थिसलुनीके नगर के कलीसिया खातिर यीसु मसीह के खास चेला पउलुस के लिखल पहिला चिट्टी
पउलुस के जोहार
1
1 हम पउलुस, सिलवानुसa आऊ तिमुथियुस के साथे थिसलुनीके नगर के कलीसिया खातिर इ चिट्ठी लिखत हियई, जवन पिता परमेस्वर आऊ परभु यीसु मसीह के नाता में रहत हथीन । परमेस्वर तोहिन के अनुग्रह आऊ सांति देवेb ।कलीसिया के बिसवास देख के परमेस्वर के धन्यबाद करत हई
2 हमिन आपन पराथना में तोहिन के हरदम इयाद कर के तोहिन सब खातिर परमेस्वर के हरदम धन्यबाद करत हियई, 3 आऊ तोहिन के बिसवास से उगल काम आऊ परेम से भरल मेहनत आऊ हमिन के परभु यीसु मसीह में तोहिन के मजबुत असरा, इ सब के हमिन हरदम आपन पिता परमेस्वर के नजर में इयाद करत हियई ।
4 हे परमेस्वर के दुलरुवा भइवन-बहिनियन, हमिन इ जानत हियई कि परमेस्वर तोहिन के चुनले हथीन । 5 काहेकि यीसु मसीह के बढ़िया खबर तोहिन भीर खाली बोली से नई, बाकि पबितर आत्मा के सक्ती आऊ मजबुत बिसवास साथे पहूंचल हई । तोहिन इहो जानत हहूं कि तोहिन के भलाई खातिर हमिन कइसे जिन्गी बितउलियई ।
6 तोहिन बड़ी दुख तकलीफ में हलहूं, तबो में पबितर आत्मा के खुसी के साथे वचन के मान के हमिन के तरी आऊ परभु के जइसन चाल चले लगलहूं । 7 एकर चलते मकिदुनिया आऊ अखया इलाका के सब बिसवासियन खातिर तोहिन एगो नमुना बन गइल हहूं ।
8 काहेकि परभु के वचन तोहिन के चलते खाली मकिदुनिया आऊ अखया इलाका में नई सुनावल गइल हलई, बाकि हर इलाका में परमेस्वर में तोहिन के बिसवास के बतिया फइल गलई । इहेसे हमिन के आऊ लोगन से कुछु कहहुं के जरुरी नई हई । 9 हर इलाका के बिसवासियन अपने बतावत हथीन कि तोहिन हमिन के कइसे मंजूर कइले हां आऊ तोहिन मूरतियन के छोड़ के जीयत आऊ सच्चा परमेस्वर के सेवा करे खातिर कइसे मन फिरउला । 10 आऊ तोहिन परमेस्वर के बेटा यीसु के सरग से आवे के आसरा देखते रहा, जिनकरा पिता परमेस्वर मुवलकन में से जियउलथीन । उ यीसु हथीन जे हमिन के आवेवोला डंड़ से बचउतथीन ।