Teŋ la pʋdigir yɛla
45
1 “Ya ya'a ti pʋdig teŋ la ka li an faar, asɛɛ ka ya bɛŋ paalʋ la zin'ig yinne tis Zugsɔb la, ka li aan o din, paalʋ la wa'alim na an nɔba makir tusa pistan' nɛ ayɔpɔi nɛ kɔbisnu (37,500) ka li yalʋŋ la an nɔba makir tusa pistan' (30,000), paalʋ kan la wʋsa na anɛ kasi. 2 Zin'ikaŋa nwa ni, ka ba na bɛŋ paalʋ ka li an bʋmmauk, nɔba makir kɔbisyɔpɔi nɛ pisnunu, ka li an Pʋ'ʋsim Yir la din, ka mak nɔba makir pisyɔpɔi nɛ anu (75) giligi li ka lin an paalʋ digi. 3 Zin'ikanɛ an Kasi la ni, makim paalʋ la ka li wa'alim na an nɔba makir tusa pistan' nɛ ayɔpɔi nɛ kɔbisnu (37,500) ka li yalʋŋ an nɔba makir tusa pii nɛ anu (15,000). Ani ka Pʋ'ʋsim Yir la na bɛ, zin'ikanɛ an Kasi Wʋsa Kasi la. 4 Li na anɛ zin'ikanɛ an Kasi ka maanmaannib la na bɛɛ ani, li na anɛ maanmaannib banɛ tʋm Pʋ'ʋsim Yin la nɛ banɛ li'en Zugsɔb la tuonnɛ tʋm la. Li na anɛ ba mɛŋ ya' nɛ Pʋ'ʋsim Yir la zin'ikanɛ an kasi la. 5 Paalʋ kanɛ ka li wa'alim an nɔba makir tusa pistan' nɛ ayɔpɔi nɛ kɔbisnu (37,500) ka li yalʋŋ an nɔba makir tusa pii nɛ anu (15,000) la na anɛ maanmaannib banɛ tʋm Pʋ'ʋsim Yin la din, ka li na an tempʋʋs linɛ aan ba faar, ka ba na bɛɛ ani. Ba na di'e li ka li aan ba din.6 “Ya na bɛŋ paalʋ ka li yalʋŋ an nɔba makir tusa ayɔpɔi nɛ kɔbisnu (7,500) ka li wa'alim an nɔba makir tusa pistan' nɛ ayɔpɔi nɛ kɔbisnu (37,500) ka li an tempʋʋg la din, ka li kpi'e nɛ zin'ikanɛ an kasi la, lin la na bɛ nɛ li kɔn' ka onɛ an Israel nid wʋsa na tun'e zin'inɛ ani.
7 “Paalʋ kanɛ bɛ teŋsʋk la na anɛ Na'ab la din. Li na tɔnd nɛ zin'ikanɛ an kasi la, ka mɛ tɔnd nɛ tempʋʋg la paalʋ la. Li na mɔri ala keŋ ya-tuona baba nɛ ya-nya'aŋ keŋ tʋn titɔndig linɛ bɛ ya-nya'aŋ la keŋ tʋn nɛ paalʋ banɛ ka ba pʋdigi tis Israel dɔɔd kɔn'ɔkɔn' la yinne. 8 Paalʋ kaŋa na aan o din Israel teŋin. Ka Na'ab la kʋ lɛm mugusi m nidib laa, amaa o na kɛ ka Israel dim sʋ'oe ba paalʋ wʋʋ ban pʋdig si'em tis dɔɔg wʋsa la.”
Israel na'anam yɛla
9 Zugsɔb onɛ an Paŋtita'ar Sɔb la yɛl ye, “Israel Na'anama, ya tʋm tʋʋmbɛ'ɛd ka li yuugi galis! Basimi zaba nɛ nidib mugusʋg ka tʋm linɛ dɔl suor. Basimi yanamɛ faandi m nidib si'em la.” Zugsɔb onɛ an Paŋtita'ar Sɔb la pian'ʋkʋ la.
10 “Asɛɛ ka ya mɔr makir linɛ zemis nɛ tɛbisim linɛ zemis la makid.
11 “Li sʋm ye yanamɛ mɔr kuriba si'a makid bʋnkpi'emis la zem nɛ linɛ ka ya mɔri makid bʋn linɛ an ku'om la. Kuriba piiga an taslaa. Li sʋm ye sɔ' mɛkama mɔr taslaa makid si'elnam wʋsa.
12 “Banɛ ka ya mɔri makid tɛbisim la sʋm ye ba aan anwa: Gera pisi an sekel yinne, ka sekel pisyuobʋ an mina yinne.
Malima nɛ vʋ'ʋsʋm dabisa
13 “Nɛ' anɛ piinkanɛ bɛɛ li kɔn' ka ya na tis: yanamɛ bʋn si'el wʋsa, ya na kaal zin'is pisyuobʋ yis yinne mɔri kena tis ka li an piini. 14 Yanamɛ na makid kpaam si'em nwa tisid piini: ya na yis kpalaa yinne kpalaas piiga pʋʋgin tis. 15 Linɛ lɛm paas la, ya na yis pɛ'ɛsʋŋ yinne pɛ'ɛs kɔbisyi' wʋsa pʋʋgin, Israel teŋin zin'ima'asa la ni. Ba na nɔk nɛ'ɛŋa ka li na an malima banɛ an zʋʋd maan, nyu'or maan nɛ taaba maana, sɔs suguru tis nidib la tʋʋmbɛ'ɛd yɛla.” Zugsɔb onɛ an Paŋtita'ar Sɔb la pian'ʋkʋ la. 16 “Nidib banɛ bɛ teŋin la wʋsa na la'as piinkaŋa mɔri keŋ Israel Na'ab la san'an.
17 “Li na anɛ Na'ab la tʋʋm ye o tis la'ad linɛ na maal nyu'or maan, nɛ zʋʋd maan, nɛ bʋnnuuda maan nɛ la'asʋg malʋŋ tiɛnr saŋa wʋsa, nwadpaalig maan nɛ Vʋ'ʋsʋm Daar maan, Israel dim la nar ye ba maal maana saŋa si'a wʋsa. O na tis linɛ ka ba na mɔri keŋ maal tʋʋmbɛ'ɛd maan, nɛ zʋʋd maan nɛ nyu'or maan nɛ taaba la'asʋg maan, ka li an suguru sɔsʋg maan, Israel dim tʋʋmbɛ'ɛd yɛla.”
Maana
18 Zugsɔb onɛ an Paŋtita'ar Sɔb la yɛl si'eli nwa ye, “Nwadig la pin'ilʋg linɛ an dabisir yinne daar la, ya na nɔk na'arapɔl onɛ pʋ mɔr dɛŋi maal maan Pʋ'ʋsim Yin la, ka li kɛ ka li an kasi. 19 Maan kanɛ ka ba maal ka li an tʋʋmbɛ'ɛd maan la, maanmaan la na nɔki li ziim la niŋ Pʋ'ʋsim Dɔɔg la za'anɔya ni, ka niŋ maan daka la lɔdis anaasi la zugin ka mɛ niŋ za'anɔɔr kanɛ kpɛn'ɛd pʋʋgin zakin la. 20 Nwadig la daba ayɔpɔi daar asɛɛ ya niŋ ala tis onɛ wʋsa tʋm tʋʋmbɛ'ɛd ka pʋ tʋmi li pɔn'ɔsim, ala ka ya na maali sɔs suguru tis Pʋ'ʋsim Yir la ka li an kasi.
21 “Nwadig kanɛ an yiiga la dabpiiga nɛ anaasi daar, asɛɛ ya tiɛn Kum Maliak Gaadʋg la yɛla, malʋŋ la na yuugi paae daba ayɔpɔi. Dabisbama ni ya na ɔnbid bodobodo linɛ pʋ gɛndig dabinnɛ. 22 Daakan la, Na'ab la na tis na'araug ka li aan o mɛŋ tʋʋmbɛ'ɛd nɛ nimbanɛ bɛ teŋin la tʋʋmbɛ'ɛd maan. 23 Daba ayɔpɔi kaŋa ni, dabisir wʋsa, asɛɛ ka na'ab la tisid na'araad ayɔpɔi nɛ pɛraad ayɔpɔi banɛ pʋ mɔr dɛŋŋa ka li an nyu'or maannɛ tis Zugsɔb la, ka tis bʋraug ka li an tʋʋmbɛ'ɛd maan. 24 O na tis zʋʋd maan taslaa yinne na'araug wʋsa zugin nɛ pɛraug wʋsa zugin nɛ kpaam kɔliba anu. 25 Malʋŋ tiɛnr linɛ an daba ayɔpɔi la sʋʋgin, lin pin'il nwadis ayɔpɔi la ni li dabpiiga nɛ anu daar la, o na maal ala ya'as ka li an tʋʋmbɛ'ɛd maan, nyu'or maan nɛ zʋʋd maan nɛ li kpaam.”