थिसलुनीके नगर के कलीसिया खातिर यीसु मसीह के खास चेला पउलुस के लिखल पहिला चिट्टी
इ चिट्ठी के परिचय
पउलुस, सिलवानुसa आऊ तिमुथियुस साथे थिसलुनीके नगर के कलीसिया खातिर इ चिट्ठी लिखत ही । थिसलुनीके एगो बड़का नगर हलई । उहां पउलुस यीसु मसीह के बढ़िया खबर सुनउलई त ढेरे लोगन यीसु मसीह परे बिसवास करलथीन । इ यहूदी लोगन के पसंन नई हलई । पउलुस गइर-यहूदी लोगन भीरा यीसु के बढ़िया खबर सुनावे के चलते ओकिन बिसवासियन के ढेरे सतउलथीन । इहेसे पउलुस के उहां से जायला परलई । बाद में उ कलीसिया के खबर तिमुथियुस के चलते पउलुस के मिललई आऊ ढेरे खुस होलई ।
उहां के बिसवासियन के ढाढ़स देवेला आऊ ओकिन के बिसवास के मजबुत करेला पउलुस इ चिट्ठी लिखले हई । उ ओकिन के परेम आऊ बिसवास खातिर परमेस्वर के धन्यबाद करत हई । जखनी उ ओकिन भीरा हलई त ओकिन संगे कइसन जिन्गी बितउलई ओकर बारे में इयाद करावत हई । यीसु के दुबारा आवे में का होतई आऊ मुवे के बाद बिसवासियन के का होतई इ सब के बारे में इ चिट्ठी में लिखल हई । इ चिट्ठी में अइसनो लिखल गइल हई कि हमिन दुख-तकलीफ खातिर ठहरावल गइल ही । इहेसे हमिन के नई डगमगायेला चाही ।
हमिन बिसवासियन दूसर लोगन जे अमर जिन्गी के बारे में कोनो आसरा नई हई, ओकिन तरी नई रोवेला चाही । जखनी यीसु अतथीन, त जेकिन मसीह में मू गलथीन, ओकिन अगड़िये जी जतथीन । फिन हमिन जे जीयत हियई, उनकरा साथे बदरी में उठा लेवल जबई ताकि आसमान में परभु से मिलबई, आऊ इहे तरी हमिन हरदम परभु साथे रहबई । जइसे रतिया में चोर एकबइग आवा हई, ओइसही परभु के आवे के दिन होतई । इहेसे हमिन दुसर जइसन सूतल मत रहिहां, बाकि परभु के आवे के उ दिन खातिर जागल आऊ चेतल रहिहां ।
रूप-रेखा
जोहार 1:1
धन्यबाद आऊ इस्तुती 1:2--3:13
परमेस्वर के खुस करेवोला जिन्गी 4:1-12
यीसु के दुबारा आवे के बारे में सिक्छा 4:13-5:11
आखिरी सलाह 5:12-22
आखिरी जोहार 5:23-28