Maanmaannib dɔɔd
42
1 Ka dau la mɔrimi lɛbi keŋ ya-datiuŋʋ kpɛn' zak linɛ bɛ yiŋ la ka mɔrimi keŋ dɔbanɛ kpa' nɛ Pʋ'ʋsim Dɔɔg la zak ka kpa' zaŋguom kanɛ bɛ yiŋ ya-datiuŋ baba la. 2 Dɔkanɛ ka li za'anɔɔr kpa' ya-datiuŋ la wa'alim da anɛ nɔba makir kɔbiga nɛ pisnu ka li yalʋŋ an nɔba makir pisyɔpɔi nɛ anu. 3 Zin'is ayi' banɛ bɛ zak kanɛ bɛ pʋʋgin la nɛ linɛ kpi'e yiŋ za'ambɛŋ la yalʋŋ da anɛ nɔba makir pistan'. Dɔbibis banɛ da kpa' taaba la, ba da mɛɛ ba nɛ sʋn'ʋl taaba zin'isa atan'. 4 Dɔɔd la tuon da mɔr za'anɔɔr linɛ bɛ pʋʋgin ka li yalʋŋ an nɔba makir pii nɛ anu ka li wa'alim an nɔba makir kɔbiga nɛ pisnu, ka dɔbibis la za'anɔya kpa' ya-datiuŋ. 5 Dɔbanɛ bɛ zugin la da yubilnɛ ka pʋ yalimma, bɔzugɔ ban da mɛ' ka maali gʋl si'elnam si'em la da kɛ ka li di paalʋ la ka dɔbanɛ bɛ zugin la pʋ yalime paae dɔbanɛ bɛ teŋin nɛ teŋsʋk la. 6 Dɔbanɛ bɛ zugini sʋn'e atan' ni la da pʋ mɔr zan'antɔlis wʋʋ zakin la an si'em la; alazug ka ba pɔɔd ka pʋ yalim wʋʋ dɔbanɛ bɛ teŋin nɛ teŋsʋk laa. 7 Zaŋguom da bɛɛ bɛŋ dɔɔd la nɛ zak kanɛ bɛ yiŋ la; ka li wa'alim tɔlis dɔɔd la tuon nɔba makir pisyɔpɔi nɛ anu. 8 Ka dɔbanɛ tuunl taaba lɛbid zak kanɛ bɛ yiŋ baba la an nɔba makir pisyɔpɔi nɛ anu, ka banɛ tuunl taaba zin'ig yinne linɛ kpi'e nɛ Pʋ'ʋsim Dɔɔg la wa'alim an nɔba makir kɔbiga nɛ pisnu. 9 Dɔbanɛ bɛ teŋir za'anɔya ni la da bɛ nɛ ya-nya'aŋ baba ka ba dɔl zak kanɛ bɛ yiŋ la kpɛn'ɛdi ba pʋʋgin.10 Dɔɔd da bɛ ya-dagɔbʋg linɛ lɛbisid nya'aŋ baba la, dɔlis zaŋguom kanɛ bɛ zak kanɛ bɛ yiŋ la, tɔ'ɔŋ nɛ Pʋ'ʋsim Dɔɔg zak la, ka mɛ kpa' zaŋguom kanɛ bɛ yiŋ la, 11-12 ka suor bɛɛ ba tuon la gat. Bama da nwɛnɛ dɔbanɛ bɛ ya-datiuŋ la nɛ; ba wa'alim nɛ ba yalʋŋ da zemnɛ, ba yiib zin'ig nɛ ba makir da anɛ yinne. Dɔbanɛ bɛ ya-datiuŋ baba za'anɔya baba la da anɛ yinne nɛ banɛ bɛ ya-dagɔbʋg la. Za'anɔɔr da bɛ zanɔɔr la pin'il zin'isi'a la, linɛ bu'al nɛ zaŋguom kanɛ wa'ami yi yiŋ ya-nya'aŋ baba, zin'ikanɛ ka nidib dɔlli kpɛn'ɛd dɔɔdin la.
13 Ani ka o yɛlim ye, “Dɔbanɛ bɛ datiuŋ nɛ dagɔbʋgʋ kpa' Pʋ'ʋsim Dɔɔg zak la anɛ maanmaannib la dɔɔd, zin'ikan la ka maanmaannib banɛ kpɛn'ɛd Zugsɔb san'an la na dit maan diib linɛ an kasi la. Ani ka ba na digin maan linɛ an kasi amɛŋa la. Linɛ an: zʋʋd maan, nɛ tʋʋmbɛ'ɛd maan, nɛ taal maan la wʋsa, bɔzugɔ zin'ikan la anɛ kasi. 14 Maanmaannib la ya'a kpɛn' Zin'isʋŋin la ka ti bɔɔd ye ba yii keŋ zak kanɛ bɛ yiŋ la ni, asɛɛ ka ba yɛɛg fubanɛ ka ba yɛɛ kpɛn' anina tʋm la, bɔzugɔ fuud nwa anɛ kasi. Asɛɛ ba yɛ fubanɛ an yiŋ fuud la ka naan yi nidibi bɛ zin'isi'a la.”
15 Ka on mak linɛ bɛ pʋʋginɛ naae la, o dɔllimi yi za'anɔɔr kanɛ bɛ ya-nya'aŋ la, ka mak paalʋ la wʋsa gilig. 16 O nɔk makir daugʋ mak ya-nya'aŋ baba la; ka li an nɔba makir kɔbisyɔpɔi nɛ pisnu. 17 Ka o mak ya-datiuŋ baba la; ka li an nɔba makir kɔbisyɔpɔi nɛ pisnu. 18 Ka mak ya-dagɔbʋg baba nɛ makir daug la; ka li an nɔba makir kɔbisyɔpɔi nɛ pisnu. 19 Ani ka o lɛn fɛndig ya-tuona baba mak nɛ makir daug la; ka li an nɔba makir kɔbisyɔpɔi ni pisnu. 20 Ala ka o maki li lʋga anaasi la wʋsa. Ba da mɛnɛ zaŋguomi giligi li wʋsa, ka li bɛŋ zin'ikanɛ an kasi la bɛn ka kɛ linɛ ka' kasi la, ka li wa'alim an nɔba makir kɔbisyɔpɔi nɛ pisnu ka li yalʋŋ an kɔbisyɔpɔi nɛ pisnu.