Kɔldaug kanɛ yi Pʋ'ʋsim Yin la na
47
1 Ka dau la mɔrimi lɛb Pʋ'ʋsim Yin la yaŋirin, ka m nyɛ ku'om yit Pʋ'ʋsim Yin la zanɔɔr lɛuŋʋn na pʋbidi lɛbid ya-nya'aŋ (Pʋ'ʋsim Yin la da kpa'anɛ ya-nya'aŋ). Ku'om la da yitnɛ Pʋ'ʋsim Yin la teŋir ya-dagɔbʋg baba na, bimbim la dagɔbʋg baba. 2 Ka o lɛm mɔrimi dɔl za'anɔɔr kanɛ bɛ ya-datiuŋ la yi yiŋ la na ka dɔlli mɛ giligi paae za'anɔɔr kanɛ bɛ yiŋi kpa' ya-nya'aŋ la, ka ku'om la pʋbidi dɔlli li dagɔbʋg baba.3 Dau la da lɛb ya-nya'aŋ baba la, ka mɔr nwiig kanɛ makid o nu'ugin. Ka o mak nɔba tusir nɛ kɔbisnu (1,500), ka zaŋimi sig ku'omin la, ka ku'om la zulʋŋ an nɔbkpansinkpanda bɛn. 4 Ka o lɛm mak nɔba tusir nɛ kɔbisnu (1,500) ka lɛm mɔrimi sig ku'omin la ka li zulʋŋ an duma bɛn. Ka o lɛm mak nɔba makir tusir nɛ kɔbisnu (1,500) ya'as ka lɛm mɔrimi sig ku'omin la ka li paae siaa bɛn. 5 O lɛm mak tusir nɛ kɔbisnu (1,500) ya'as, amaa li da anɛ kɔldaug ka m kʋ nyaŋi lɔ'ɔŋɛ, bɔzugɔ ku'om la da zu'onɛ ka zulim ka li ya'a ka' lugibɔ, sɔ' kʋ nyaŋi lɔ'ɔŋɛ. 6 O da yɛlim ye, “Ninsaal biiga, fʋ nyɛ nɛ'?”
Ka mɔrimi keŋ kɔldaug la nɔɔrin. 7 Man paae ani la, m nyɛ tiis bɛdegʋ ka ba bɛ kɔldaug la nɔɔrin zin'is ayi' la wʋsa. 8 Ka o yɛlim ye, “Ku'okaŋa pʋbidnɛ lɛbid ya-nya'aŋi sigid Joodan bɔn'ɔgin la ken atɛukʋn, tiakidi atɛuk ku'om linɛ an yaarim la ka li lieb ku'osʋŋ. 9 Kɔldaug la ku'om pʋbigi keŋ zin'isi'a wʋsa, bʋnvʋya nɛ li buudi na bɛɛ ani bɛdegʋ. Zimi na bɛɛ ani bɛdegʋ, bɔzugɔ ku'om la pʋbidi ken zin'isi'a la na kɛ ka ku'om linɛ an yaarim la tiaki an ku'osʋŋ; alazug ku'om la pʋbigi keŋ zin'isi'a wʋsa si'el wʋsa na vʋe. 10 Ziiŋgban'adib na kena zi'en kɔldaug la nɔɔrin; ba na zi'en En-Gedi teŋin hali ti paae En-Eglam. Zin'ibanɛ ka ba na dɛligid asau na bɛɛ ani. Zimi nɛ li buudi wʋsa na bɛ wʋʋ atɛuk tita'ar la zimi an si'em la. 11 Amaa bɛɛnna nɛ zin'ibanɛ ka ku'om giisi digi dig la kʋ an ku'osʋŋɔ, zin'iban la na kpɛm bɛ ala an yaarim zin'ig. 12 Tiwanna nɛ li buudi na yi kɔlnɔya la ni zin'is ayi' la wʋsa. Ba vaand kʋ sʋʋg bɛɛ ba gʋ'ʋŋ walibɔ. Nwadig wʋsa ba wan wala, bɔzugɔ ku'om linɛ pʋbidi yit Pʋ'ʋsim Yin la na dɔn'ɔsidi ba. Ba wala la na an diib ka ba vaand la na ti'ebid ban'as.”
Teŋ la titɔndis
13 Zugsɔb Paŋtita'ar Sɔb la yɛl si'eli nwa. Teŋ la titɔndisi nwa ka ya na pʋdigi li ka li an faari tis Israel dɔɔd pii nɛ ayi' la, ka Josef na di'e pʋʋr la zin'is ayi'. 14 Fʋ na pʋdigi li azinzema tisi ba. Man da pɔɔ zi'el ye m na tisi ya yaanam la, teŋ nwa na anɛ ya faar.
15 Teŋ la titɔndigi na an si'em nwa:
Ya-datiuŋ baba la na mɔri ala paae Atɛuk Tita'ar la paae Heflon suorin la gaadi paae Lebo-Hamat nɛ Zedad, 16 keŋ Berota nɛ Sibiram, linɛ bɛ Damaskus nɛ Hamat titɔndigin la, mɔri ala paae Hazer-Hatikon linɛ bɛ Hawaran teŋ titɔndigin la. 17 Titɔndig la na dɔlisnɛ titɔndig linɛ bɛ Damaskus teŋ la ya-datiuŋʋ tɔlisi yi atɛukʋn la paae Hazar Enan teŋin, ka Hamat teŋ titɔndig la kpɛlimi li ya-datiuŋ. Nɛ'ɛŋa na an titɔndig linɛ bɛ ya-datiuŋ la bɛn.
18 Ya-nya'aŋ la baba na dɔlisi paae Hawaran nɛ Damaskus teŋsʋk, ka dɔlisi dɛn'ɛn Joodan kɔldaug la, linɛ bɛ Gilead nɛ Israel teŋsʋk la, keŋ paae atɛuk linɛ bɛ ya-nya'aŋ la paae Tamar. Nɛ'ɛŋa na an ya-nya'aŋ la bɛn.
19 Ya-dagɔbʋg la baba li na mɔri ala yi Tamar n gaadi keŋ Meriba-Kades ku'omin la, dɛn'ɛn Egipt titɔndiginɛ keŋ Atɛuk Tita'arin la. Nɛ'ɛŋa na an ya-dagɔbʋg la bɛn.
20 Ya-tuona baba la, Atɛuk Tita'ar la na aan li titɔndigi keŋ paae zin'ikanɛ kpa' Lebo-Hamat teŋ la. Nɛ'ɛŋa na an ya-tuona la titɔndig.
21 Ya na pʋdig teŋ la tisi ya mɛŋ wʋʋ Israel dɔɔd la an si'em la. 22 Ya na pʋdigi li tisi ya mɛŋ ka li an faari tisi ya nɛ saam banɛ zin' nɛ ya ka mɔr biis la. Ya na niŋi ba wʋʋ Israel dim banɛ an teŋin dim ka ba du'a ba anina la; ban bɛ nɛ ya la, ba na la'am di'e faar la nɛ Israel dim. 23 Saam la ya'a zin'in Israel dɔsi'a wʋsa teŋin, ani ka ya na tisi baa ba faar. Zugsɔb onɛ an Paŋtita'ar Sɔb la pian'ʋkʋ la.