु मसीह के खास चेलवन के ढेरे काम’ के इ किताब पबितर आत्मा के ढेरे काम के बखान हई । इ किताब लूका से लिखल गइल हई । यीसु मसीह के सरग जाय के बाद पबितर आत्मा मसीही मंडली में सुरु से लेके का कुछ करत हई, आऊ मसीही मंडली यरूसलेम सहर से लेके पूरा रोमी सामराज में कइसे फइलल गलई, ओकर बारे में इ किताब में लिखल हई ।
इ किताब में 18 भासण के देख सका हई । इ सब भासण मसीह के पहिला मंडली के परचार के मुख्य बातिया हई । इ किताब ‘लूका के लिखल बढ़िया खबर’ के अगाड़ी के बखान हई । ‘लूका के लिखल बढ़िया खबर‘ 24:46-47 में अइसन लिखल हई “मसीह दुख उठउतथीन, आऊ मूवलकन में से तीसरका दिन जी उठतथीन, आऊ पाप छेमा पावे खातिर पाप के छोड़ के परमेस्वर भीरा आवेला चाही; एकर परचार यरूसलेम से लेके सब जातियन में मसीह के नाम से कइल जतई । तोहिन इ सब बतिया के गोवाह हही । आऊ जेकर वादा हमर पिता कइले हथीन, ओकरा हम तोहिन खातिर भेजबऊ ।” इ किताब में अइसन देख सका हियई कि खास चेलवन आऊ मसीही मंडली के सब नेतवन पबितर आत्मा से भरपूर हो गइल हलथीन ।
इ किताब हमिन से बतावा हई कि मसीही मंडली सब लोगन खातिर खुलल हई । पबितर आत्मा मरद आऊ मेहरारु आऊ लइका-लइकियन के यीसु मसीह में बिसवास करे में कइसे मदत करा हई, ओकर बारे में बतावा हई । इ किताब में अइसन देख सका हई कि यीसू मसीह के खास चेलवन के आऊ मसीह के पहिला मंडली के बिसवासियन के आऊ नेतवन के जिन्गी एगो नमुना तरी हलई । पउलुस आऊ पतरस के पबितर जिन्गी, समरपण आऊ धीरज के देखावल गइल हई । स्तेफानोस के धीरज आऊ ओकर मूवावेवोलन खातिर पराथना आऊ गेइर-यहूदी कुरनेलियुस के भक्त जिन्गी आऊ बिसवास-लायक बरनबास के बारे में आऊ फिलिप्पुस के बात मानेला आऊ पहिलकन बिसवासियन के सझिया जिन्गी, इ सब इ किताब में बतावल गइल हई ।
इ किताब में पाप छोड़ के परमेस्वर भीरा फिरावल, परभु पर बिसवास, बपतिस्मा, आऊ पाप के छेमा के बारे में भी बतावल गइल हई । इ किताब खाली इतिहास के बात नखई, बाकि परभु परे हमिन के बिसवास के मजबूत करे में आऊ परभू खातिर अरपरण कइल गइल जिन्गी जीये में इ किताब के पढ़ाई हमिन के मदत करा हई । खास चेलवन के धीरज के देख के हमिनो के सताव होइते भर में हमिन के सेवकाई खुसी से कर सका हियई ।
रूप-रेखा :
1. यीसु के गोवाही खातिर तइयारी 1:1-26
a. यीसु के आखिरी हुकुम आऊ वादा 1:1-14
b. यहूदा के जगह मत्तियाह के चुनल जायला 1:15-26
2. यरूसलेम में गोवाही 2:1-8:3
3. यहूदिया आऊ समरिया में गोवाही 8:4-12:25
4. पउलुस के सेवकाई 13:1-28:31
a. पहिला परचार-यात्रा 13:1-14:28
b. यरूसलेम के सभा के फइसला 15:1-35
c. दूसरका परचार यात्रा 15:36-18:22
d. तीसरका परचार यात्रा 18:23-21:16
e. यरूसलेम, कइसरिया आऊ रोम में बन्हलका पउलुस 21:17-28:31