41
1 Dau la yʋ'ʋn da mɔrimi kpɛn' dɔkanɛ bɛ sʋʋgin ka ba buonnɛ li ye Zin'isʋŋ Linɛ an Kasi la, ka maki li zanɔɔr ka li zaŋguom la mugulim an nɔba makir awai. 2 Za'anɔɔr la yalʋŋ da anɛ nɔba makir pii nɛ anu, ka li zaŋguoma an nɔba makir ayɔpɔi nɛ pʋsʋk zin'ig wʋsa. Ka o lɛm mak dɔɔg la; ka li wa'alim an nɔba makir pisyuobʋ ka li yalʋŋ an nɔba makir pistan'.3 Ka o tʋgisi kpɛn' dɔkanɛ an Kasi Wʋsa Kasi zin'ig la pʋʋginɛ maki li zanɔɔr la zaŋguom ka li mugulim makir an nɔba makir atan'; ka dɔɔg la nɔɔr yalʋŋ an nɔba makir awai, ka zaŋguoma banɛ bɛŋ la li datiuŋ nɛ li dagɔbʋg wʋsa yalʋŋ an nɔba makir pii nɛ yinne-yinne. 4 Ka o mak pʋʋgin dɔkanɛ an Kasi Wʋsa Kasi la; ka li wa'alim an nɔba makir pistan', ka li yalʋŋ mɔri ala paae Zin'ig Sʋŋ la, ka li an pistan'. Ka o yɛlim ye, “Kasi Wʋsa Kasi dɔɔg la nwa.”
5 Ka o mak Pʋ'ʋsim Dɔɔg la dɔkpin ka li mugulim an nɔba makir awai, ka dɔbanɛ gilig Pʋ'ʋsim Dɔɔg la wʋsa yalʋŋ an nɔba makir ayuob, yuob. 6 Dɔbanɛ bɛ kpikpɛmis la da anɛ girimbisanam ka sʋn'e zin'isa atan', ka sʋn'ʋlʋg wʋsa mɔr dɔɔd pistan'. Ba da mɛnɛ kʋku'asi gilig Pʋ'ʋsim Dɔɔg la ka dɔbanɛ bɛ kpikpɛŋ la sʋn'e li zug, ka li pʋ vurigi kpɛn' Pʋ'ʋsim Dɔɔg dɔkpina la nii. 7 Dɔbanɛ bɛ kpikpɛmisi gilig la da paas nɛ yalʋŋ sʋn'ʋlʋg wʋsa ni. Linɛ mɛɛ gilig Pʋ'ʋsim Yir la tɔ'ɔŋ nɛ taaba zugin ka dɔɔd la yaligidi dʋt wʋʋ ban tɔ'ɔŋ si'em la. Ba da maal dʋʋsa dɔbanɛ bɛ teŋir la ni ka li dʋti dɔl dɔbanɛ bɛ sʋʋgin la keŋ paae banɛ bɛ zugin la.
8 Ka m nyɛ ka bimbim mɛɛ gilig Pʋ'ʋsim Dɔɔg la, naal nɛ dɔbanɛ bɛ kpikpɛmis la ɛɛnbir. Ka li tɛbisim an makir daug la yinne. 9 Dɔbanɛ bɛ yiŋ la dɔkpin tɛbisim da anɛ nɔba makir ayɔpɔi nɛ pʋsʋk. Ka paalʋ bɛ dɔbanɛ bɛ Pʋ'ʋsim Dɔɔg kpikpɛŋ la 10 nɛ maanmaannib dɔɔd la teŋsʋk, ka li yalʋŋ an nɔba makir pistan'-tan' gilig Pʋ'ʋsim Yir la. 11 Za'anɔya da bɛ zin'ikanɛ an paalʋ la ni kpɛn'ɛd dɔɔdin la, ka za'anɔɔr yinne bɛ ya-datiuŋ ka yinne bɛ ya-dagɔbʋg: ka paalʋ kanɛ bɛ li sʋʋgin gilig la yalʋŋ an nɔba makir ayɔpɔi nɛ pʋsʋk.
12 Dɔsi'a da bɛɛ kpa' Pʋ'ʋsim Dɔɔg zak kanɛ bɛ ya-tuona la, ka li yalʋŋ an nɔba makir kɔbiga nɛ anu ka li wa'alim an kɔbiga nɛ pistan' nɛ anu. Dɔɔg nwa dɔkpin mugulim da anɛ nɔba makir ayɔpɔi nɛ pʋsʋk.
13 Ka o mak Pʋ'ʋsim Dɔɔg la, ka li wa'alim an nɔba makir kɔbiga nɛ pisnu, ka li zak nɛ li dɔkanɛ bɛ zak la nya'aŋ la wʋsa wa'alim mɛ da anɛ nɔba makir kɔbiga nɛ pisnu. 14 Pʋ'ʋsim Dɔɔg la zak linɛ lɛb ya-nya'aŋ la yalʋŋ, nɛ Pʋ'ʋsim Dɔɔg la tuon wʋsa, da anɛ nɔba makir kɔbiga nɛ pisnu.
15 Ka o mak dɔɔg linɛ kpa' zak la Pʋ'ʋsim Dɔɔg la nya'aŋ, la'am nɛ li dɔbibis la zin'ig wʋsa; ka li wa'alim an nɔba makir kɔbiga nɛ pisnu.
Zin'ig Sʋŋ la, nɛ Kasi Wʋsa Kasi zin'ig, nɛ za'ambɛŋ kanɛ kpa' zak la, 16 la'am nɛ li zanɔɔr nɛ takorbibis la nɛ linɛ ka ba mɛɛ gilig dɔɔd atan' la nɛ si'el wʋsa la'am nɛ zanɔɔr la wʋsa ba da nɔknɛ daadi tabili taasi gilig. Lin yii li teŋin nɛ dɔkpinnin la paae takoronam la bɛn; hali takoronam la wʋsa mɛ tabil nɛ daad. 17 Kasi Wʋsa Kasi zin'ig za'anɔɔr la zugin la nɛ dɔɔd ayi' la wʋsa dɔkpina banɛ gilig la wʋsa 18 ba da maalnɛ Kerubnam nɛ kpʋkparis vaandi tabil. Ba da maal kpʋkparis vaand la nɛ Kerubnam la lʋʋm-lʋʋm taaba. Kerubnam la yinne wʋsa da mɔri nindaas ayi', yi' 19 ka o ninsaal nindaa kpa' kpʋkparig vaand la lʋgir yinne, ka o gbigim nindaa kpa' kpʋkparig vaand lʋgkaŋa la. Pʋ'ʋsim Dɔɔg la da tabilnɛ ala gilig wʋsa. 20 Lin yi teŋin keŋ paae za'anɔɔr la zugin la, Kerubnam nɛ kpʋkparis vaand da tabili lusi li Kasi Wʋsa Kasi zin'ig dɔkpina la wʋsa.
21 Zin'ikanɛ an Kasi la yiŋ za'anɔɔr la kʋlʋŋ la dazi'eda da anɛ mauk, ka linɛ bɛ Kasi Wʋsa Kasi zin'ig la tuon la mɛ nwɛnɛ ala. 22 Daad malʋŋ teebul da bɛɛ ani ka li zugin wa'alim an nɔba makir anaasi nɛ pʋsʋk, li zin'ig wʋsa da anɛ daad. Ka dau la yɛlim ye, “Teebul kanɛ bɛ Zugsɔb tuon la nwa.” 23 Zin'ikanɛ an Kasi la yiŋ nɛ Kasi Wʋsa Kasi pʋʋgin la da mɔri dalamma ayi', yi'. 24 Kʋlʋŋ wʋsa da mɔr yɔ'ɔgir ayi' ka ba kpa' ba tabil taaba nɛ tabidis. 25 Kʋlis banɛ bɛ Kasi Zin'igin la ba da kpi'enɛ Kerubnam nɛ kpʋkparis vaand, wʋʋ dɔkpina la an si'em la, ka maal daadi tabili lus zaŋguoma la tuon. 26 Dɔkpina banɛ bɛ za'ambɛŋ kpikpɛmis la, takorbibis da bɛ ani ka ba kpi'e kpʋkparis vaandi tabili li zin'ig wʋsa. Dɔbanɛ bɛ kpikpɛmis la wʋsa da mɔr daad banɛ ya'ali lusi li.