Zugsɔb la girima lɛb o Pʋ'ʋsim Yin la
43
1 Ka dau la mɔrimi lɛb za'anɔɔr kanɛ kpa' ya-nya'aŋ la, 2 ka m nyɛ Israel Wina'am la na'am pipilim ka li yi ya-nya'aŋi kenna. Ka o kʋkɔr vuudi nwɛnɛ ku'om linɛ bɛ susuudin nɛ, ka teŋ la nie nɛ o pipilim. 3 Linɛ nie ka m nyɛ la nwɛnɛ nier kanɛ ka m da nyɛ on da kena ye o san'am tempʋʋg la, ka lɛn nwɛnɛ nier kanɛ ka m da nyɛ Keba kɔldaug baba la. Ka m sʋ'ʋnnɛ m zugʋ kpa' teŋin. 4 Ka Zugsɔb na'am pipilim la dɔl za'anɔɔr kanɛ kpa' ya-nya'aŋ la kpɛn' Pʋ'ʋsim Yin la. 5 Ani ka Siig la ʋkim agɔla mɔrimi kpɛn' pʋʋgin zakin la, ka Zugsɔb na'am pipilim pɛ'ɛl Pʋ'ʋsim Yir la. 6 Dau la nan zi'e kpi'e nɛ m la, ka m wʋm ka sɔ' bɛ Pʋ'ʋsim Yir la pʋʋginɛ pian'adi tisidim. 7 O da yɛlim ye, “Ninsaal biiga, m na'am gbauŋ la nɛ m nɔba zi'eg zin'igi nwa. Zin'ikaŋa ka m na bɛ saŋa wʋsa nɛ Israel dim la. Israel dim la bɛɛ ba na'anam la kʋ lɛn san'ami m yʋ'ʋrɛ. Ba kʋ lɛn dɔl ba'akpiilima bɛɛ sɛɛd si'elnamɛ ba na'anam yaadinɛ. 8 Ban da mɛɛ ba mɛŋ yaa kpi'el nɛ man Yir, bɛɛ ba za'anɔɔr kpi'e nɛ m za'anɔɔr, ka zaŋguom ma'aa bɛŋ man nɛ ban sʋʋgin la, ba da san'amidi m yʋ'ʋr nɛ ba tʋʋmkisa la. M sʋnf da ɛɛnti pɛlig ka m san'ami ba. 9 Nannanna kɛl ka ba basi ba bada banɛ ka ba dɔl wʋʋ ba anɛ pu'agɔɔnda la, nɛ ba na'anam bada banɛ pʋ mɔr gbin la, ka m na bɛɛ ba sʋʋgin saŋa wʋsa.10 “Ninsaal biiga, pa'alim Israel dim la Pʋ'ʋsim Yir la an si'em, ka li na kɛ ka nyan kpɛn' ba, ba tʋʋmbɛ'ɛd la zug. Kɛl ka ba tɛn'ɛs Yir la mɛɛb yɛla, 11 ka nyan ya'a mɔri ba nɛ ban maal si'el la wʋsa, fʋn kɛl ka ba baŋ Pʋ'ʋsim Yir la zi'esim an si'em, nɛ li yiib nɛ li kpɛn'ɛb zin'is. Pa'alimi ba Yir la gban'ari an si'em, li zi'esim nɛ li wada an si'em. Sɔmmi li wʋsa tisi ba ka ba na dɔlisidi li sʋ'ʋŋa zaŋi kennɛ li zi'esim nɛ li zi'ela la.
12 “Pʋ'ʋsim Yir la wada nwana: zin'ikanɛ gilig zuor la zug wʋsa na anɛ zin'ikanɛ an kasi la. Pʋ'ʋsim Yir la wada an si'em la.”
Maan bimbim la yɛla
13 “Maan bimbim la makiri an si'em nwa, li ku'osuoya la zulʋŋ anɛ nɔba makir yinne nɛ pʋsʋk ka li yalʋŋ an nɔba makir yinne nɛ pʋsʋkʋ giligi li nɔɔr la, ka li nɔɔr la an nu'ug makir yinne nɛ pʋsʋk. Daka la wa'alim nwa: 14 lin yi ku'osuor kanɛ bɛ teŋin la paae li gʋʋdiŋ linɛ bɛ teŋir la, li wa'alim anɛ nɔba makir anaasi nɛ pʋsʋk ka yalʋŋ an nɔba makir ayi' nɛ bi'ela, ka lin yi gʋʋdiŋ kanɛ pɔɔd la ni paae linɛ bɛdim la ni li wa'alim agɔla anɛ nɔba makir ayuobʋ ka li yalʋŋ an makir yinne nɛ pʋsʋk. 15 Daka la zug, zin'ikanɛ ka bugum bɛ la, wa'alim anɛ nɔba makir ayuobʋ ka ba mɛɛ li dʋ'ʋs zin'is anaasi ka li nwɛnɛ iila nɛ. 16 Daka la zugin anɛ mauk, ka li wa'alim anɛ nɔba makir pii nɛ anii ka li yalʋŋ an pii nɛ anii. 17 Li gʋʋdiŋ linɛ bɛ zugin la mɛ anɛ mauk, ka li wa'alim an nɔba makir pisi nɛ yinne ka li yalʋŋ an nɔba makir pisi nɛ yinne, ka li nɔɔr la an nɔba makir yinne ka li ku'osuor linɛ giligi li la an nɔba makir yinne nɛ pʋsʋk. Ka li dʋʋsa la kpa' ya-nya'aŋ.”
18 Ani ka Zugsɔb onɛ an Paŋtita'ar Sɔb la yɛlim ye, “Ninsaal biiga, Zugsɔb onɛ an Paŋtita'ar Sɔb la yɛl si'eli nwa ye, ‘Maan bimbim la ya'a ti mɛɛ naae, bama na an zi'ela banɛ bɛ maan la maalʋg saŋa linɛ an nyu'or maan nɛ ziim misib. 19 Ya na nɔk na'arapɔlli tis maanmaannib banɛ an Levi dim ka yi Zadok tuŋʋn na ka tʋmmi m san'an la. Ya na tisi ba ka li an tʋʋmbɛ'ɛd maan.’ Zugsɔb onɛ an Paŋtita'ar Sɔb la pian'ʋkʋ la. 20 ‘Ya na nɔk ziim la niŋ zin'isa anaasi banɛ ka ba mɛɛ dʋ'ʋsi li zugin ka li nwɛnɛ iila la, nɛ li lɔdis anaasi la giligi li nɔɔr la, ka li an maan kanɛ na sɔs suguru pie maan daka la ka kɛ ka li an kasi. 21 Ya na nɔk na'araug kanɛ na maal tʋʋmbɛ'ɛd maan la nyu'oe li Pʋ'ʋsim Yin la yiŋ zin'ikanɛ nar ye ba nyu'oe li la.
22 “ ‘Dabisir kanɛ paasi ayi' la, ya na nɔk bʋribig kanɛ pʋ mɔr dɛŋi maal tʋʋmbɛ'ɛd maan, ka maal bimbim la ka li an kasi wʋʋ na'araug la ka ba nɔki maali li kasi si'em la. 23 Ya ya'a maali li kasi naae, ya na nɔk na'arapɔl nɛ pɛ'ɛrabanɛ ka ya na gaŋi ba ya bʋnkɔnbid la sʋʋgin ka babayi' la pʋ mɔr dɛŋ la m maal maan. 24 Ya na mɔri ba kɛn Zugsɔb la tuon na, ka maanmaan la na nɔk yaarim zu'asi ba ka nɔki ba maal nyu'or maannɛ tis Zugsɔb la.
25 “ ‘Daba ayɔpɔi pʋʋgin, dabisir wʋsa, ya na tisid bʋribig ka ba maan maannɛ sɔs suguru tʋʋmbɛ'ɛd yɛla paae daba ayɔpɔi; ya na lɛn tis na'arapɔl nɛ pɛ'ɛraugʋ ya bʋnkɔnbid la sʋʋgin banɛ pʋ mɔr dɛŋŋa. 26 Daba ayɔpɔi ka ya na maan maana linɛ na kɛ ka daka la an kasi, ka na pɛsigi li. 27 Dabisbama ya'a ti gaad, lin yi daba anii la daar, maanmaan la na maal nyu'or maan nɛ taaba la'asʋg maan daka la zug. Ala ka m na di'e ya maana la.’ ”