यीसु के जी जायेला
24
1 बाकि हपताह के पहिलका दिना मतलब एतवार के भोर में उ सब अउरतियन कबर पर उ बढ़िया गम्हके वोला चीजवन के लेके अलथीन, जेकरा ओकिन तइयार करले हलथीन । 2 ओकिन कबर के ढाकल पखला के कबर पर से एकरे ढनगावल देखलथीन । 3 बाकि ओकिन भीतरे गलथीन, त ओकिन उहां परभु यीसु के लास के नई देखलथीन । 4 जखनी ओकिन इ बात के सोच में पड़ गलथीन, त देखा, ओकिन भीर झलकत कपड़ा पेन्हले दूगो अदमिनियन आके डीड़ी होलथीन ।5 उ अउरतियन ढेर ढेरा के आपन मूड़िया जमीन पर टेकलथीन, बाकि उ अदमिनियन अउरतियन से कहलथीन, "तोहिन जीयल के मूवलकन में काहे खोजत हहीं ? 6 उ इहां नखथीन, बाकि जी गइल हथीन, इयाद करा कि उ गलील में तोहिन संगे हलथीन त का कहले हलथीन । 7 उ अइसन कहले हलथीन कि 'आदमीन के बेटा' के पापी अदमिनियन के हाथ में जरुर सोंपेला हई, फिन उ कुरुस पर चढ़ा देवल जतथीन आऊ तीसरका दिन उ जी जतथीन । 8 तखनी उ सब अउरतियन के यीसु के बातिया इयाद अलई । 9 ओकिन कबर से घुम गलथीन आऊ ओकिन इ सब बतिया उ एगारहो खास चेलवन आऊ दूसर लोगन से बतउलथीन । 10 इ अउरतियन के नाम मरियम-मगदलीनी, योअन्ना आऊ याकूब के माई मरियम हलथीन । ओकिन संगे दूसरको अउरतियन हलथीन जे इ बातिया के खास चेलवन से कहले हलथीन । 11 बाकि खास चेलवन के इ बातिया कहानी जइसन लगलई, आऊ ओकिन उ सब बतिया पर बिसवास नई करलथीन । 12 तखनी पतरस उठ के कबर देने दउड़ल गलई आऊ निहुर के भीतरे देखलई, त ओकरा खाली मखमल के कपड़ा पड़ल देखलई आऊ जवन होइल हलई ओकरा पर अचम्भा करते आपन घरे चल गलई ।
यीसु इम्माऊस डहर देने जात हथीन
13, उहे दिन यीसु के चेलवन में से दूगो, यरुसलेम से लगभग एगारह किलो मीटर दूर बसल इम्माऊस नाम के एगो गांव में जात हलथीन । 14 जे घटना घटल हलई, उ सब बात परे ओकिन अपननही में बातचीत करत जात हलथीन । 15 ओकिन अपननहीं में बातचीत करत आऊ पूछताछ करते जात हलथीन, त यीसु खुद उहां आके ओकिन के साथे-साथे हिठे लगलथीन । 16 बाकि परमेस्वर ओकिन के यीसु के चिन्हे नई देलथीन ।
17 यीसु दूनो चेलवन से कहलथीन, "हिठते-हिठते का बात करत जात हां ?” ओकिन दुखी होके डीड़ी हो गलथीन । 18 इ सुन के ओकिन में से किलयोपास नाम के एगो आदमीन उनकरा से कहलई, यरूसलेम में रहेवालन में का रउवा एके आदमीन हिये जे कछु हाले में घटल हई ओकरा नइखहीं जानत ।
19 उ आदमीन ओकिन से पूछलथीन "का बतिया होइल हई ? ओकिन उनकरा से कहलथीन, "इ सब नासरत गाँव के यीसु के बारे में हई, उ परमेस्वर देने से बोलेवोला एगो महान आदमीन हलथीन । उ परमेस्वर आऊ सब अदमिनियन के नजर में बात आऊ काम में परमेस्वर के सामरथ से भरल हलथीन । 20 आऊ हमिन के मुख्य याजकवन आऊ यहूदी नेतवन उनकरा कइसे मउत के डड़ देवेला जिमा देलथीन । आऊ ओकिन उनकरा कुरुस पर चढ़ा देलथीन । 21 बाकि हमरा असरा हलई कि इ उहे आदमीन हथीन जे इस्राएल लोगन के बचउतथीन, आऊ सचो में इ सब बात के होइला के आज तीसरका दिन हई ।
22 फिन एकर अलवा हमिन के झूंड के कुछ अउरतियन हमिन के चकचिहा देले हथीन । ओकिन आज बिहाने में गड़ांत में गइल हलथीन । 23 ओकिन यीसु के लास के उहां नई पउलथीन, त ओकिन इ कहते आपस अलथीन कि हमिन सरगदूत के देखलियई, आऊ ओकिन कहत हलथीन कि यीसु जीते हथीन । 24 फिन हमिन के सथिवन में से कुछ लोगन उ गड़ांत में गलथीन, आऊ जइसन अउरतियन कहले हलथीन, ओइसही उहां पउलथीन, बाकि यीसु के नई देखलथीन ।”
25 तखनी यीसु उ दूनो चेलवन से कहलथीन, “तोहिन केतना बुड़बक हहीं आऊ परमेस्वर देने से बोलेवोलन के किताब में लिखल सब बतिया परे बिसवास करे में तोहिन के ढेरे मुसकिल लागत हई । 26 का इ जरूरी नई हलई कि मसीह खातिर इ दुख उठा के आपन महिमा में घुसतथीन ? 27 फिन यीसु मूसा से लेके परमेस्वर देने से बोलेवोला सब अदमिनियन के पबितर किताब में आपन बारे में जे कुछ लिखल हलई, उ सब ओकिन के समझा देलथीन ।
28 ओकिन एम्माउस गांव के भीरी पहूँचलथीन, जाहां पर ओकिन जात हलथीन, त यीसु अइसन देखउलथीन कि उनकरा ओकिन से अगाड़ी जायेला हई । 29 बाकि ओकिन यीसु के ढेरे खुसामत कर के रोकलथीन कि 'रउवा हमिन साथे रह जाऊं, काहेकि अछमुन्हर होखत हई, आऊ दिन ढलल जात हई ।” त यीसु ओकिन साथे रहेला भीतरे गलथीन । 30 यीसु ओकिन संगे खायेला बइठलथीन, त यीसु रोटी के लेके धन्यबाद देलथीन, आऊ ओकरा तोड़ के ओकिन के देवे लगलथीन । 31 उहे घरी तुरतिये चेलवन के आंख खुल गलई, आऊ ओकिन यीसु के चिन्ह लेलथीन, बाकि यीसु ओकीन के आंख से एकबैक गायब हो गलथीन ।
32 ओकिन अपननही में कहत हलथीन कि जवन घरी यीसु हमिन साथे बात करत हलथीन, आऊ पबितर किताब के मतलब समझावत हलथीन, त का हमिन के मन गदगद नई होलई ?” 33 यीसु उहे घरी उठ के यरूसलेम सहर में घुर गलथीन, आऊ एगारहो खास चेलवन आऊ उनकर सथिवन के एके जगह जुटल पउलथीन । 34 ओकिन कहत हलथीन, “परभु सच में मूवलकन में से जी उठले हथीन, आऊ समोन के देखाई देले हथीन ।” 35 फिन ओकिन दूनो जवन कुछ डहर में होइल हलई, आऊ जखनी यीसु रोटी टुके घरी उनकरा कइसे चिन्हलियई, इ सब बतिया ओकिन से बतउलथीन । 36 जे घरी इ बतिया के बतावत हलथीन, यीसु ओकिन के बीच में आके डीड़ी होलथीन आऊ कहलथीन, “तोहिन के सांति मिलतई ।" 37 बाकि ओकिन घड़बड़ा गलथीन आऊ डेरा गलथीन, आऊ सोचलथीन कि हमिन कोनो परेत के देखत हियई । 38 यीसु ओकिन से कहलथीन, काहेला घड़बड़ात हहीं ? आऊ तोहिन मन में सक काहे करत हां ? 39 हमर हाथ आऊ हमर गोड़ के देखा, हम यीसु ही हियऊ ! हमरा छूके देखा, काहेकि परेत आत्मा के हाड़-मांस नई होवा हई, जइसे तोहिन हमरा में देखत हां । 40 इ कह के यीसु आपन हाथ आऊ गोड देखलथीन । 41 आऊ ओकिन के ढेरे खुसी के मारी बिसवास नई होखा हलई, आऊ ओकिन के अचम्भा होवे लगलई, त यीसु ओकिन से पूछलथीन, “का तोहिन भीर कुछ खायेला हऊ ? 42 ओकिन यीसु के भूंजल मछरी के टुकड़ा देलथीन । 43 यीसु ओकरा लेके ओकिन भिरा खलथीन । 44 फिन यीसु ओकिन से कहलथीन, जइसन हम तोहिन साथे रहे घरी कहले हलियऊ कि हमर बारे में मूसा के नियम आऊ परमेस्वर देने से बोलेवोलन के किताब आऊ भजन के किताब में लिखल हई, उ सब बात जरुर पूरा होवेला चाही । 45 तखनी यीसु पबितर किताब के बतिया के समझेला ओकिन के मन के खोल देलथीन । 46 आऊ यीसु ओकिन से कहलथीन, पबितर किताब में अइसन लिखल हई कि मसीह दुख उठउतथीन, आऊ मूवलकन में से तिसरका दिन जी उठतथीन । 47 पाप छेमा पावे खातिर पाप के छोड़ के परमेस्वर भीरा आवेला चाही; एकर परचार येरुसलेम से लेके सब जातियन में मसीह के नाम से कइल जतई । 48 तोहिन इ सब बतिया के गोवाह हहीं । 49 आऊ सुना, जेकर वादा हमर पिता करले हथीन, ओकरा हम तोहिन खातिर भेजबऊ, आऊ तोहिन सरग के सक्ती पावे तक तोहिन येरुसलेम सहर में रुकल रहिहं । 50 तखनी यीसु ओकिन के बैतनिय्याह गांव देने ले गलथीन, आऊ आपन हाथ उठा के ओकिन के आसिरबाद देलथीन । 51 जखनी यीसु ओकिन के आसिरबाद देवत हलथीन, उहे घरी ओकिन से यीसु अलगे हो गलथीन, आऊ परमेस्वर उनकरा सरग में उठा लेलथीन । 52 तखनी ओकिन यीसु के आराधना करके आऊ ढेर खुस होके यरूसलेम आपस आ गलथीन । 53 आऊ ओकिन बरबरे परमेस्वर के मंदिर में रह के परमेस्वर के आराधना करे लगलथीन ।