यीसु के पकड़े के बिचार
(मत्ती 26:1-5; मरकुस 14:1,2; यूहन्ना 11:45-53)
22
1 यहूदियन के बेगर-खमीर के रोटी के परब, जेकरा फसह के परब कहलावा हई, उ भीरी आइल हलई । 2 मुख्य याजकवन आऊ नियम के गुरुयन यीसु के मूवावेला कोनो तरीका खोजत हलथीन, काहेकि ओकिन अदमिनियन से डेरात हलथीन ।यहूदा धोखा देवा हई
3 तखनी सइतान यहूदा इस्करियोती के भीतरे समस गलई, जे यीसु के बारहो खास चेलवन में से एगो हलई । 4 उ यहूदा मुख्य याजकवन आऊ मंदिर के सरदरवन भीरा जाके इ बतियलई कि यीसु के कवन तरी से ओकिन के हाथे पकड़वउतई । 5 ओकिन ढेर खुस होलथीन, आऊ ओकरा रुपीया देवेला वादा कलथीन । 6 त यहूदा मान लेलई, आऊ उ घरी के ताक में हलई जे घरी भीड़ नई होतई त यीसु के ओकिन के हाथे धरवा देतई ।
चेलवन संगे फसह परब के आखिरी भोज
7 तखनी बेगर-खमीर के रोटी के परब के दिन अलई, जेकरा में फसह परब के भेड़ी के बाच्चा पूजेला जरुरी हलई । 8 यीसु पतरस आऊ यूहन्ना के इ कहके पेठउलथीन, “जा आऊ हमिन खातिर फसह के खायक तइयार करा कि हमिन खा सकबई । 9 ओकिन यीसु से पूछलथीन, "रउवा का चाहत हिये ? हमिन कहां एकर तइयारी करियई ? 10 यीसु ओकिन के कहलथीन, “सुना, तोहिन गांव में घुसे घरी तोहिन के एगो आदमीन गगरी में पानी ढोके ले जात मिलतऊ, जवन घर में उ जतई तोहिन ओकर पीछे-पीछे चलिहां । 11 आऊ उ घर के मालिक से कहिहां, 'गुरुजी ! हमिन के रउवा भीर इ पूछेला भेजले हथीन कि उ पहुनाई घर कहाँ हई जेकरा में हम आपन चेलवन के संगे फसह के परब के खाना खबई ?’ 12 उ तोहिन के ऊपरे छत में एगो सजल-सजावल बड़का कोठली देखा देतई; उहंई तोहिन तइयारी करिहां । 13 ओकिन उहां गलथीन आऊ जइसन यीसु कहले हलथीन, ओइसने पउलथीन आऊ फसह के खायक तइयारी करलथीन ।
परभु भोज
(मत्ती 26:26-30; मरकुस 14:22-26; 1 कुरिन्थियन 11:23-25)
14 खाना खाय के घरी अलई, त यीसु आपन खास चेलवन संगे खायेला बइठलथीन । 15 आऊ यीसु ओकिन से कहलथीन, “हमरा ढेर मन कलई कि दुख भोगे से पहिले, इ फसह के परब के खाना तोहिने संगे खबई । 16 काहेकि हम तोहिन से एकदम कहत हियऊ कि जबला एकर मतलब परमेस्वर के राज में पूरा नई होतई, तबला हम इ खाना कहियो नई खबई । 17 तखनी यीसु अंगूर के रस के कटोरा के लेके परमेस्वर के धन्यबाद करलथीन आऊ कहलथीन, ‘एकरा ला आऊ तोहिन अपनन में बांट के पी ला । 18 काहेकि हम तोहिन से कहत हियऊ कि परमेस्वर के राज आवे तक हम अंगुर के रस के फिर कहियो नई पिबई । 19 फिन यीसु रोटी लेलथीन आऊ धन्यबाद देके रोटी के टुकलथीन, आऊ आपन चेलवन के इ कह के देलथीन, “इ हमर देह हई, जेकरा हम तोहिन के देवत हियऊ : हमर इयाद करेला अइसही कइल करिहां । 20 इहे तरी यीसु कटोरा लेलथीन आऊ कहलथीन, “इ कटोरा परमेस्वर आऊ उनकर लोगन के बीच में नया वाचा हई, इ नया वाचा के सुरुवात हमर खुन से होवत हई, जेकरा हम तोहिन खातिर बहावल जा हई । 21 बाकि सुना, ‘जे हमरा पकड़वउतई, उ हमिन के संगे खाय बइठल हई ।’ 22 जइसन परमेस्वर फइसला करले हथीन, ओइसही हम 'आदमीन के बेटा' जरुर मू जबई, बाकि बड़ी दुख ओकरा पर हई जेकर चलते हम पकड़वावल जात हियऊ ।” 23 तखनी चेलवन अपननही में पूछे लगलथीन कि हमिन में उ कवन हई जे अइसन करतई ।
बड़ा कवन हई
24 ओकिन के बीच में इ बकझक भी होवे लगलई, “हमीन में से सब से बड़का चेला कवन हई ?” 25 यीसु ओकिन से कहलथीन, गेइर-यहूदियन के राजवन अपन अदमिनियन परे राज करा हथीन, आऊ हुकुम चलावा हथीन, तबो में रजवन इ लोगन के भलाई करेवोला कहावा हथीन । 26 बाकि तोहिन अइसन कहियो नई करिहां, बाकि तोहिन में जे सब से बड़हन हई, ओकरा सब से छोटहन तरी बनेला चाही आऊ जे अगुवा हई, ओकरा नउकर तरी बनेला चाही । 27 आखिरी में बड़का कवन हई, का उ जे खाएला बइठल हई, कि उ जे परोसत हई ? हां, सचो में उ जे खायला बइठल हई । बाकि हम तोहिन के बीच में परोसेवोला जइसन हियऊ ।
28 हमर जिन्गी में परेसानी आवे घरी तोहिने हमर संगे रहा । 29 आऊ जइसन हमर पिता हमर खातिर एगो राज देले हथीन, ओइसही हम तोहिन के राज देवत हियऊ । 30 ताकि तोहिन हमर राज में हमरा संगे खइबा आऊ पीबा, आऊ राजगदी में बइठ के इसराएल देस के बारहो गोतिवन के नयाय करबा ।
पतरस के यीसु के इनकार करे के अगमबानी
(मत्ती 26:31-35; मरकुस 14:27-31; यूहन्ना 13:36-38)
31 यीसु कहलथीन, "समोन, हे समोन, सुन, जइसन जिरगत गोहुम के ओसा के भुसवा अलगे करा हई, ओइसही सइतान तोहिन सब के अलगे करेला हमरा से मांग लेले हई । 32 बाकि हम तोहर खातिर पराथना करले हियऊ कि तोहर बिसवास नई हिलतऊ; आऊ जे घरी तू पछता के आपस अइबे त आपन भइवन के बिसवास टिके खातिर मदत करिहें । 33 फिन पतरस यीसु से कहलई, "हे परभु, हम रउवा संगे जेल में जायेला आऊ मूहूंला तइयार हिये ।" 34 यीसु कहलथीन, हे पतरस, हम तोहरा से कहत हियऊ कि आज मुरगा बोले से पहिले तू तीन खंवा हमरा इनकार करबे कि हम रउवा के नइखी जानत ।’
35 फिन यीसु आपन चेलवन से पूछलथीन, हम तोहिन के बिना बगरबटु, आऊ बिन झोला आऊ बिन जुता के भेजले हलियऊ, त का तोहिन के कवनो चीज घटल हलऊ ? ओकिन कहलथीन: नई, कवनो चीज के कमी नई होलई । 36 यीसु ओकिन से कहलथीन, "बाकि जेकर भीर पइसा हई उ ओकरा ले ले, आऊ जेकरा भीर झोला हई ओकरो ले ले आऊ जेकर भीर तलवार नखई, उ आपन कपड़ा के बेच के खरीद ले । 37 काहेकि हम तोहिन से एकदम कहत हियऊ, जइसन हमर बारे में पबितर किताब में लिखल हई : 'उ अपरधियन संगे गिनल गलई, इ बात के हमरा ऊपरे पूरा होवेला हई, काहेकि जे बात हमर बारे में लिखल गइल हई, उ सब पूरा होवत हई । 38 तखनी चेलवन कहलथीन, “हे परभु, देखूं, इहां दूगो तलवार हई, "त यीसु ओकिन से कहलथीन; बस ! बस !
जइतून पहाड़ में यीसु के पराथना
39 यीसु बहरी निकल के हरमेसा जइसन जइतून के पहाड़ पर गलथीन, आऊ यीसु के चेलवन उनकर पीछे-पीछे गलथीन । 40 उहां पहूंच के यीसु चेलवन से कहलथीन, "पराथना करा कि तोहिन परीक्छा में नई गिर जइबा । 41 फिन यीसु थोड़हे दूर जाके ठेहुना पर होके पराथना करे लगलथीन । 42 "हे पिता, अगर राउर मरजी हई, त इ बड़हन दुखa के कटोरा के हमरा भीर से हटा दिहूं, तबो में हमर नई, राउरे मरजी पूरा होखे । 43 तखनी एगो सरगदूत उहां देखाई देलई, जे यिसु के सामरथ देवत हलई । 44 आऊ यीसु ढेरे दुख में बेयाकुल होके मन लगा के पराथना करे लगलथीन, उनकर पसेना, खून के बड़े बड़े बूंद के जइसन धरतीया परे गिरत हलई । 45 जखनी यीसु पराथना से उठलथीन, आऊ चेलवन भीर गलथीन त ओकिन के दुख में पड़ल सुतल आऊ थकल पउलथीन । 46 यीसु ओकिन से कहलथीन, तोहिन काहे सुतत हां ? उठा आऊ पराथना करा कि तोहिन परीछा में नई परा ।
यीसु के धोखा देके पकड़लथीन
47 जवन घरी यीसु बात करत हलथीन, देखा, तबे लोगन के एगो बड़का भीड़ आ गलई, आऊ ओकिन बारहो खास चेलवन में से एगो जेकर नाम यहूदा हलई । उ ओकिन के अगाड़ी-अगाड़ी आवत हलई, यहूदा यीसु के चुमेला उनकर भीर अलई । 48 बाकि यीसु ओकरा से कहलथीन, "हे यहूदा, का तू चुमा लेके 'आदमीन के बेटा' के पकड़वावत हहीं । 49 यीसु के चेलवन जखनी देखलथीन कि अभी का होतई, त ओकिन कहलथीन, 'हे परभु, का हम तलवार चलइयई ?' 50 आऊ चेलवन में से एगो महा याजक के नउकर के दहिना कान के तलवार से काट देलई । 51 तखनी यीसु कहलथीन, 'रूक, बस कर' । आऊ यीसु ओकर कान के छुलथीन आऊ ओकरा ठीक कर देलथीन । 52 तखनी यीसु मुख्य पुजेरियन, मंदिर के रखवरवन के मुखिवन आऊ यहूदी धरम के नेतवन से कहलथीन “का हम डाकु हिये कि तोहिन हमरा भीर तलवार आऊ लाठी लेके आइल हां ।” 53 हम रोज दिन परमेस्वर के मंदिर में तोहिन के साथे हलियऊ, आऊ तोहिन हमरा नई पकड़ला, बाकि अभी तोहिन के घरी हऊ, आऊ अन्हार के सक्ति के राज करे के घरी हई ।
पतरस के इनकार
54 तखनी ओकिन यीसु के पकड़लथीन, आऊ यीसु के महा याजक के घरे ले गलथीन आऊ पतरस दूरही होके ओकिन के पीछे-पीछे जात हलई । 55 जवन घरी ओकिन अगना के बीच में रसम जोर के एके साथे बइठ गलथीन, त पतरस भी ओकिन के बीच में जाके बइठ गलई । 56 एगो दासी पतरस के रसम के इंजोत में बइठल देखलई, आऊ ओकरा धेयान से देख के कहलई, इ आदमीन त यीसु के साथे हलई । 57 बाकि पतरस इनकार कह के कहलई, “हे बहिन, हम ओकरा नखियई जानत ।” 58 कुछ देरी के बाद एगो दूसर आदमीन पतरस के देख के कहलई, तुहूं त ओकिने में से एगो हें, बाकि पतरस कहलई, अरे भाई, हम उ आदमीन के संगे नइखी । 59 लगभग एक घंटा के बाद एगो आदमीन जोर देके कहलई, सच में इ आदमीन भी ओकर साथे हलई, काहेकि इहो त गलीला इलाका के रहेवोला हई । 60 बाकि पतरस कहलई, 'अरे भाई, हम नइखियऊ जानत कि तू का कहत हें ।' जवन घरी पतरस अइसे कहते हलई, तुरतीये मुरगा बोल देलई । 61 आऊ परभु पिछाड़ी घुर के सोझे पतरस के देखलथीन, तखनी पतरस के परभु के कहल बात इयाद अलई कि आझ मुरगा बोले से पहिले तू तीन खंवा हमरा इनकार करबे । 62 तखनी पतरस अगना से बहरी गलई आऊ कलहप-कलहप के रोवे लगलई ।
यीसु के बिरोध करा हथीन
63 जे अदमिनियन यीसु के पकड़ले हलथीन, ओकिन यीसु के मजाक उड़ा के मारे-पीटे लगलथीन । 64 ओकिन यीसु के अखियां के कपड़ा से बान्ह के उनकरा से बार बार पूछलथीन, अगमबानी कर के बताव कि तोहरा कवन मरलई । 65 आऊ ओकिन ढेर सिकायत के बात उनकर बिरोध में करलथीन ।
यीसु दरबार के समने
66 जखनी दिन होलई त मुख्य याजकवन आऊ नियम के गुरुयन जे लोगन के नेतवन हलथीन, ओकिन के एगो बड़का झूंड़ जामा होलई, आऊ यीसु के ओकिन समने लान के पूछे लगलथीन । 67 हमिन के बताव, ‘का तू मसीह हहीं ?’ यीसु ओकिन से कहलथीन, अगर हम तोहिन से कहबऊ तबो में तोहिन हमरा परे बिसवास नई करबे । 68 अगर हम पूछबऊ, त तोहिन जबाब नई देवे परबे । 69 बाकि अब से 'आदमीन के बेटा' सरवसक्तिमान परमेस्वर के दहिना करे बइठबई । 70 तखनी सब अदमीनियन पूछलथीन, “का तू परमेसवर के बेटा हहीं ?” यीसु ओकिन से कहलथीन, ‘हां, तोहिन ठीक कहत हें ! काहेकि हम हियई ।’ 71 तखनी ओकिन कहलथीन, अब हमिन के कोनो आऊ सबुत के जरुरी नखई, काहेकि हमिन खुद एकर मूंह से सुन लेलियई कि इ ‘का कहलई ।’