46
1 Zugsɔb onɛ an Paŋtita'ar Sɔb la yɛl ye, “Za'anɔɔr kanɛ bɛ zak la pʋʋginɛ kpa' ya-nya'aŋ la, ba na yɔɔ li daba ayuobʋ linɛ an tʋʋma dabisa la wʋsa pʋʋgin, amaa Vʋ'ʋsʋm Daar nɛ nwadpaalig daar wʋsa ba na yɔ'ɔgi li. 2 Na'ab la na yi yiŋi dɔl za'anɔɔr la kpɛn' dɔl za'anɔɔr linɛ bɛ za'ambɛŋin la keŋ zi'en za'anɔɔr la baba. Maanmaan la na maal o nyu'or maan nɛ o taaba la'asʋg maan la. Ani ka Na'ab la na zi'en maal za'anɔɔrin la ka yi, amaa ba kʋ yɔ' za'anɔɔr laa, ka li ti paae zaam. 3 Vʋ'ʋsʋm Daar nɛ nwadpaalig malʋŋ saŋa, teŋ la nidib wʋsa na la'asi zun'e Zugsɔb la za'anɔɔr la kpɛn'ɛb zin'igin la. 4 Nyu'or maan linɛ ka Na'ab la na mɔri kena la na anɛ pɛribis ayuobʋ nɛ pɛraug banɛ wʋsa pʋ mɔr dɛŋŋa. 5 Zʋʋd maan linɛ ka ba na tisi paas pɛraug la zug la na anɛ taslaa, zʋʋd maan la nɛ pɛribis la o na mɔri li nɛ o ya'am gban'e si'em, ka la'am mɔr kpaam kɔliba anu paas zʋʋd taslaa wʋsa zug. 6 Nwadpaalig la daar o na tis na'arapɔl, nɛ pɛbibis ayuobʋ nɛ pɛraug, ka ba wʋsa da mɔr dɛŋŋa. 7 O na tis zʋʋd maan la taslaa yinne paas na'araug la zug, nɛ taslaa yinne paas pɛraug la zug, nɛ pɛbibis la zug wʋʋ o ya'am gban'e si'em bɛn, ka la'am mak kpaam galam anu paas taslaa wʋsa zugin. 8 Na'ab la ya'a kpɛn', asɛɛ ka o dɔl za'ambɛŋin za'anɔɔr la kpɛn', ka na lɛn dɔl zin'ikan la yi.9 “Teŋ la nidib ya'a ti kɛn Zugsɔb la san'an na, malima banɛ ka ba zi'el la saŋa, onɛ wʋsa na dɔl za'anɔɔr kanɛ bɛ ya-datiuŋ la kpɛn', na dɔlnɛ za'anɔɔr kanɛ bɛ ya-dagɔbʋg la yi. Sɔ' da dɔl on dɔl za'anɔsi'a kpɛn' la yii, amaa sɔ' wʋsa na dɔl za'anɔkanɛ kpa' o la yi. 10 Na'ab la na bɛɛ ba sʋʋgin, ba ya'a kpɛn'ɛd on dɔlli kpɛn', ba ya'a yit on dɔlli yi.
11 “Malʋŋ tiɛnr saŋa nɛ malima banɛ ka ba zi'el la saŋa, zʋʋd piini la na anɛ taslaa paas na'araug zug, nɛ zʋʋd taslaa paas pɛraug zug, nɛ pɛbibis zug wʋsa wʋʋ na'ab la paŋi na tun'e si'em, ka ba na mak kpaam galam anu paas taslaa wʋsa zugin. 12 Na'ab la ya'a tis Zugsɔb la ya'amlɛog piini, li ya'a na an nyu'or maan bɛɛ taaba la'asʋg maan, ba na yɔ'ɔg za'anɔɔr kanɛ kpa' ya-nya'aŋ la tis o. O na maal nyu'or maan bɛɛ taaba la'asʋg maan wʋʋ on maan Vʋ'ʋsʋm Daar si'em la. O ya'a maali naae ka yi, ba na yɔ' za'anɔɔr la.
13 “Daar wʋsa ya na tis pɛ'og kanɛ an yʋʋm yinne ka pʋ mɔr dɛŋŋa maal nyu'or maannɛ tis Zugsɔb la; bɛkɛung wʋsa asɛɛ ka ya maali li. 14 Bɛkɛung wʋsa asɛɛ ya tis zʋʋd maan kuriba yinne ka mak kpaam kɔlibir yinne ka ba nɔki lii gɛndig zɔm la. Malʋŋ kaŋa na bɛ ala saŋa wʋsa. 15 Ala ka ba na tis pɛbil la nɛ zʋʋd maan la nɛ kpaam la bɛkɛung wʋsa ka ba maan nyu'or maan saŋa wʋsa.”
16 Zugsɔb onɛ an Paŋtita'ar Sɔb la yɛl si'eli nwa ye, “Na'ab la ya'a zaŋ paalʋ kanɛ an o mɛŋ dinnɛ tis o biig yinne, li na anɛ on nɛ o yaas din, li na anɛ ba faar. 17 O ya'a lɛn zaŋi lii tis o yammis la yinne, yammʋg la na sʋ'oe li ti paae vʋ'ʋsʋm yʋʋm kanɛ ka ba na tisi ba yɔlisim, saŋkan ka o na lɛbisi tis na'ab la. O faar la anɛ na'abiis la din, ban ma'aa sʋ'oe li. 18 Li pʋ sʋm ye na'ab la faaɛn paalʋ linɛ an nidib la din ka kadi baa yis linɛ aan ba faari nɛ. O mɛŋ faar ma'aa ka o na tis o biis. Ala ka ba kʋ faanm nidib la faar ka kadi ba basɛ.”
19 Ani ka dau la mɔrimi kpɛn' za'anɔɔr kanɛ bɛ lʋgirin la kpɛn' dɔbanɛ an kasi kpa' ya-datiuŋ, linɛ an maanmaannib dɔɔd la. Ani ka o pa'alim paalʋ linɛ bɛ ya-tuona la. 20 O yɛlim ye, “Zin'ikaŋa ka maanmaannib la na dʋg ni'im linɛ an taal maan nɛ tʋʋmbɛ'ɛd maan la, ka sɛn' zʋʋd maan la, ka li da yi zakin la ka nidib la si'isi li ka paam san'auŋɔ, lin an kasi la zug.”
21 Ani ka o dɔllimi yi zak kanɛ bɛ yiŋ la na dɔllimi giligi li lɔdis anaasi la, ka m nyɛ ka lɔdig wʋsa mɔr zak ya'as. 22 Lɔdis anaasi banɛ bɛ zak kanɛ bɛ yiŋ la ni, ka m nyɛ za'abibis ka ba wa'alim an nɔba makir pisyuobʋ (60) ka ba yalʋŋ an makir pisnaasi nɛ anu (45), ka za'abibis la wʋsa wa'alim nɛ ba yalʋŋ zem taaba. 23 Ka ba nɔk kuga mɛɛ gilig za'as anaasi la ka dan'amis bɛɛ li pʋʋgin la kpi'e nɛ zaŋguom la. 24 Ka o yɛlim ye, “Za'abibis bama ni ka Pʋ'ʋsim Yir la tʋmtʋmnib na dʋgid maana banɛ ka nidib kena maal la.”