राजपाल पिलातुस यीसु से बेयान लेवत हई
(मत्ती 27:1-2, 11-14; मरकुस 15: 1-5; यूहन्ना 18: 28-38)
23
1 फिन यहूदी नेतवन सब उठ के यीसु के राजपाल पिलातुस भीर ले गलथीन । 2 ओकिन यीसु पर इ कह के दोस लगावे लगलथीन, “हमीन इ आदमीन के हमिन के जातियन के फोरते भर में देखले हियई आऊ हमिन के रोमी महा राजा के लगान देवेला मना करा हई आऊ खुदे मसीह, हमिन के राजा कहत हई ।” 3 राजपाल पिलातुस यीसु से पूछलई, “का तू यहूदियन के राजा हें ? यीसु कहलथीन, “तूहीं खुदे कहत हें । ” 4 फिन पिलातुस मुख्य याजकवन आऊ भीड़ से कहलई, “हम इ आदमीन में कवनो दोस नइखियई पावत । 5 बाकि ओकिन सब टिक के कहे लगलथीन, “इ सब यहूदिया इलाका में लोगन के आपन सिक्छा से फोरा हई । इ गलील इलाका में सुरु करले हलई आऊ अबही इहऊं आ गलई ।” 6 इ सब बातिया सुन के पिलातुस पूछलई, “का इ आदमीन गलील इलाका के हई ? ” 7 जखनी पिलातुस इ जानलई कि यीसु हेरोदेस राजा के इलाका के हथीन, त यीसु के हेरोदेस राजा भीर पेठा देलई, काहेकि उ घरी हेरोदेस राजवो यरूसलेम सहर में हलई ।यीसु हेरोदेस राजा भीर
8 हेरोदेस राजा यीसु के देख के ढेरे खुस होलई । काहेकि उ ढेरे दिन से यीसु के देखेला चाहत हलई । काहेकि उ उनकर बारे में सुनले हलई, आऊ उनकरा से कुछ अजगुत चिन्हा देखेला आसरा रखले हलई । 9 हेरोदेस राजा यीसु से ढेरे बात पूछते रहलई, बाकि यीसु ओकरा कुछो जबाब नई देलथीन । 10 महा याजक आऊ नियम के गुरुयन डीड़ी होके यीसु पर बले-कले के दोस लगावत हलथीन । 11 फिन हेरोदेस राजा आपन सिपाहीयन के संगे उनकरा बेजती कर के मजाक उड़उलथीन, आऊ पोसाक पेन्हाके उनकरा राजपाल पिलातुस भीर पेठा देलई । 12 उहे दिन से पिलातुस आऊ हेरोदेस साथी बन गलथीन, काहेकि एकर पहिले एकिन दूनो में पटत नई हलई ।
राजपाल पिलातुस यीसु के मउवत के डड़ देवा हई
13 राजपाल पिलातुस मुख्य याजकवन आऊ यहूदी नेतवन आऊ लोगन के संगे बोलउलई । 14 आऊ कहलई, “तोहिन इ आदमीन के लोगन के फोरेवोला दोस लगा के हमरा भीर लानले हां । सुना, हम इहां अभी तोहिन भीरा एकरा से बेयान लेलियई आऊ जांच करलियई, बाकि तोहिन एकरा पर जवन दोस लगावत हां उ दोस एकरा में नई हई । 15 आऊ हेरोदेस राजवो एकरा में कवनो दोस नई पउलई, आऊ फिरो हमरा भीर पेठा देले हई । आऊ देखा, इ आदमीन मउवत के डड़ देवे लायक कुछ गलती नखई कइले । 16 इहेला हम एकरा कोड़ा से मरवा के छोड़ देवत हियई ।”
17 (पिलातुस के यहूदियन के फसह के परब में ओकिन खातिर एगो कइदी के छोड़ेला पड़ा हलई ।) 18 बाकि सब लोगन एके साथे मिल के चिलिया के कहलथीन, “एकरा मूवा दा, आऊ हमिन खातिर बराब्बा के छोड़ दा !” 19 बराब्बा जेल में हलई, काहेकि उ यरूसलेम सहर में रोमी सामराट के बोरोध में कलह उठउलई आऊ केकरो मूवा देले हलई । 20 बाकि राजपाल पिलातुस यीसु के छोड़ेला चाहत हलई, इहेला लोगन के फिन से समझउलई । 21 बाकि अदमिनियन चिलिया के कहे लगलथीन, “ओकरा कुरुस पर चढ़ा के मूवा दा, कुरुस पर चढ़ा के मूवा दा ।”
22 राजपाल पिलातुस ओकिन से तिसरका खंवा कहलई, “काहे ? इ का गलती कइले हई ? हम एकरा में मूवावे लायक कवनो गलती नइखी पउले । इहेला हम एकरा कोड़ा मरवा के छोड़ देवत हियई ।
23 बाकि ओकिन जोर से चिलिया-चिलिया के आऊ टिक के कहत हलथीन कि यीसु के कुरुस पर चढ़ा के मूवावल जाई । आऊ ओकिन के चिलियाइब सुन के राजपाल पिलातुस के अइसही करेला परलई । 24 पिलातुस ओकिन के मांग के मान लेलई । 25 राजपाल पीलातुस उहे आदमीन के जवन कलह आऊ मूवावे के चलते जेल में बंद करले हलई, ओकरा छोड़ देलई, बाकि यीसु के ओकिन के हाथ में जिमा देलई ताकि ओकिन जइसन चाहलथीन ओइसही कर सका हथीन ।
यीसु के कुरुस पर चढ़ा के मूवावल जायला
26 सिपहियन यीसु के ले जात हलथीन, उहे घरी ओकिन कुरेनी सहर के समोन नाम के एगो आदमीन के खेत से आवत देखलथीन, आऊ ओकरा धर के यीसु के कुरुस ओकरा पर बलेके लाद देलथीन कि उ यीसु के पीछे-पीछे लेके चलतई । 27 ढेरे भीड़ यीसु के पीछे जात हलथीन, उ भीड़ में ढेरे अउरतियनो हलथीन जेकिन यीसु खातिर करेजा पीट-पीट के रोवत हलथीन । 28 बाकि यीसु ओकिन देन घुर के कहलथीन, “हे यरूसलेम के बेटियन, हमर खातिर नई रोवा, बाकि तोहिन आपन खातिर आऊ आपन बाल-बच्चा खातिर रोवा । 29 काहेकि सुना, अइसन दिन आवत हई जखनी अदमिनियन कहतथीन, “धन्य हथीन ओकिन जे बांझ हथीन, आऊ कहियो गरभवती नखथीन होइल, आऊ आपन छाती से कहियो दूध नखथीन पियउले । 30 फिन ओकिन बड़का पहाड़ से कहे लगतथीन, ‘हमीन परे गिर जो, आऊ टिल्हवा से कहतथीन, हमीन के तोप ले ।’ 31 काहेकि जखनी ओकिन हरियर रुख संगे अइसन करा हथीन, त सुखलका संगे का कुछ होतई ?a
32 ओकिन यीसु संगे दूगो अपराधियनो के मूवावेला ले जात हलथीन । 33 ओकिन खोपड़ी नाम के एगो जगह पर पहूँचलथीन, त ओकिन उहां यीसु के आऊ उ दूनो अपरधियनो के कुरुस पर चढ़ा देलथीन । एगो के यीसु के दहिना करे आऊ एगो के उनकर बांया करे ।
34 तखनी यीसु कहलथीन, ‘हे पिता, एकिन के माफ कर दिहूं, काहेकि एकिन नखथीन जानत कि एकिन का करत हथीन ? फिन सिपहियन चिट्ठी डाल के यीसु के कपड़ा के बांट लेलथीन ।
35 अदमिनियनो उहां डीड़ी होके देखत हलथीन, बाकि यहूदियन के मुख्य नेतवन यीसु के मजाक उड़ा के कहे लगलथीन, इ त दूसर के बचउलई, अगर इ परमेस्वर से पेठावल मसीह हई, आऊ उनकर चुनल हई, त अपने आप के बचा ले । 36 सिपहियनो यीसु भीर आके आऊ खटा अंगूर के रस देके उनकरा मजाक उड़ा के कहे लगलथीन, 37 अगर तू यहूदियन के राजा हहीं, त अपने आप के बचा ले । 38 आऊ यीसु के कुरुस के ऊपरे एगो हकवा-पट्टी में अइसन लिख के ठोकले हलई कि इ यहूदियन के राजा हथीन ।”
एगो अपराधी के मन बदलाव
39 उहां कुरुस में लटकावल अपराधीयन में से एगो यीसु के निन्दा कर के कहलई, “का तू मसीह नइखे ? त फिन अपनहूं आऊ हमीनो के बचा लेहूं ।”
40 बाकि दूसरका अपरधिया ओकरा डाट के कहलई, “का तू परमेस्वर से नई डेरा हें ? तुहूं त उहे डंड़ पावत हें । 41 आऊ हमिन त इ डड़ पावे के लायक हियई, बाकि इ आदमीन कुछो गलती नखई करले ।” 42 फिन उ कहलई, “हे यीसु जखनी रउवा राजा बन के आइबा, त हमरो इयाद रखिहां ।” 43 यीसु ओकरा से कहलथीन, “हम तोहरा से एकदम कहत हियऊ, "आज तू हमरा संगे सरगलोक में होइबे ।"
यीसु के मउवत
44 दुपहरिया के घरी लगभग बारह बजे से लेके तीन बजे तक सउसे धरती में अन्हार हो गइल हलई । 45 काहेकि सूरज रोसनी नई देवत हलई, आऊ एकबइक मंदिर के परदा बिचे से फाट के दू करे हो गलई । 46 फिन यीसु जोर से चिलिया के कहलथीन, "हे पिता, हम आपन आत्मा के राउर हाथ में जिमा देवत हिये, आऊ अइसही कह के यीसु मू गलथीन ।
47 रोमी सेना के एगो सुबेदार उहां जे कुछ होइल हलई उ देखलई त परमेस्वर के बड़ाई करे लगलई, आऊ कहलई, 'सचो में इ आदमीन बेकसुर हलई ।' 48 इ सब देखेला जे लोगन उहां जमा होइल हलई, ओकिन उ देख के रोवत आऊ करेजा पीटते आपन घरे आ गलथीन । 49 बाकि यीसु के सब चिन्हल-जानल लोगन आऊ उ अउरतियन जे गलील इलाका से उनकर पीछे-पीछे आइल हलथीन, ओकिन सब दूरे डीड़ी होके इ सब कुछ के देखत हलथीन ।
यीसु के गाड़ल जायेला
50 उहे घरी उहां यूसुफ नाम के एगो आदमीन यहूदी सभा के मुखिया हलई । उ नेक आऊ परमेस्वर के नजर में बढ़िया जिन्गी जीयेवोला हलई । 51 यूसुफ यहूदिया देस के अरिमतिया सहर के हलई, आऊ परमेस्वर के राज के असरा देखत हलई । बाकि यहूदियन जे यीसु के कुरुस पर चढ़उलथीन, ओकिन के योजना आऊ काम से उ खुस नई हलई । 52 यूसुफ राजपाल पिलातुस भीर जाके यीसु के लास के मंगलई । 53 आऊ यीसु के लास के कुरुस से उतार के मखमल के चदर में लपेटलथीन, आऊ एगो कबर में रखलथीन जेकरा पखल के खान के बनवउले हलई; आऊ ओकरा में कोनो मुरदा के कहियो नई रखले हलई । 54 उ दिन पबितर दिन के तइयारी करे के दिन हलई, आऊ पबितर दिन सुरु होवेवोला हलई ।