Paalʋ la pʋdigir
48
1 Israel dɔɔd la nwa ka ba kaali ba yʋda:Linɛ bɛ ya-datiuŋ la, Dan dɔɔg la na di'e pʋʋr yinne; li na dɔl Heflon suor la paae Lebo-Hamat; Hazar Enan nɛ titɔndig linɛ bɛ Damaskus datiuŋʋ tʋn Hamat la na bɛ titɔndig linɛ bɛ ya-datiuŋ baba la, lin yi ya-nya'aŋi paae li ya-tuona la.
2 Aser na di'e pʋʋr yinne; li na tɔnd nɛ Dan teŋ la lin yi ya-nya'aŋi paae ya-tuona la.
3 Naftali na di'e pʋʋr yinne; li na tɔnd nɛ Aser teŋ la lin yi ya-nya'aŋi paae ya-tuona la.
4 Manase na di'e pʋʋr yinne; li na tɔnd nɛ Naftali teŋ la lin yi ya-nya'aŋi paae ya-tuona la.
5 Efiram na di'e pʋʋr yinne; li na tɔnd nɛ Manase teŋ la lin yi ya-nya'aŋi paae ya-tuona la.
6 Reuben na di'e pʋʋr yinne; li na tɔnd nɛ Efiram teŋ la lin yi ya-nya'aŋi paae ya-tuona la.
7 Juda na di'e pʋʋr yinne; li na tɔnd nɛ Reuben teŋ la lin yi ya-nya'aŋi paae ya-tuona la.
8 Lin yi Juda titɔndig la ya-nya'aŋi paae ya-tuona la, ya na bɛŋi li ka li bɛɛ li kɔn', li na anɛ nɔba makir tusa pistan' nɛ ayɔpɔi nɛ kɔbisnu (37,500), li yalʋŋ nɛ li wa'alim wʋsa lin yii li ya-nya'aŋi paae li ya-tuona na zem wʋʋ dɔɔg wʋsa pʋʋri zem si'em la. Pʋ'ʋsim Yir la na bɛ nɛ li teŋsʋk.
9 Zin'ikanɛ ka ya bɛŋi li ka li bɛɛ li kɔn' la na an Zugsɔb la din, li wa'alim na anɛ nɔba makir tusa pistan' nɛ ayɔpɔi nɛ kɔbisnu (37,500) ka li yalʋŋ an nɔba makir tusa pii nɛ anu (15,000). Zugsɔb Pʋ'ʋsim Yir la na bɛ nɛ li teŋsʋk. 10 Nɛ'ɛŋa na anɛ zin'ikanɛ an kasi ka an maanmaannib la din. Li ya-datiuŋ la wa'alim na anɛ nɔba makir tusa pistan' nɛ ayɔpɔi nɛ kɔbisnu (37,500), ka li ya-tuona la an nɔba makir tusa pii nɛ anu (15,000), li ya-nya'aŋ la na an nɔba makir tusa pii nɛ anu (15,000), ka li ya-dagɔbʋg la an tusa pistan' nɛ ayɔpɔi nɛ kɔbisnu (37,500). Li teŋsʋk la ka Zugsɔb Pʋ'ʋsim Yir la na bɛ. 11 Zin'ikanɛ an kasi nwa na anɛ maanmaannib la din, banɛ yi Zadok tuŋʋn na, ka tʋmmi tisidim ka pʋ badig wʋʋ Levi dim la sieba da badigi dɔl Israel dim ka ba yirid si'em la. 12 Li na anɛ piinkanɛ ka ba di'e ka li bɛɛ li kɔn' ka an kasi, paalʋ la pʋʋgin. Li anɛ zin'ikanɛ an kasi, ka li titɔndig la tɔnd nɛ Levi dim teŋ la.
13 Linɛ kpi'e maanmaannib teŋ la na anɛ Levi dim la pʋʋr, ka li wa'alim na anɛ nɔba makir tusa pistan' nɛ ayɔpɔi nɛ kɔbisnu (37,500) ka li yalʋŋ an tusa pii nɛ anu (15,000). 14 Li pʋ nar ye ba kuosi li bɛɛ tiaki li zin'isi'a. Li anɛ teŋ la zin'ikaŋa an paalʋ sʋŋ, ka li pʋ sʋm ye ba tɔlisi li tis sɔ', bɔzugɔ li anɛ kasi tis Zugsɔb la. 15 Zin'ikanɛ kpɛlim ka li yalʋŋ an nɔba makir tusa ayɔpɔi nɛ kɔbisnu (7,500) ka li wa'alim an tusa pistan' nɛ ayɔpɔi nɛ kɔbisnu (37,500) la, na anɛ tempʋʋg paalʋ, zin'ikan la ka ba na mɛɛdi ba ya', ka li mɛ na an zin'ikanɛ ka yaama na bɛ ka ba bʋnkɔnbid ɔnbid. Tempʋʋg la na bɛnɛ li teŋsʋk. 16 Li wʋsa makiri an si'em nwa, li ya-datiuŋ baba la na anɛ nɔba makir tusa ayuobʋ nɛ kɔbisyɔpɔi nɛ pisnu (6,750); li ya-dagɔbʋg la na an tusa ayuobʋ nɛ kɔbisyɔpɔi nɛ pisnu (6,750) ka li ya-nya'aŋ la mɛ an makir tusa ayuobʋ nɛ kɔbisyɔpɔi nɛ pisnu (6,750); li ya-tuona la mɛ anɛ tusa ayuobʋ nɛ kɔbisyɔpɔi nɛ pisnu (6,750). 17 Paalʋ kanɛ an yaama zin'igi kpɛlim an tempʋʋg la din la, li ya-datiuŋ la na anɛ nɔba makir kɔbistan' nɛ pisyɔpɔi nɛ anu (375), ka li ya-dagɔbʋg la an kɔbistan' nɛ pisyɔpɔi nɛ anu (375), li ya-nya'aŋ makir kɔbistan' nɛ pisyɔpɔi nɛ anu (375), ka li ya-tuona mɛ an kɔbistan' nɛ pisyɔpɔi nɛ anu (375). 18 Linɛ kpɛlim ka li titɔndig tɔnd nɛ zin'ikanɛ an kasi la, dɔlisi keŋi li ya-nya'aŋ la wa'alim na anɛ nɔba makir tusa pii nɛ anu (15,000), li ya-tuona tusa pii nɛ anu (15,000), zin'ikan la zʋʋd na diisid tempʋʋg la tʋmtʋmnib la. 19 Tʋmtʋmnib banɛ bɛ tempʋʋgin la ka na tʋm pɔɔgin la na yinɛ Israel dɔɔd pii nɛ ayi' la wʋsa ni na. 20 Paalʋ la na anɛ mauk, li nɔya la zin'ig wʋsa na anɛ nɔba makir tusa pistan' nɛ ayɔpɔi nɛ kɔbisnu-nu (37,500). Lin an piini la, ya na kɛ ka zin'ikan la bɛɛ li kɔn', la'am nɛ lin an teŋ la mɛŋ din la.
21 Linɛ kpɛlimi li lʋga ayi' la tɔ'ɔŋ zin'ikanɛ an kasi la nɛ teŋ la bʋn la na anɛ Na'ab la bʋn. Lin yi ya-nya'aŋ la nɔba makir tusa pistan' nɛ ayɔpɔi nɛ kɔbisnu (37,500) keŋ tʋn linɛ an kasi la paae ya-nya'aŋ titɔndig la bɛn, nɛ li ya-tuona la makir tusa pistan' nɛ ayɔpɔi nɛ kɔbisnu (37,500) keŋ tʋn titɔndig linɛ bɛ ya-tuona la. Zin'is ayi' nwa linɛ titɔndigi dɔlis Israel dɔɔd la pʋdig si'el la wa'alim la anɛ Na'ab la bʋn, ka zin'ikanɛ an kasi nɛ Pʋ'ʋsim Yir la na bɛɛ ba teŋsʋk. 22 Alazugɔ, linɛ an Levi dim la din, nɛ tempʋʋgʋ sʋ'oe si'el la na bɛ nɛ Na'ab la sʋ'oe si'el la teŋsʋk. Na'abi sʋ'oe si'el la na bɛ nɛ Juda nɛ Benjamin n sʋ'oe si'el la teŋsʋk.
23 Ya'a anɛ dɔbanɛ kpɛlim la:
Benjamin na di'e pʋʋr yinne; ka li na tiɛn yi ya-nya'aŋi paae ya-tuona.
24 Simeon na di'e pʋʋr yinne; ka li na tɔnd nɛ Benjamin teŋ la lin yi ya-nya'aŋi paae ya-tuona la.
25 Isaka na di'e pʋʋr yinne; li na tɔnd nɛ Simeon teŋ la lin yi ya-nya'aŋi paae ya-tuona la.
26 Zebulun na di'e pʋʋr yinne; li na tɔnd nɛ Isaka teŋ la lin yi ya-nya'aŋi paae ya-tuona la.
27 Gad na di'e pʋʋr yinne; li na tɔnd nɛ Zebulun teŋ la lin yi ya-nya'aŋi paae ya-tuona la.
28 Gad titɔndig linɛ bɛ ya-dagɔbʋg la na yi Tamar linɛ bɛ ya-nya'aŋ la paae Meriba-Kades ku'om la, dɔlisi ala keŋ paae Egipt titɔndig linɛ an kɔldaug la paae Atɛuk Tita'ar la.
29 Paalʋ kanɛ ka ya na pʋdigi tis Israel dim dɔɔd la ka li an ba faar la nwa: nɛ'ɛŋa na aan ba pʋʋr. Zugsɔb onɛ an Paŋtita'ar Sɔb la pian'ʋkʋ la.
Tempʋʋg la za'anɔya
30 Zin'ibama na an tempʋʋg la za'anɔya:
Li na pin'il ya-datiuŋ baba, linɛ an nɔba makir tusa ayuobʋ nɛ kɔbisyɔpɔi nɛ pisnu (6,750) la, 31 Israel dɔɔd la yʋda ka ba na nɔki pʋd za'anɔya la. Za'anɔya atan' banɛ bɛ ya-datiuŋ la, Reuben yʋ'ʋr ka ba na nɔki pʋd, nɛ Juda yʋ'ʋr, nɛ Levi yʋ'ʋr.
32 Ya-nya'aŋ linɛ an nɔba makir tusa ayuobʋ nɛ kɔbisyɔpɔi nɛ pisnu (6,750) la na mɔr za'anɔya atan', li na anɛ Josef za'anɔɔr, nɛ Benjamin za'anɔɔr, nɛ Dan za'anɔɔr.
33 Ya-dagɔbʋg baba la linɛ an nɔba makir tusa ayuobʋ nɛ kɔbisyɔpɔi nɛ pisnu (6,750) la na mɔr za'anɔya atan', li na anɛ Simeon za'anɔɔr, Isaka za'anɔɔr, nɛ Zebulun za'anɔɔr.
34 Ya-tuona baba linɛ an nɔba makir tusa ayuobʋ nɛ kɔbisyɔpɔi nɛ pisnu (6,750) la na mɔr za'anɔya atan', li na anɛ Gad za'anɔɔr nɛ Aser za'anɔɔr nɛ Naftali za'anɔɔr.
35 Lin dɔlisi kaae gilig teŋ la wʋsa la, anɛ nɔba makir tusa pisi nɛ ayɔpɔi (27,000).
Ka lin yi saŋkanɛ mɔri ken la tempʋʋg la yʋ'ʋr na buon ye,
“ZUGSƆB LA BƐƐ ANI.”