Na'ab nɛ Levi dim nɛ maanmaannib la
44
1 Dau la da lɛn mɔrimi lɛb za'anɔɔr kanɛ bɛ Pʋ'ʋsim Yir yiŋ la ni na la, ka za'anɔɔr kanɛ kpa' ya-nya'aŋ la yɔ'. 2 Ka Zugsɔb la yɛlim ye, “Za'anɔkaŋa na kpɛn yɔnɛ ala zi'e. Sɔ' kʋ yɔ'ɔgi lii; sɔ' da dɔl ani kpɛn'ɛɛ. Li na kpɛn anɛ ala bɔzugɔ Zugsɔb onɛ an Israel Wina'am la dɔl ani kpɛn'. 3 Na'ab la mɛŋ ma'aa na zin'ini li pʋʋgin zin'ikanɛ an za'anɔɔrin la di diib Zugsɔb la tuon. O na dɔlli za'ambɛŋ la ni kpɛn' ka lɛn dɔlli ani yi.”4 Dau la da mɔrimi lɛbɛ dɔl za'anɔɔr kanɛ bɛ ya-datiuŋ la kpɛn' zi'en Pʋ'ʋsim Dɔɔg la tuon. Ka m gɔsi nyɛ Zugsɔb na'am pipilim ka li pɛ'ɛl Zugsɔb Pʋ'ʋsim Dɔɔg la, ka sʋ'ʋnnɛ m nindaa teŋin.
5 Ka Zugsɔb la yɛlim ye, Ninsaal biiga, gɔsim ka kɛlis sʋ'ʋŋa, ka tɛn'ɛs sʋ'ʋŋa nɛ linɛ wʋsa ka m yɛti fʋ zaŋi ken zi'ela banɛ bɛ Zugsɔb Pʋ'ʋsim Yir la yɛla la. Kɛl ka ya pʋtɛn'ɛr bɛ Pʋ'ʋsim Yir la za'anɔɔr yɛla ni, nɛ li yiib zin'is la. 6 Yɛlim Israel dim banɛ zan'asidi m nɔɔr la ye, Zugsɔb Onɛ an Paŋtita'ar Sɔb la yɛl si'eli nwa: “Israel dima, yɛlkisa banɛ ka ya tʋm la sia'al ala! 7 La'am nɛ tʋʋmkisa banɛ ka ya tʋm la wʋsa, ya lɛm mɔr saam banɛ pʋ kpɛn' baŋʋ nɛ banɛ pʋ siakidi m nɔɔr la kpɛn' m Pʋ'ʋsim Yin la na, san'amidi m yʋ'ʋr, saŋkanɛ ka ya maan maana linɛ an kpaam nɛ ziim tisidim la, ala ka ya san'ami m nɔnaar la. 8 Ya pʋ tʋmmi m tʋʋma la nɛ la'abanɛ an kasi la ya mɛŋa, ya lɛɛ nɔknɛ ninsieba ye ba sʋ'oe m Pʋ'ʋsim Yin la tʋʋma.” 9 Zugsɔb Onɛ an Paŋtita'ar Sɔb la yɛl si'eli nwa ye, Saan kanɛ pʋ kpɛn' baŋʋ nɛ banɛ pʋ siakidi m nɔɔr la kʋ kpɛn' m Pʋ'ʋsim Yin la naa, hali la'am nɛ saam banɛ bɛ nɛ Israel dim la.
10 “Asɛɛ ka Levi dim tʋʋmbɛ'ɛd la taal dɔlli ba, bɔzugɔ ba da basim ka lalig, saŋkanɛ ka Israel dim da basim ka yuki dɔlli ba bada la. 11 Ba na tʋmmi m Pʋ'ʋsim Yin la, ka sʋ'oe Pʋ'ʋsim Yir la za'anɔya la nɛ Yin la tʋʋma; ba da kʋʋd nyu'or malima bʋnkɔnbid la nɛ maana tisid nidib la, ka zi'e ba tuonnɛ tʋmmi tisidi ba. 12 Amaa ban da tʋmmi tisid nidib la ba bada la tuon, ka kɛ ka Israel dim tʋm tʋʋmbɛ'ɛd la zug, m pɔ ya nɛ m mɛŋ paŋ, m na kɛ ka ba taal dɔlli ba, ba tʋʋmbɛ'ɛd la zug.” Zugsɔb onɛ an Paŋtita'ar Sɔb la pian'ʋkʋ la. 13 Ba kʋ li'eli m san'an na tʋm maanmaan tʋʋma, bɛɛ ba li'eli m la'abanɛ an kasi laa, bɛɛ m kasi zin'ig laa; yɛlkisa banɛ ka ba maan la, nyan na dii ba. 14 La'am nɛ wala m na kɛ ka ba sʋ'oe Pʋ'ʋsim Yir la tʋʋma nɛ tʋʋma banɛ wʋsa nar ye li tʋm.
15 “Amaa maanmaannib banɛ an Levi dim ka an Zadok yaas da tʋmmi ba tʋʋma sʋ'ʋŋa m Pʋ'ʋsim Yin la, saŋkanɛ ka Israel dim da fɛndig ka basim la. Dinzug, banɛ na kena tʋm tisim; ba na zi'enɛ m tuonnɛ maal maana linɛ an kpaam nɛ ziim la.” Zugsɔb onɛ an Paŋtita'ar Sɔb la pian'ʋkʋ la. 16 “Ban ma'aa na kpɛn' m Dɔɔgin la; ban ma'aa na li'eli m teebul linɛ bɛɛ m tuon la ka tʋmi m tʋʋma la.
17 “Ba ya'a kpɛn' za'anɔya linɛ bɛ zak kanɛ bɛ pʋʋgin la, asɛɛ ba yɛ maanmaan fuud; ba da yɛ fukanɛ ka ba maal nɛ bʋnkɔnbʋg kɔnbidi bɛ pʋʋgin zak za'anɔya la tʋʋma ni, bɛɛ yɛɛ li kpɛn' Pʋ'ʋsim Dɔɔg la pʋʋginɛ. 18 Ba na nɔk zupibpieligi pid ka sɔn kurigimis ka li wʋsa an gum fuud. Li pʋ sʋm ye ba yɛ fukanɛ na kɛ ka ɔnsir yiti baa. 19 Ba ya'a yi yiŋ zak la paalʋ zin'ikanɛ ka nidib bɛ, asɛɛ ka ba yɛɛg fubanɛ ka ba yɛɛ bɛ pɔɔginɛ tʋm la digil dɔbanɛ an kasi la ni ka tɔɔm fuudi yɛ, ala ka nidib la kʋ si'isi ba fuud la ka li an bɛ'ɛdi tisi ba, lin an kasi la zug.
20 “Ba da pʋni ba zut bɛɛ kɛ ka ba zuobid la nɔbigi wa'ami galisɛ, amaa asɛɛ ba kiesidi ba zuobidi maannɛ li ka li an sʋ'ʋŋa. 21 Maanmaan da nu daam ka kpɛn' zak linɛ bɛ pʋʋgin laa. 22 Li pʋ sʋm ye ba di pʋkɔnya bɛɛ pu'a kanɛ bas o sida; pu'asadir kanɛ an Israel nid ma'aa ka ba na di, bɛɛ maanmaan pʋkɔɔnr. 23 Asɛɛ ba pa'alim nidib la ka ba baŋ linɛ an kasi nɛ linɛ ka' kasi la m bɛ kɔn'ɔkɔn' si'em, ka pa'ali ba linɛ an nyain nɛ linɛ ka' nyainnɛ.
24 “Antu'a bɛɛ yɛlsi'a wʋsa ya'a bɛ, maanmaannib la na an sariakatib ka kad saria la wʋʋ m wada la zi'el si'em la. Asɛɛ ka ba dɔlisi m wada nɛ m zi'ela nɛ malima banɛ ka m zi'el la, ka kɛ ka Vʋ'ʋsʋm Daar la an kasi.
25 “Maanmaan da li'el kum ka lieb dian'ad sɔba, amaa li ya'a nwɛnɛ onɛ kpi la anɛ o ba' bɛɛ o ma, li ya'a anɛ o bipuŋ bɛɛ o biribiŋ bɛɛ li anɛ o bier nɛ o pitʋ, bɛɛ o taʋn kanɛ nam pʋ kul sida, o na nyaŋi si'is. 26 O ya'a ti maali o mɛŋ nyain naae, asɛɛ ka o gu'us daba ayɔpɔi. 27 Daakanɛ ka o ti kpɛn' Pʋ'ʋsim Yir zak kanɛ bɛ pʋʋgin la ye o tʋm la, asɛɛ ka o maal tʋʋmbɛ'ɛd maan o mɛŋ yɛla.” Zugsɔb onɛ an Paŋtita'ar Sɔb la pian'ʋkʋ la.
28 “Man ma'aa na an maanmaannib la faar. Ba kʋ di'e faar Israel sʋ'ʋlim la nii, manɛ na aan ba din. 29 Ba na dit zʋʋd maana la nɛ tʋʋmbɛ'ɛd maana nɛ taal maana la diib, nɛ linɛ wʋsa ka Israel dim mɔri kena tis Zugsɔb la na anɛ ba din. 30 Li kas-kas anɛ zʋʋd linɛ an bʋndɛɛnna nɛ piini banɛ ka ya mɔri kenna; lin anɛ maanmaannib la din. Ya na tisi ba ya zʋʋd linɛ an bʋmpaala ka ya ye ya di la yiiga, ala ka bareka na bɛ yanam nɛ ya yidim wʋsa zugin. 31 Maanmaan la da di si'el linɛ an niiŋ bɛɛ bʋnkɔnbʋg kanɛ kpii digi, bɛɛ bʋnkɔnbsi'a na kʋʋ o tiraana.”